൩-൧൦. ആനന്ദത്ഥേരഅപദാനം

൬൪൪. ‘‘ആരാമദ്വാരാ നിക്ഖമ്മ, പദുമുത്തരോ മഹാമുനി;

വസ്സേന്തോ അമതം വുട്ഠിം, നിബ്ബാപേസി മഹാജനം.

൬൪൫. ‘‘സതസഹസ്സം തേ ധീരാ, ഛളഭിഞ്ഞാ മഹിദ്ധികാ;

പരിവാരേന്തി സമ്ബുദ്ധം, ഛായാവ അനപായിനീ [അനുപായിനീ (സ്യാ. ക.)].

൬൪൬. ‘‘ഹത്ഥിക്ഖന്ധഗതോ ആസിം, സേതച്ഛത്തം വരുത്തമം;

സുചാരുരൂപം ദിസ്വാന, വിത്തി മേ ഉദപജ്ജഥ.

൬൪൭. ‘‘ഓരുയ്ഹ ഹത്ഥിഖന്ധമ്ഹാ, ഉപഗച്ഛിം നരാസഭം;

രതനാമയഛത്തം മേ, ബുദ്ധസേട്ഠസ്സ ധാരയിം.

൬൪൮. ‘‘മമ സങ്കപ്പമഞ്ഞായ, പദുമുത്തരോ മഹാഇസി;

തം കഥം ഠപയിത്വാന, ഇമാ ഗാഥാ അഭാസഥ.

൬൪൯. ‘‘‘യോ സോ ഛത്തമധാരേസി, സോണ്ണാലങ്കാരഭൂസിതം;

തമഹം കിത്തയിസ്സാമി, സുണോഥ മമ ഭാസതോ.

൬൫൦. ‘‘‘ഇതോ ഗന്ത്വാ അയം പോസോ, തുസിതം ആവസിസ്സതി;

അനുഭോസ്സതി സമ്പത്തിം, അച്ഛരാഹി പുരക്ഖതോ.

൬൫൧. ‘‘‘ചതുത്തിംസതിക്ഖത്തുഞ്ച, ദേവരജ്ജം കരിസ്സതി;

ബലാധിപോ അട്ഠസതം, വസുധം ആവസിസ്സതി.

൬൫൨. ‘‘‘അട്ഠപഞ്ഞാസക്ഖത്തുഞ്ച, ചക്കവത്തീ ഭവിസ്സതി;

പദേസരജ്ജം വിപുലം, മഹിയാ കാരയിസ്സതി.

൬൫൩. ‘‘‘കപ്പസതസഹസ്സമ്ഹി, ഓക്കാകകുലസമ്ഭവോ;

ഗോതമോ നാമ ഗോത്തേന, സത്ഥാ ലോകേ ഭവിസ്സതി.

൬൫൪. ‘‘‘സക്യാനം കുലകേതുസ്സ, ഞാതിബന്ധു ഭവിസ്സതി;

ആനന്ദോ നാമ നാമേന, ഉപട്ഠാകോ മഹേസിനോ.

൬൫൫. ‘‘‘ആതാപീ നിപകോ ചാപി, ബാഹുസച്ചേ സുകോവിദോ;

നിവാതവുത്തി അത്ഥദ്ധോ, സബ്ബപാഠീ ഭവിസ്സതി.

൬൫൬. ‘‘‘പധാനപഹിതത്തോ സോ, ഉപസന്തോ നിരൂപധി;

സബ്ബാസവേ പരിഞ്ഞായ, നിബ്ബായിസ്സതിനാസവോ.

൬൫൭. ‘‘‘സന്തി ആരഞ്ഞകാ നാഗാ, കുഞ്ജരാ സട്ഠിഹായനാ;

തിധാപഭിന്നാ മാതങ്ഗാ, ഈസാദന്താ ഉരൂള്ഹവാ.

൬൫൮. ‘‘‘അനേകസതസഹസ്സാ, പണ്ഡിതാപി മഹിദ്ധികാ;

സബ്ബേ തേ ബുദ്ധനാഗസ്സ, ന ഹോന്തു പണിധിമ്ഹി തേ’ [ന ഹോന്തി പരിവിമ്ഭിതാ (സ്യാ.), ന ഹോന്തി പണിധിമ്ഹി തേ (ക.)].

൬൫൯. ‘‘ആദിയാമേ നമസ്സാമി, മജ്ഝിമേ അഥ പച്ഛിമേ;

പസന്നചിത്തോ സുമനോ, ബുദ്ധസേട്ഠം ഉപട്ഠഹിം.

൬൬൦. ‘‘ആതാപീ നിപകോ ചാപി, സമ്പജാനോ പതിസ്സതോ;

സോതാപത്തിഫലം പത്തോ, സേഖഭൂമീസു കോവിദോ.

൬൬൧. ‘‘സതസഹസ്സിതോ കപ്പേ, യം കമ്മമഭിനീഹരിം;

താഹം ഭൂമിമനുപ്പത്തോ, ഠിതാ സദ്ധമ്മമാചലാ [ഠിതോ സദ്ധമ്മമാചലോ (സീ.), ഠിതാ സദ്ധാ മഹപ്ഫലാ (സ്യാ.)].

൬൬൨. ‘‘സ്വാഗതം വത മേ ആസി, ബുദ്ധസേട്ഠസ്സ സന്തികേ;

തിസ്സോ വിജ്ജാ അനുപ്പത്താ, കതം ബുദ്ധസ്സ സാസനം.

൬൬൩. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ ആനന്ദോ ഥേരോ ഇമാ ഗാഥായോ അഭാസിത്ഥാതി.

ആനന്ദത്ഥേരസ്സാപദാനം ദസമം.

തസ്സുദ്ദാനം –

ബുദ്ധോ പച്ചേകബുദ്ധോ ച, സാരിപുത്തോ ച കോലിതോ;

കസ്സപോ അനുരുദ്ധോ ച, പുണ്ണത്ഥേരോ ഉപാലി ച.

അഞ്ഞാസികോണ്ഡഞ്ഞോ പിണ്ഡോലോ, രേവതാനന്ദപണ്ഡിതോ;

ഛസതാനി ച പഞ്ഞാസ, ഗാഥായോ സബ്ബപിണ്ഡിതാ.

അപദാനേ ബുദ്ധവഗ്ഗോ പഠമോ.