ആപത്തിസമുട്ഠാനവണ്ണനാ

൪൭൦. അചിത്തകോ ആപജ്ജതീതിആദീസു സഹസേയ്യാദിപണ്ണത്തിവജ്ജം അസഞ്ചിച്ച ആപജ്ജന്തോ അചിത്തകോ ആപജ്ജതി, ദേസേന്തോ സചിത്തകോ വുട്ഠാതി. യംകിഞ്ചി സഞ്ചിച്ച ആപജ്ജന്തോ സചിത്തകോ ആപജ്ജതി, തിണവത്ഥാരകേന വുട്ഠഹന്തോ അചിത്തകോ വുട്ഠാതി. പുബ്ബേ വുത്തമേവ തിണവത്ഥാരകേന വുട്ഠഹന്തോ അചിത്തകോ ആപജ്ജതി, അചിത്തകോ വുട്ഠാതി. ഇതരം ദേസേന്തോ സചിത്തകോ ആപജ്ജതി, സചിത്തകോ വുട്ഠാതി. ‘‘ധമ്മദാനം കരോമീ’’തി പദസോധമ്മാദീനി കരോന്തോ കുസലചിത്തോ ആപജ്ജതി, ‘‘ബുദ്ധാനം അനുസാസനിം കരോമീ’’തി ഉദഗ്ഗചിത്തോ ദേസേന്തോ കുസലചിത്തോ വുട്ഠാതി. ദോമനസ്സികോ ഹുത്വാ ദേസേന്തോ അകുസലചിത്തോ വുട്ഠാതി, തിണവത്ഥാരകേന നിദ്ദാഗതോവ വുട്ഠഹന്തോ അബ്യാകതചിത്തോ വുട്ഠാതി. ഭിംസാപനാദീനി കത്വാ ‘‘ബുദ്ധാനം സാസനം കരോമീ’’തി സോമനസ്സികോ ദേസേന്തോ അകുസലചിത്തോ ആപജ്ജതി, കുസലചിത്തോ വുട്ഠാതി. ദോമനസ്സികോവ ദേസേന്തോ അകുസലചിത്തോ വുട്ഠാതി, വുത്തനയേനേവ തിണവത്ഥാരകേന വുട്ഠഹന്തോ അബ്യാകതചിത്തോ വുട്ഠാതി. നിദ്ദോക്കന്തസമയേ സഹഗാരസേയ്യം ആപജ്ജന്തോ അബ്യാകതചിത്തോ ആപജ്ജതി, വുത്തനയേനേവ പനേത്ഥ ‘‘കുസലചിത്തോ വുട്ഠാതീ’’തിആദി വേദിതബ്ബം.

പഠമം പാരാജികം കതിഹി സമുട്ഠാനേഹീതിആദി പുബ്ബേ വുത്തനയത്താ ഉത്താനമേവ.

൪൭൩. ചത്താരോ പാരാജികാ കതിഹി സമുട്ഠാനേഹീതിആദീസു ഉക്കട്ഠപരിച്ഛേദതോ യം യം സമുട്ഠാനം യസ്സ യസ്സ ലബ്ഭതി, തം സബ്ബം വുത്തമേവ ഹോതി.

ആപത്തിസമുട്ഠാനവണ്ണനാ നിട്ഠിതാ.