൯. കുലസുത്തവണ്ണനാ

൩൬൧. നവമേ ദുബ്ഭിക്ഖാതി ദുല്ലഭഭിക്ഖാ. ദ്വീഹിതികാതി ‘‘ജീവിസ്സാമ നു ഖോ ന നു ഖോ’’തി ഏവം പവത്തഈഹിതികാ. ‘‘ദുഹിതികാ’’തിപി പാഠോ. അയമേവ അത്ഥോ. ദുക്ഖാ ഈഹിതി ഏത്ഥ ന സക്കാ കോചി പയോഗോ സുഖേന കാതുന്തി ദുഹിതികാ. തത്ഥ തത്ഥ മതമനുസ്സാനം വിപ്പകിണ്ണാനി സേതാനി അട്ഠികാനി ഏത്ഥാതി സേതട്ഠികാ. സലാകാവുത്താതി സലാകമത്തവുത്താ, യം തത്ഥ വുത്തം വാപിതം, തം സലാകമത്തമേവ അഹോസി, ഫലേ ന ജനയതീതി അത്ഥോ.

ഉഗ്ഗിലിതുന്തി ദ്വേ അന്തേ മോചേത്വാ കഥേതും അസക്കോന്തോ ഉഗ്ഗിലിതും ബഹി നീഹരിതും ന സക്ഖീതി. ഓഗിലിതുന്തി പുച്ഛായ ദോസം ദിസ്വാ ഹാരേതും അസക്കോന്തോ ഓഗിലിതും അന്തോ പവേസേതും ന സക്ഖീതി.

ഇതോ സോ ഗാമണി ഏകനവുതികപ്പേതി ഭഗവാ കഥയമാനോവ യാവ നിക്ഖന്തോ നാസികവാതോ ന പുന പവിസതി, താവതകേന കാലേന ഏകനവുതികപ്പേ അനുസ്സരി ‘‘അത്ഥി നു ഖോ കിഞ്ചി കുലേ പക്കഭിക്ഖാദാനേന ഉപഹതപുബ്ബ’’ന്തി പരിജാനനത്ഥം. അഥേകമ്പി അപസ്സന്തോ ‘‘ഇതോ സോ, ഗാമണീ’’തിആദിമാഹ. ഇദാനി ദാനാദീനം ആനിസംസം കഥേന്തോ അഥ ഖോ യാനി താനി കുലാനി അഡ്ഢാനീതി ധമ്മദേസനം ആരഭി. തത്ഥ ദാനസമ്ഭൂതാനീതി ദാനേന സമ്ഭൂതാനി നിബ്ബത്താനി. സേസപദദ്വയേപി ഏസേവ നയോ. ഏത്ഥ പന സച്ചം നാമ സച്ചവാദിതാ. സാമഞ്ഞം നാമ സേസസീലം. വികിരതീതി അയോഗേന വളഞ്ജേന്തോ വിപ്പകിരതി. വിധമതീതി ധമേന്തോ വിയ നാസേതി. വിദ്ധംസേതീതി നാസേതി. അനിച്ചതാതി ഹുത്വാ അഭാവോ ബഹുനാപി കാലേന സങ്ഗതാനം ഖണേനേവ അന്തരധാനം.