൫. പഞ്ചമസിക്ഖാപദവണ്ണനാ

൮൫൪. പഞ്ചമേ – ഘരം സോധേന്താതി തേസം കിര ഏതദഹോസി – ‘‘ഥേരിയാ കോചി കായികവാചസികോ വീതിക്കമോ ന ദിസ്സതി, ഘരമ്പി താവ സോധേമാ’’തി, തതോ ഘരം സോധേന്താ നം അദ്ദസംസു.

൮൫൬. അനോവസ്സകം അതിക്കാമേന്തിയാതി പഠമം പാദം അതിക്കാമേന്തിയാ ദുക്കടം, ദുതിയം അതിക്കാമേന്തിയാ പാചിത്തിയം, ഉപചാരാതിക്കമേ ഏസേവ നയോ.

൮൫൮. ഗിലാനായാതി യാ താദിസേന ഗേലഞ്ഞേന ആപുച്ഛിതും ന സക്കോതി. ആപദാസൂതി ഘരേ അഗ്ഗി വാ ഉട്ഠിതോ ഹോതി, ചോരാ വാ; ഏവരൂപേ ഉപദ്ദവേ അനാപുച്ഛാ പക്കമതി, അനാപത്തി. സേസമേത്ഥ ഉത്താനമേവ.

കഥിനസമുട്ഠാനം – കായവാചതോ കായവാചാചിത്തതോ ച സമുട്ഠാതി, കിരിയാകിരിയം, നോസഞ്ഞാവിമോക്ഖം, അചിത്തകം, പണ്ണത്തിവജ്ജം, കായകമ്മം, വചീകമ്മം, തിചിത്തം, തിവേദനന്തി.

പഞ്ചമസിക്ഖാപദം.