൫. ഇസിമുഗ്ഗദായകത്ഥേരഅപദാനം

൨൪. ‘‘ഉദേന്തം സതരംസിംവ, പീതരംസിംവ [സിതരംസിംവ (സീ.)] ഭാണുമം;

കകുധം വിലസന്തംവ, പദുമുത്തരനായകം.

൨൫. ‘‘ഇസിമുഗ്ഗാനി പിസിത്വാ [ഇസിസുഗ്ഗാനി പിംസേത്വാ (സീ.), ഇസിമുഗ്ഗം നിമന്തേത്വാ (സ്യാ.)], മധുഖുദ്ദേ അനീളകേ;

പാസാദേവ ഠിതോ സന്തോ, അദാസിം ലോകബന്ധുനോ.

൨൬. ‘‘അട്ഠസതസഹസ്സാനി, അഹേസും ബുദ്ധസാവകാ;

സബ്ബേസം പത്തപൂരേന്തം [പത്തപൂരം തം (സീ.)], തതോ ചാപി ബഹുത്തരം.

൨൭. ‘‘തേന ചിത്തപ്പസാദേന, സുക്കമൂലേന ചോദിതോ;

കപ്പാനം സതസഹസ്സം, ദുഗ്ഗതിം നുപപജ്ജഹം.

൨൮. ‘‘ചത്താലീസമ്ഹി സഹസ്സേ, കപ്പാനം അട്ഠതിംസ തേ;

ഇസിമുഗ്ഗസനാമാ [മഹിസമന്തനാമാ (സ്യാ.)] തേ, ചക്കവത്തീ മഹബ്ബലാ.

൨൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ഇസിമുഗ്ഗദായകോ ഥേരോ ഇമാ ഗാഥായോ അഭാസിത്ഥാതി.

ഇസിമുഗ്ഗദായകത്ഥേരസ്സാപദാനം പഞ്ചമം.