൩-൫. പുണ്ണമന്താണിപുത്തത്ഥേരഅപദാനം

൪൩൪. ‘‘അജ്ഝായകോ മന്തധരോ, തിണ്ണം വേദാന പാരഗൂ;

പുരക്ഖതോമ്ഹി സിസ്സേഹി, ഉപഗച്ഛിം നരുത്തമം.

൪൩൫. ‘‘പദുമുത്തരോ ലോകവിദൂ, ആഹുതീനം പടിഗ്ഗഹോ;

മമ കമ്മം പകിത്തേസി, സങ്ഖിത്തേന മഹാമുനി.

൪൩൬. ‘‘താഹം ധമ്മം സുണിത്വാന, അഭിവാദേത്വാന സത്ഥുനോ;

അഞ്ജലിം പഗ്ഗഹേത്വാന, പക്കമിം [പക്കാമിം (സീ. സ്യാ.)] ദക്ഖിണാമുഖോ.

൪൩൭. ‘‘സങ്ഖിത്തേന സുണിത്വാന, വിത്ഥാരേന അഭാസയിം [അദേസയിം (സീ. സ്യാ.)];

സബ്ബേ സിസ്സാ അത്തമനാ, സുത്വാന മമ ഭാസതോ;

സകം ദിട്ഠിം വിനോദേത്വാ, ബുദ്ധേ ചിത്തം പസാദയും.

൪൩൮. ‘‘സങ്ഖിത്തേനപി ദേസേമി, വിത്ഥാരേന തഥേവഹം [ദേസേസിം വിത്ഥാരേനപി ഭാസയിം (ക.)];

അഭിധമ്മനയഞ്ഞൂഹം, കഥാവത്ഥുവിസുദ്ധിയാ;

സബ്ബേസം വിഞ്ഞാപേത്വാന, വിഹരാമി അനാസവോ.

൪൩൯. ‘‘ഇതോ പഞ്ചസതേ കപ്പേ, ചതുരോ സുപ്പകാസകാ;

സത്തരതനസമ്പന്നാ, ചതുദീപമ്ഹി ഇസ്സരാ.

൪൪൦. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ പുണ്ണോ മന്താണിപുത്തോ ഥേരോ ഇമാ ഗാഥായോ അഭാസിത്ഥാതി.

പുണ്ണമന്താണിപുത്തത്ഥേരസ്സാപദാനം പഞ്ചമം.