൮. ഞാണസഞ്ഞികത്ഥേരഅപദാനം

൮൪. ‘‘പബ്ബതേ ഹിമവന്തമ്ഹി, വസാമി പബ്ബതന്തരേ;

പുലിനം സോഭനം ദിസ്വാ, ബുദ്ധസേട്ഠം അനുസ്സരിം.

൮൫. ‘‘ഞാണേ ഉപനിധാ നത്ഥി, സങ്ഖാരം [സങ്ഗാമം (സീ. സ്യാ.), സങ്ഖാതം (ഥേരഗാഥാ അട്ഠ.)] നത്ഥി സത്ഥുനോ;

സബ്ബധമ്മം അഭിഞ്ഞായ, ഞാണേന അധിമുച്ചതി.

൮൬. ‘‘നമോ തേ പുരിസാജഞ്ഞ, നമോ തേ പുരിസുത്തമ;

ഞാണേന തേ സമോ നത്ഥി, യാവതാ ഞാണമുത്തമം.

൮൭. ‘‘ഞാണേ ചിത്തം പസാദേത്വാ, കപ്പം സഗ്ഗമ്ഹി മോദഹം;

അവസേസേസു കപ്പേസു, കുസലം ചരിതം [കരിതം (സീ. സ്യാ.), കിരിയം (ക.)] മയാ.

൮൮. ‘‘ഏകനവുതിതോ കപ്പേ, യം സഞ്ഞമലഭിം തദാ;

ദുഗ്ഗതിം നാഭിജാനാമി, ഞാണസഞ്ഞായിദം ഫലം.

൮൯. ‘‘ഇതോ സത്തതികപ്പമ്ഹി [തേസത്തതികപ്പേ (സീ. സ്യാ.)], ഏകോ പുലിനപുപ്ഫിയോ;

സത്തരതനസമ്പന്നോ, ചക്കവത്തീ മഹബ്ബലോ.

൯൦. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ഞാണസഞ്ഞികോ ഥേരോ ഇമാ ഗാഥായോ അഭാസിത്ഥാതി.

ഞാണസഞ്ഞികത്ഥേരസ്സാപദാനം അട്ഠമം.