൩. തതിയസിക്ഖാപദവണ്ണനാ

൯൪൧. തതിയേ – ഉളാരസമ്ഭാവിതാതി ഉളാരകുലാ പബ്ബജിതത്താ ഗുണേഹി ച ഉളാരത്താ ഉളാരാതി സമ്ഭാവിതാ. ഇസ്സാപകതാതി ഇസ്സായ അപകതാ; അഭിഭൂതാതി അത്ഥോ. സഞ്ഞത്തി ബഹുലാ ഏതാസന്തി സഞ്ഞത്തിബഹുലാ; ദിവസം മഹാജനം സഞ്ഞാപയമാനാതി അത്ഥോ. വിഞ്ഞത്തി ബഹുലാ ഏതാസന്തി വിഞ്ഞത്തിബഹുലാ. വിഞ്ഞത്തീതി ഹേതൂദാഹരണാദീഹി വിവിധേഹി നയേഹി ഞാപനാ വേദിതബ്ബാ, ന യാചനാ.

൯൪൩. ചങ്കമനേ നിവത്തനഗണനായ ആപത്തിയോ വേദിതബ്ബാ. തിട്ഠതി വാതിആദീസു പയോഗഗണനായ. ഉദ്ദിസതി വാതിആദീസു പദാദിഗണനായ. സേസം ഉത്താനമേവ.

തിസമുട്ഠാനം – കിരിയാകിരിയം, സഞ്ഞാവിമോക്ഖം, സചിത്തകം, ലോകവജ്ജം, കായകമ്മം, വചീകമ്മം, അകുസലചിത്തം, ദുക്ഖവേദനന്തി.

തതിയസിക്ഖാപദം.