൭. ജാലിയസുത്തം

ദ്വേപബ്ബജിതവത്ഥു

൩൭൮. ഏവം മേ സുതം – ഏകം സമയം ഭഗവാ കോസമ്ബിയം വിഹരതി ഘോസിതാരാമേ. തേന ഖോ പന സമയേന ദ്വേ പബ്ബജിതാ – മുണ്ഡിയോ ച പരിബ്ബാജകോ ജാലിയോ ച ദാരുപത്തികന്തേവാസീ യേന ഭഗവാ തേനുപസങ്കമിംസു; ഉപസങ്കമിത്വാ ഭഗവതാ സദ്ധിം സമ്മോദിംസു. സമ്മോദനീയം കഥം സാരണീയം വീതിസാരേത്വാ ഏകമന്തം അട്ഠംസു. ഏകമന്തം ഠിതാ ഖോ തേ ദ്വേ പബ്ബജിതാ ഭഗവന്തം ഏതദവോചും – ‘‘കിം നു ഖോ, ആവുസോ ഗോതമ, തം ജീവം തം സരീരം, ഉദാഹു അഞ്ഞം ജീവം അഞ്ഞം സരീര’’ന്തി?

൩൭൯. ‘‘തേന ഹാവുസോ, സുണാഥ സാധുകം മനസി കരോഥ; ഭാസിസ്സാമീ’’തി. ‘‘ഏവമാവുസോ’’തി ഖോ തേ ദ്വേ പബ്ബജിതാ ഭഗവതോ പച്ചസ്സോസും. ഭഗവാ ഏതദവോച – ‘‘ഇധാവുസോ, തഥാഗതോ ലോകേ ഉപ്പജ്ജതി അരഹം, സമ്മാസമ്ബുദ്ധോ…പേ… (യഥാ ൧൯൦-൨൧൨ അനുച്ഛേദേസു ഏവം വിത്ഥാരേതബ്ബം). ഏവം ഖോ, ആവുസോ, ഭിക്ഖു സീലസമ്പന്നോ ഹോതി…പേ… പഠമം ഝാനം ഉപസമ്പജ്ജ വിഹരതി. യോ ഖോ, ആവുസോ, ഭിക്ഖു ഏവം ജാനാതി ഏവം പസ്സതി, കല്ലം നു ഖോ തസ്സേതം വചനായ – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാതി. യോ സോ, ആവുസോ, ഭിക്ഖു ഏവം ജാനാതി ഏവം പസ്സതി, കല്ലം തസ്സേതം വചനായ – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാതി. അഹം ഖോ പനേതം, ആവുസോ, ഏവം ജാനാമി ഏവം പസ്സാമി. അഥ ച പനാഹം ന വദാമി – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാ…പേ… ദുതിയം ഝാനം…പേ… തതിയം ഝാനം…പേ… ചതുത്ഥം ഝാനം ഉപസമ്പജ്ജ വിഹരതി. യോ ഖോ, ആവുസോ, ഭിക്ഖു ഏവം ജാനാതി ഏവം പസ്സതി, കല്ലം നു ഖോ തസ്സേതം വചനായ – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാതി? യോ സോ, ആവുസോ, ഭിക്ഖു ഏവം ജാനാതി ഏവം പസ്സതി കല്ലം, തസ്സേതം വചനായ – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാതി. അഹം ഖോ പനേതം, ആവുസോ, ഏവം ജാനാമി ഏവം പസ്സാമി. അഥ ച പനാഹം ന വദാമി – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാ…പേ… ഞാണദസ്സനായ ചിത്തം അഭിനീഹരതി അഭിനിന്നാമേതി…പേ… യോ ഖോ, ആവുസോ, ഭിക്ഖു ഏവം ജാനാതി ഏവം പസ്സതി, കല്ലം നു ഖോ തസ്സേതം വചനായ – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാതി. യോ സോ, ആവുസോ, ഭിക്ഖു ഏവം ജാനാതി ഏവം പസ്സതി കല്ലം തസ്സേതം വചനായ – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാതി. അഹം ഖോ പനേതം, ആവുസോ, ഏവം ജാനാമി ഏവം പസ്സാമി. അഥ ച പനാഹം ന വദാമി – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാ…പേ….

൩൮൦. …പേ… നാപരം ഇത്ഥത്തായാതി പജാനാതി. യോ ഖോ, ആവുസോ, ഭിക്ഖു ഏവം ജാനാതി ഏവം പസ്സതി, കല്ലം നു ഖോ തസ്സേതം വചനായ – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാതി? യോ സോ, ആവുസോ, ഭിക്ഖു ഏവം ജാനാതി ഏവം പസ്സതി, ന കല്ലം തസ്സേതം വചനായ – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാതി. അഹം ഖോ പനേതം, ആവുസോ, ഏവം ജാനാമി ഏവം പസ്സാമി. അഥ ച പനാഹം ന വദാമി – ‘തം ജീവം തം സരീര’ന്തി വാ ‘അഞ്ഞം ജീവം അഞ്ഞം സരീര’ന്തി വാ’’തി. ഇദമവോച ഭഗവാ. അത്തമനാ തേ ദ്വേ പബ്ബജിതാ ഭഗവതോ ഭാസിതം അഭിനന്ദുന്തി.

ജാലിയസുത്തം നിട്ഠിതം സത്തമം.