൪. പുരാണചീവരസിക്ഖാപദവണ്ണനാ

൫൦൩-൫. തേന സമയേനാതി പുരാണചീവരസിക്ഖാപദം. തത്ഥ യാവ സത്തമാ പിതാമഹയുഗാതി പിതുപിതാ പിതാമഹോ, പിതാമഹസ്സ യുഗം പിതാമഹയുഗം. യുഗന്തി ആയുപ്പമാണം വുച്ചതി. അഭിലാപ മത്തമേവ ചേതം. അത്ഥതോ പന പിതാമഹോയേവ പിതാമഹയുഗം. തതോ ഉദ്ധം സബ്ബേപി പുബ്ബപുരിസാ പിതാമഹഗ്ഗഹണേനേവ ഗഹിതാ. ഏവം യാവ സത്തമോ പുരിസോ താവ യാ അസമ്ബദ്ധാ സാ യാവ സത്തമാ പിതാമഹയുഗാ അസമ്ബദ്ധാതി വുച്ചതി. ദേസനാമുഖമേവ ചേതം. ‘‘മാതിതോ വാ പിതിതോ വാ’’തിവചനതോ പന പിതാമഹയുഗമ്പി പിതാമഹിയുഗമ്പി മാതാമഹയുഗമ്പി മാതാമഹിയുഗമ്പി തേസം ഭാതുഭഗിനീഭാഗിനേയ്യപുത്തപപുത്താദയോപി സബ്ബേ ഇധ സങ്ഗഹിതാ ഏവാതി വേദിതബ്ബാ.

തത്രായം വിത്ഥാരനയോ – പിതാ പിതുപിതാ തസ്സ പിതാ തസ്സാപി പിതാതി ഏവം യാവ സത്തമാ യുഗാ, പിതാ പിതുമാതാ തസ്സാ പിതാ ച മാതാ ച ഭാതാ ച ഭഗിനീ ച പുത്താ ച ധീതരോ ചാതി ഏവമ്പി ഉദ്ധഞ്ച അധോ ച യാവ സത്തമാ യുഗാ, പിതാ പിതുഭാതാ പിതുഭഗിനീ പിതുപുത്താ പിതുധീതരോ തേസമ്പി പുത്തധീതുപരമ്പരാതി ഏവമ്പി യാവ സത്തമാ യുഗാ, മാതാ മാതുമാതാ തസ്സാ മാതാ തസ്സാപി മാതാതി ഏവമ്പി യാവ സത്തമാ യുഗാ, മാതാ മാതുപിതാ തസ്സ മാതാ ച പിതാ ച ഭാതാ ച ഭഗിനീ ച പുത്താ ച ധീതരോ ചാതി, ഏവമ്പി ഉദ്ധഞ്ച അധോ ച യാവ സത്തമാ യുഗാ, മാതാ മാതുഭാതാ മാതുഭഗിനീ മാതുപുത്താ മാതുധീതരോ തേസമ്പി പുത്തധീതുപരമ്പരാതി ഏവമ്പി യാവ സത്തമാ യുഗാ, നേവ മാതുസമ്ബന്ധേന ന പിതുസമ്ബന്ധേന സമ്ബദ്ധാ, അയം അഞ്ഞാതികാ നാമ.

ഉഭതോ സങ്ഘേതി ഭിക്ഖുനിസങ്ഘേ ഞത്തിചതുത്ഥേന ഭിക്ഖുസങ്ഘേ ഞത്തിചതുത്ഥേനാതി അട്ഠവാചികവിനയകമ്മേന ഉപസമ്പന്നാ.

സകിം നിവത്ഥമ്പി സകിം പാരുതമ്പീതി രജിത്വാ കപ്പം കത്വാ ഏകവാരമ്പി നിവത്ഥം വാ പാരുതം വാ. അന്തമസോ പരിഭോഗസീസേന അംസേ വാ മത്ഥകേ വാ കത്വാ മഗ്ഗം ഗതോ ഹോതി, ഉസ്സീസകം വാ കത്വാ നിപന്നോ ഹോതി, ഏതമ്പി പുരാണചീവരമേവ. സചേ പന പച്ചത്ഥരണസ്സ ഹേട്ഠാ കത്വാ നിപജ്ജതി, ഹത്ഥേഹി വാ ഉക്ഖിപിത്വാ ആകാസേ വിതാനം കത്വാ സീസേന അഫുസന്തോ ഗച്ഛതി, അയം പരിഭോഗോ നാമ ന ഹോതീതി കുരുന്ദിയം വുത്തം.

ധോതം നിസ്സഗ്ഗിയന്തി ഏത്ഥ ഏവം ആണത്താ ഭിക്ഖുനീ ധോവനത്ഥായ ഉദ്ധനം സജ്ജേതി, ദാരൂനി സംഹരതി, അഗ്ഗിം കരോതി, ഉദകം ആഹരതി യാവ നം ധോവിത്വാ ഉക്ഖിപതി, താവ ഭിക്ഖുനിയാ പയോഗേ പയോഗേ ഭിക്ഖുസ്സ ദുക്കടം. ധോവിത്വാ ഉക്ഖിത്തമത്തേ നിസ്സഗ്ഗിയം ഹോതി. സചേ ദുദ്ധോതന്തി മഞ്ഞമാനാ പുന സിഞ്ചതി വാ ധോവതി വാ യാവ നിട്ഠാനം ന ഗച്ഛതി താവ പയോഗേ പയോഗേ ദുക്കടം. ഏസ നയോ രജനാകോടനേസു. രജനദോണിയഞ്ഹി രജനം ആകിരിത്വാ യാവ സകിം ചീവരം രജതി, തതോ പുബ്ബേ യംകിഞ്ചി രജനത്ഥായ കരോതി, പച്ഛാ വാ പടിരജതി, സബ്ബത്ഥ പയോഗേ പയോഗേ ഭിക്ഖുസ്സ ദുക്കടം. ഏവം ആകോടനേപി പയോഗോ വേദിതബ്ബോ.

൫൦൬. അഞ്ഞാതികായ അഞ്ഞാതികസഞ്ഞീ പുരാണചീവരം ധോവാപേതീതി നോ ചേപി ‘‘ഇമം ധോവാ’’തി വദതി, അഥ ഖോ ധോവനത്ഥായ കായവികാരം കത്വാ ഹത്ഥേന വാ ഹത്ഥേ ദേതി, പാദമൂലേ വാ ഠപേതി, ഉപരി വാ ഖിപതി, സിക്ഖമാനാസാമണേരീസാമണേരഉപാസകതിത്ഥിയാദീനം വാ ഹത്ഥേ പേസേതി, നദീതിത്ഥേ ധോവന്തിയാ ഉപചാരേ വാ ഖിപതി, അന്തോദ്വാദസഹത്ഥേ ഓകാസേ ഠത്വാ, ധോവാപിതംയേവ ഹോതി. സചേ പന ഉപചാരം മുഞ്ചിത്വാ ഓരതോ ഠപേതി സാ ചേ ധോവിത്വാ ആനേതി, അനാപത്തി. സിക്ഖമാനായ വാ സാമണേരിയാ വാ ഉപാസികായ വാ ഹത്ഥേ ധോവനത്ഥായ ദേതി, സാ ചേ ഉപസമ്പജ്ജിത്വാ ധോവതി, ആപത്തിയേവ. ഉപാസകസ്സ ഹത്ഥേ ദേതി, സോ ചേ ലിങ്ഗേ പരിവത്തേ ഭിക്ഖുനീസു പബ്ബജിത്വാ ഉപസമ്പജ്ജിത്വാ ധോവതി, ആപത്തിയേവ. സാമണേരസ്സ വാ ഭിക്ഖുസ്സ വാ ഹത്ഥേ ദിന്നേപി ലിങ്ഗപരിവത്തനേ ഏസേവ നയോ.

ധോവാപേതി രജാപേതീതിആദീസു ഏകേന വത്ഥുനാ നിസ്സഗ്ഗിയം, ദുതിയേന ദുക്കടം. തീണിപി കാരാപേന്തസ്സ ഏകേന നിസ്സഗ്ഗിയം, സേസേഹി ദ്വേ ദുക്കടാനി. യസ്മാ പനേതാനി ധോവനാദീനി പടിപാടിയാ വാ ഉപ്പടിപാടിയാ വാ കാരേന്തസ്സ മോക്ഖോ നത്ഥി, തസ്മാ ഏത്ഥ തീണി ചതുക്കാനി വുത്താനി. സചേപി ഹി ‘‘ഇമം ചീവരം രജിത്വാ ധോവിത്വാ ആനേഹീ’’തി വുത്തേ സാ ഭിക്ഖുനീ പഠമം ധോവിത്വാ പച്ഛാ രജതി, നിസ്സഗ്ഗിയേന ദുക്കടമേവ. ഏവം സബ്ബേസു വിപരീതവചനേസു നയോ നേതബ്ബോ. സചേ പന ‘‘ധോവിത്വാ ആനേഹീ’’തി വുത്താ ധോവതി ചേവ രജതി ച, ധോവാപനപച്ചയാ ഏവ ആപത്തി, രജനേ അനാപത്തി. ഏവം സബ്ബത്ഥ വുത്താധികകരണേ ‘‘അവുത്താ ധോവതീ’’തി ഇമിനാ ലക്ഖണേന അനാപത്തി വേദിതബ്ബാ. ‘‘ഇമസ്മിം ചീവരേ യം കാതബ്ബം, സബ്ബം തം തുയ്ഹം ഭാരോ’’തി വദന്തോ പന ഏകവാചായ സമ്ബഹുലാ ആപത്തിയോ ആപജ്ജതീതി.

അഞ്ഞാതികായ വേമതികോ അഞ്ഞാതികായ ഞാതികസഞ്ഞീതി ഇമാനിപി പദാനി വുത്താനംയേവ തിണ്ണം ചതുക്കാനം വസേന വിത്ഥാരതോ വേദിതബ്ബാനി.

ഏകതോ ഉപസമ്പന്നായാതി ഭിക്ഖുനീനം സന്തികേ ഉപസമ്പന്നായ ധോവാപേന്തസ്സ ദുക്കടം. ഭിക്ഖൂനം സന്തികേ ഉപസമ്പന്നായ പന യഥാവത്ഥുകമേവ, ഭിക്ഖൂനം സന്തികേ ഉപസമ്പന്നാ നാമ പഞ്ചസതാ സാകിയാനിയോ.

൫൦൭. അവുത്താ ധോവതീതി ഉദ്ദേസായ വാ ഓവാദായ വാ ആഗതാ കിലിന്നം ചീവരം ദിസ്വാ ഠപിതട്ഠാനതോ ഗഹേത്വാ വാ ‘‘ദേഥ, അയ്യ, ധോവിസ്സാമീ’’തി ആഹരാപേത്വാ വാ ധോവതി ചേവ രജതി ച ആകോടേതി ച, അയം അവുത്താ ധോവതി നാമ. യാപി ‘‘ഇമം ചീവരം ധോവാ’’തി ദഹരം വാ സാമണേരം വാ ആണാപേന്തസ്സ ഭിക്ഖുനോ സുത്വാ ‘‘ആഹരഥയ്യ അഹം ധോവിസ്സാമീ’’തി ധോവതി, താവകാലികം വാ ഗഹേത്വാ ധോവിത്വാ രജിത്വാ ദേതി, അയമ്പി അവുത്താ ധോവതി നാമ.

അഞ്ഞം പരിക്ഖാരന്തി ഉപാഹനത്ഥവികപത്തത്ഥവികഅംസബദ്ധകകായബന്ധനമഞ്ചപീഠഭിസിതട്ടികാദിം യംകിഞ്ചി ധോവാപേതി, അനാപത്തി. സേസമേത്ഥ ഉത്താനത്ഥമേവ.

സമുട്ഠാനാദീസു പന ഇദം സിക്ഖാപദം ഛസമുട്ഠാനം, കിരിയം, നോസഞ്ഞാവിമോക്ഖം, അചിത്തകം, പണ്ണത്തിവജ്ജം, കായകമ്മം, വചീകമ്മം, തിചിത്തം, തിവേദനന്തി.

പുരാണചീവരസിക്ഖാപദവണ്ണനാ നിട്ഠിതാ.