൧൦. സുമങ്ഗലത്ഥേരഅപദാനം

൧൨൪. ‘‘ആഹുതിം യിട്ഠുകാമോഹം, പടിയാദേത്വാന ഭോജനം;

ബ്രാഹ്മണേ പടിമാനേന്തോ, വിസാലേ മാളകേ ഠിതോ.

൧൨൫. ‘‘അഥദ്ദസാസിം സമ്ബുദ്ധം, പിയദസ്സിം മഹായസം;

സബ്ബലോകവിനേതാരം, സയമ്ഭും അഗ്ഗപുഗ്ഗലം.

൧൨൬. ‘‘ഭഗവന്തം ജുതിമന്തം, സാവകേഹി പുരക്ഖതം;

ആദിച്ചമിവ രോചന്തം, രഥിയം പടിപന്നകം.

൧൨൭. ‘‘അഞ്ജലിം പഗ്ഗഹേത്വാന, സകം ചിത്തം പസാദയിം;

മനസാവ നിമന്തേസിം, ‘ആഗച്ഛതു മഹാമുനി’.

൧൨൮. ‘‘മമ സങ്കപ്പമഞ്ഞായ, സത്ഥാ ലോകേ അനുത്തരോ;

ഖീണാസവസഹസ്സേഹി, മമ ദ്വാരം ഉപാഗമി.

൧൨൯. ‘‘നമോ തേ പുരിസാജഞ്ഞ, നമോ തേ പുരിസുത്തമ;

പാസാദം അഭിരൂഹിത്വാ, സീഹാസനേ നിസീദതം [നിസീദ ത്വം (സീ.)].

൧൩൦. ‘‘ദന്തോ ദന്തപരിവാരോ, തിണ്ണോ താരയതം വരോ;

പാസാദം അഭിരൂഹിത്വാ, നിസീദി പവരാസനേ.

൧൩൧. ‘‘യം മേ അത്ഥി സകേ ഗേഹേ, ആമിസം പച്ചുപട്ഠിതം;

താഹം ബുദ്ധസ്സ പാദാസിം, പസന്നോ സേഹി പാണിഭി.

൧൩൨. ‘‘പസന്നചിത്തോ സുമനോ, വേദജാതോ കതഞ്ജലീ;

ബുദ്ധസേട്ഠം നമസ്സാമി, അഹോ ബുദ്ധസ്സുളാരതാ.

൧൩൩. ‘‘അട്ഠന്നം പയിരൂപാസതം, ഭുഞ്ജം ഖീണാസവാ ബഹൂ;

തുയ്ഹേവേസോ ആനുഭാവോ, സരണം തം ഉപേമഹം.

൧൩൪. ‘‘പിയദസ്സീ ച ഭഗവാ, ലോകജേട്ഠോ നരാസഭോ;

ഭിക്ഖുസങ്ഘേ നിസീദിത്വാ, ഇമാ ഗാഥാ അഭാസഥ.

൧൩൫. ‘‘‘യോ സോ സങ്ഘം അഭോജേസി, ഉജുഭൂതം സമാഹിതം;

തഥാഗതഞ്ച സമ്ബുദ്ധം, സുണാഥ മമ ഭാസതോ.

൧൩൬. ‘‘‘സത്തവീസതിക്ഖത്തും സോ, ദേവരജ്ജം കരിസ്സതി;

സകകമ്മാഭിരദ്ധോ സോ, ദേവലോകേ രമിസ്സതി.

൧൩൭. ‘‘‘ദസ അട്ഠ ചക്ഖത്തും [ദസഞ്ചട്ഠക്ഖത്ഥും (സീ.), ദസ ചട്ഠക്ഖത്തും (സ്യാ.)] സോ, ചക്കവത്തീ ഭവിസ്സതി;

പഥബ്യാ രജ്ജം പഞ്ചസതം, വസുധം ആവസിസ്സതി’.

൧൩൮. ‘‘അരഞ്ഞവനമോഗ്ഗയ്ഹ, കാനനം ബ്യഗ്ഘസേവിതം;

പധാനം പദഹിത്വാന, കിലേസാ ഝാപിതാ മയാ.

൧൩൯. ‘‘അട്ഠാരസേ കപ്പസതേ, യം ദാനമദദിം തദാ;

ദുഗ്ഗതിം നാഭിജാനാമി, ഭത്തദാനസ്സിദം ഫലം.

൧൪൦. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ സുമങ്ഗലോ ഥേരോ ഇമാ ഗാഥായോ അഭാസിത്ഥാതി.

സുമങ്ഗലത്ഥേരസ്സാപദാനം ദസമം.

തസ്സുദ്ദാനം –

സീഹാസനീ ഏകഥമ്ഭീ, നന്ദോ ച ചൂളപന്ഥകോ;

പിലിന്ദരാഹുലോ ചേവ, വങ്ഗന്തോ രട്ഠപാലകോ.

സോപാകോ മങ്ഗലോ ചേവ, ദസേവ ദുതിയേ വഗ്ഗേ;

സതഞ്ച അട്ഠതിംസ ച, ഗാഥാ ചേത്ഥ പകാസിതാ.

സീഹാസനിയവഗ്ഗോ ദുതിയോ.