൩-൪. അനുരുദ്ധത്ഥേരഅപദാനം

൪൨൧. ‘‘സുമേധം ഭഗവന്താഹം, ലോകജേട്ഠം നരാസഭം;

വൂപകട്ഠം വിഹരന്തം, അദ്ദസം ലോകനായകം.

൪൨൨. ‘‘ഉപഗന്ത്വാന സമ്ബുദ്ധം, സുമേധം ലോകനായകം;

അഞ്ജലിം പഗ്ഗഹേത്വാന, ബുദ്ധസേട്ഠമയാചഹം.

൪൨൩. ‘‘അനുകമ്പ മഹാവീര, ലോകജേട്ഠ നരാസഭ;

പദീപം തേ പദസ്സാമി, രുക്ഖമൂലമ്ഹി ഝായതോ.

൪൨൪. ‘‘അധിവാസേസി സോ ധീരോ, സയമ്ഭൂ വദതം വരോ;

ദുമേസു വിനിവിജ്ഝിത്വാ, യന്തം യോജിയഹം തദാ.

൪൨൫. ‘‘സഹസ്സവട്ടിം പാദാസിം, ബുദ്ധസ്സ ലോകബന്ധുനോ;

സത്താഹം പജ്ജലിത്വാന, ദീപാ വൂപസമിംസു മേ.

൪൨൬. ‘‘തേന ചിത്തപ്പസാദേന, ചേതനാപണിധീഹി ച;

ജഹിത്വാ മാനുസം ദേഹം, വിമാനമുപപജ്ജഹം.

൪൨൭. ‘‘ഉപപന്നസ്സ ദേവത്തം, ബ്യമ്ഹം ആസി സുനിമ്മിതം;

സമന്തതോ പജ്ജലതി, ദീപദാനസ്സിദം ഫലം.

൪൨൮. ‘‘സമന്താ യോജനസതം, വിരോചേസിമഹം തദാ;

സബ്ബേ ദേവേ അഭിഭോമി, ദീപദാനസ്സിദം ഫലം.

൪൨൯. ‘‘തിംസകപ്പാനി ദേവിന്ദോ, ദേവരജ്ജമകാരയിം;

ന മം കേചീതിമഞ്ഞന്തി, ദീപദാനസ്സിദം ഫലം.

൪൩൦. ‘‘അട്ഠവീസതിക്ഖത്തുഞ്ച, ചക്കവത്തീ അഹോസഹം;

ദിവാ രത്തിഞ്ച പസ്സാമി, സമന്താ യോജനം തദാ.

൪൩൧. ‘‘സഹസ്സലോകം ഞാണേന, പസ്സാമി സത്ഥു സാസനേ;

ദിബ്ബചക്ഖുമനുപ്പത്തോ, ദീപദാനസ്സിദം ഫലം.

൪൩൨. ‘‘സുമേധോ നാമ സമ്ബുദ്ധോ, തിംസകപ്പസഹസ്സിതോ;

തസ്സ ദീപോ മയാ ദിന്നോ, വിപ്പസന്നേന ചേതസാ.

൪൩൩. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ അനുരുദ്ധോ ഥേരോ ഇമാ ഗാഥായോ അഭാസിത്ഥാതി.

അനുരുദ്ധത്ഥേരസ്സാപദാനം ചതുത്ഥം.