൩-൯. ഖദിരവനിയരേവതത്ഥേരഅപദാനം

൬൨൮. ‘‘ഗങ്ഗാ ഭാഗീരഥീ നാമ, ഹിമവന്താ പഭാവിതാ;

കുതിത്ഥേ നാവികോ ആസിം, ഓരിമേ ച തരിം [ഓരിമം ച തരേ (സ്യാ.)] അഹം.

൬൨൯. ‘‘പദുമുത്തരോ നായകോ, സമ്ബുദ്ധോ ദ്വിപദുത്തമോ;

വസീ സതസഹസ്സേഹി, ഗങ്ഗാതീരമുപാഗതോ [പുബ്ബേ മയ്ഹം സുതം ആസി,§‘‘പദുമുത്തരനായകോ; വസീസതസഹസ്സേഹി, ഗങ്ഗാസോതം തരിസ്സതി‘‘; (സീ.)].

൬൩൦. ‘‘ബഹൂ നാവാ സമാനേത്വാ, വഡ്ഢകീഹി [ചമ്മകേഹി (ക.)] സുസങ്ഖതം;

നാവായ [നാവാനം (ക.)] ഛദനം കത്വാ, പടിമാനിം നരാസഭം.

൬൩൧. ‘‘ആഗന്ത്വാന ച സമ്ബുദ്ധോ, ആരൂഹി തഞ്ച നാവകം;

വാരിമജ്ഝേ ഠിതോ സത്ഥാ, ഇമാ ഗാഥാ അഭാസഥ.

൬൩൨. ‘‘‘യോ സോ താരേസി സമ്ബുദ്ധം, സങ്ഘഞ്ചാപി അനാസവം;

തേന ചിത്തപ്പസാദേന, ദേവലോകേ രമിസ്സതി.

൬൩൩. ‘‘‘നിബ്ബത്തിസ്സതി തേ ബ്യമ്ഹം, സുകതം നാവസണ്ഠിതം;

ആകാസേ പുപ്ഫഛദനം, ധാരയിസ്സതി സബ്ബദാ.

൬൩൪. ‘‘‘അട്ഠപഞ്ഞാസകപ്പമ്ഹി, താരകോ [താരണോ (സ്യാ.)] നാമ ഖത്തിയോ;

ചാതുരന്തോ വിജിതാവീ, ചക്കവത്തീ ഭവിസ്സതി.

൬൩൫. ‘‘‘സത്തപഞ്ഞാസകപ്പമ്ഹി, ചമ്മകോ [ചമ്പകോ (സീ.), ചമ്ബകോ (സ്യാ.)] നാമ ഖത്തിയോ;

ഉഗ്ഗച്ഛന്തോവ സൂരിയോ, ജോതിസ്സതി മഹബ്ബലോ.

൬൩൬. ‘‘‘കപ്പസതസഹസ്സമ്ഹി, ഓക്കാകകുലസമ്ഭവോ;

ഗോതമോ നാമ ഗോത്തേന, സത്ഥാ ലോകേ ഭവിസ്സതി.

൬൩൭. ‘‘‘തിദസാ സോ ചവിത്വാന, മനുസ്സത്തം ഗമിസ്സതി;

രേവതോ നാമ നാമേന, ബ്രഹ്മബന്ധു ഭവിസ്സതി.

൬൩൮. ‘‘‘അഗാരാ നിക്ഖമിത്വാന, സുക്കമൂലേന ചോദിതോ;

ഗോതമസ്സ ഭഗവതോ, സാസനേ പബ്ബജിസ്സതി.

൬൩൯. ‘‘‘സോ പച്ഛാ പബ്ബജിത്വാന, യുത്തയോഗോ വിപസ്സകോ;

സബ്ബാസവേ പരിഞ്ഞായ, നിബ്ബായിസ്സതിനാസവോ’.

൬൪൦. ‘‘വീരിയം [വിരിയം (സീ. സ്യാ.)] മേ ധുരധോരയ്ഹം, യോഗക്ഖേമാധിവാഹനം;

ധാരേമി അന്തിമം ദേഹം, സമ്മാസമ്ബുദ്ധസാസനേ.

൬൪൧. ‘‘സതസഹസ്സേ കതം കമ്മം, ഫലം ദസ്സേസി മേ ഇധ;

സുമുത്തോ സരവേഗോവ, കിലേസേ ഝാപയീ മമ.

൬൪൨. ‘‘തതോ മം വനനിരതം, ദിസ്വാ ലോകന്തഗൂ മുനി;

വനവാസിഭിക്ഖൂനഗ്ഗം, പഞ്ഞപേസി മഹാമതി.

൬൪൩. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ ഖദിരവനിയോ രേവതോ ഥേരോ ഇമാ ഗാഥായോ അഭാസിത്ഥാതി.

ഖദിരവനിയരേവതത്ഥേരസ്സാപദാനം നവമം.