൪. പഠമസരണാനിസക്കസുത്തവണ്ണനാ

൧൦൨൦. ചതുത്ഥേ ഇധ മഹാനാമ ഏകച്ചോ പുഗ്ഗലോതി ഇദം ന കേവലം സരണാനി ഏവ അപായതോ മുത്തോ, ഇമേപി പുഗ്ഗലാ മുത്താതി ദസ്സേതും ആരദ്ധം. മത്തസോ നിജ്ഝാനം ഖമന്തീതി പമാണേന ച ഓലോകനം ഖമന്തി. ഇമിനാ ധമ്മാനുസാരിമഗ്ഗട്ഠപുഗ്ഗലം ദസ്സേതി. അഗന്താ നിരയന്തി മഗ്ഗട്ഠപുഗ്ഗലോ ഹി അപായതോ പരിമുത്തോതി വാ പരിമുച്ചിസ്സതീതി വാ വത്തും ന വട്ടതി, പരിമുച്ചതീതി പന വത്തും വട്ടതി. യസ്മാ ച പരിമുച്ചതി, തസ്മാ ഗന്താ നാമ ന ഹോതീതി, ‘‘അഗന്താ’’തി വുത്തോ, ന ഗച്ഛതീതി അത്ഥോ. സദ്ധാമത്തം പേമമത്തന്തി ഇമിനാ സദ്ധാനുസാരിമഗ്ഗട്ഠപുഗ്ഗലം ദസ്സേതി. മഹാസാലാതി സമീപേ ഠിതേവ ചത്താരോ മഹാസാരരുക്ഖേ ദസ്സേന്തോ ആഹ. മരണകാലേ സിക്ഖം സമാദിയീതി മരണസമയേ തീസു സിക്ഖാസു പരിപൂരകാരീ അഹോസീതി ദസ്സേതി.