൯. പച്ചുപട്ഠാനസഞ്ഞകത്ഥേരഅപദാനം

൭൨. ‘‘അത്ഥദസ്സിമ്ഹി സുഗതേ, നിബ്ബുതേ സമനന്തരാ;

യക്ഖയോനിം ഉപപജ്ജിം, യസം പത്തോ ചഹം തദാ.

൭൩. ‘‘ദുല്ലദ്ധം വത മേ ആസി, ദുപ്പഭാതം ദുരുട്ഠിതം;

യം മേ ഭോഗേ വിജ്ജമാനേ, പരിനിബ്ബായി ചക്ഖുമാ.

൭൪. ‘‘മമ സങ്കപ്പമഞ്ഞായ, സാഗരോ നാമ സാവകോ;

മമുദ്ധരിതുകാമോ സോ, ആഗച്ഛി മമ സന്തികം.

൭൫. ‘‘കിം നു സോചസി മാ ഭായി, ചര ധമ്മം സുമേധസ;

അനുപ്പദിന്നാ ബുദ്ധേന, സബ്ബേസം ബീജസമ്പദാ.

൭൬. ‘‘സോ ചേ പൂജേയ്യ സമ്ബുദ്ധം, തിട്ഠന്തം ലോകനായകം;

ധാതും സാസപമത്തമ്പി, നിബ്ബുതസ്സാപി പൂജയേ.

൭൭. ‘‘സമേ ചിത്തപ്പസാദമ്ഹി, സമം പുഞ്ഞം മഹഗ്ഗതം;

തസ്മാ ഥൂപം കരിത്വാന, പൂജേഹി ജിനധാതുയോ.

൭൮. ‘‘സാഗരസ്സ വചോ സുത്വാ, ബുദ്ധഥൂപം അകാസഹം;

പഞ്ചവസ്സേ പരിചരിം, മുനിനോ ഥൂപമുത്തമം.

൭൯. ‘‘തേന കമ്മേന ദ്വിപദിന്ദ, ലോകജേട്ഠ നരാസഭ;

സമ്പത്തിം അനുഭോത്വാന, അരഹത്തമപാപുണിം.

൮൦. ‘‘ഭൂരിപഞ്ഞാ ച ചത്താരോ, സത്തകപ്പസതേ ഇതോ;

സത്തരതനസമ്പന്നാ, ചക്കവത്തീ മഹബ്ബലാ.

൮൧. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ പച്ചുപട്ഠാനസഞ്ഞകോ ഥേരോ ഇമാ ഗാഥായോ അഭാസിത്ഥാതി.

പച്ചുപട്ഠാനസഞ്ഞകത്ഥേരസ്സാപദാനം നവമം.