൨. പുപ്ഫഥൂപിയത്ഥേരഅപദാനം

൧൦. ‘‘ഹിമവന്തസ്സാവിദൂരേ, കുക്കുരോ നാമ [കുക്കുടോ നാമ (സീ.)] പബ്ബതോ;

വേമജ്ഝേ തസ്സ വസതി, ബ്രാഹ്മണോ മന്തപാരഗൂ.

൧൧. ‘‘പഞ്ച സിസ്സസഹസ്സാനി, പരിവാരേന്തി മം സദാ;

പുബ്ബുട്ഠായീ ച തേ ആസും, മന്തേസു ച വിസാരദാ.

൧൨. ‘‘ബുദ്ധോ ലോകേ സമുപ്പന്നോ, തം വിജാനാഥ നോ ഭവം;

അസീതിബ്യഞ്ജനാനസ്സ, ബാത്തിംസവരലക്ഖണാ.

൧൩. ‘‘ബ്യാമപ്പഭോ ജിനവരോ, ആദിച്ചോവ വിരോചതി;

സിസ്സാനം വചനം സുത്വാ, ബ്രാഹ്മണോ മന്തപാരഗൂ.

൧൪. ‘‘അസ്സമാ അഭിനിക്ഖമ്മ, ദിസം പുച്ഛതി സിസ്സകേ [ബ്രാഹ്മണോ (സ്യാ.)];

യമ്ഹി ദേസേ മഹാവീരോ, വസതി ലോകനായകോ.

൧൫. ‘‘താഹം ദിസം നമസ്സിസ്സം, ജിനം അപ്പടിപുഗ്ഗലം;

ഉദഗ്ഗചിത്തോ സുമനോ, പൂജേസിം തം തഥാഗതം.

൧൬. ‘‘ഏഥ സിസ്സാ ഗമിസ്സാമ, ദക്ഖിസ്സാമ തഥാഗതം;

വന്ദിത്വാ സത്ഥുനോ പാദേ, സോസ്സാമ ജിനസാസനം.

൧൭. ‘‘ഏകാഹം അഭിനിക്ഖമ്മ, ബ്യാധിം പടിലഭിം അഹം;

ബ്യാധിനാ പീളിതോ സന്തോ, സാലം വാസയിതും ഗമിം.

൧൮. ‘‘സബ്ബേ സിസ്സേ സമാനേത്വാ, അപുച്ഛിം തേ തഥാഗതം;

കീദിസം ലോകനാഥസ്സ, ഗുണം പരമബുദ്ധിനോ.

൧൯. ‘‘തേ മേ പുട്ഠാ വിയാകംസു, യഥാ ദസ്സാവിനോ തഥാ;

സക്കച്ചം ബുദ്ധസേട്ഠം തം, ദേസേസും [ദസ്സേസും (സീ. സ്യാ.)] മമ സമ്മുഖാ.

൨൦. ‘‘തേസാഹം വചനം സുത്വാ, സകം ചിത്തം പസാദയിം;

പുപ്ഫേഹി ഥൂപം കത്വാന, തത്ഥ കാലങ്കതോ അഹം.

൨൧. ‘‘തേ മേ സരീരം ഝാപേത്വാ, അഗമും ബുദ്ധസന്തികം;

അഞ്ജലിം പഗ്ഗഹേത്വാന, സത്ഥാരമഭിവാദയും.

൨൨. ‘‘പുപ്ഫേഹി ഥൂപം കത്വാന, സുഗതസ്സ മഹേസിനോ;

കപ്പാനം സതസഹസ്സം, ദുഗ്ഗതിം നുപപജ്ജഹം.

൨൩. ‘‘ചത്താലീസസഹസ്സമ്ഹി, കപ്പേ സോളസ ഖത്തിയാ;

നാമേനഗ്ഗിസമാ നാമ, ചക്കവത്തീ മഹബ്ബലാ.

൨൪. ‘‘വീസകപ്പസഹസ്സമ്ഹി, രാജാനോ ചക്കവത്തിനോ;

ഘതാസനസനാമാവ, അട്ഠത്തിംസ മഹീപതീ.

൨൫. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ പുപ്ഫഥൂപിയോ ഥേരോ ഇമാ ഗാഥായോ അഭാസിത്ഥാതി.

പുപ്ഫഥൂപിയത്ഥേരസ്സാപദാനം ദുതിയം.