൧൦. മണിചൂളകസുത്തവണ്ണനാ

൩൬൨. ദസമേ തം പരിസം ഏതദവോചാതി തസ്സ കിര ഏവം അഹോസി ‘‘കുലപുത്താ പബ്ബജന്താ പുത്തദാരഞ്ചേവ ജാതരൂപരജതഞ്ച പഹായേവ പബ്ബജന്തി, ന ച സക്കാ യം പഹായ പബ്ബജിതാ, തം തേഹി ഗഹേതു’’ന്തി നയഗ്ഗാഹേ ഠത്വാ ‘‘മാ അയ്യോ’’തിആദിവചനം അവോച. ഏകംസേനേതന്തി ഏതം പഞ്ചകാമഗുണകപ്പനം അസ്സമണധമ്മോ അസക്യപുത്തിയധമ്മോതി ഏകംസേന ധാരേയ്യാസി.

തിണന്തി സേനാസനച്ഛദനതിണം. പരിയേസിതബ്ബന്തി തിണച്ഛദനേ വാ ഇട്ഠകച്ഛദനേ വാ ഗേഹേ പലുജ്ജന്തേ യേഹി തം കാരിതം, തേസം സന്തികം ഗന്ത്വാ ‘‘തുമ്ഹേഹി കാരിതസേനാസനം ഓവസ്സതി, ന സക്കാ തത്ഥ വസിതു’’ന്തി ആചിക്ഖിതബ്ബം. മനുസ്സാ സക്കോന്താ കരിസ്സന്തി, അസക്കോന്താ ‘‘തുമ്ഹേ വഡ്ഢകിം ഗഹേത്വാ കാരാപേഥ, മയം തേ സഞ്ഞാപേസ്സാമാ’’തി വക്ഖന്തി. ഏവം വുത്തേ കാരേത്വാ തേസം ആചിക്ഖിതബ്ബം. മനുസ്സാ വഡ്ഢകീനം ദാതബ്ബം ദസ്സന്തി. സചേ ആവാസസാമികാ നത്ഥി, അഞ്ഞേസമ്പി ഭിക്ഖാചാരവത്തേന ആരോചേത്വാ കാരേതും വട്ടതി. ഇദം സന്ധായ ‘‘പരിയേസിതബ്ബ’’ന്തി വുത്തം.

ദാരുന്തി സേനാസനേ ഗോപാനസിആദീസു പലുജ്ജമാനേസു തദത്ഥായ ദാരും. സകടന്തി ഗിഹിവികതം കത്വാ താവകാലികസകടം. ന കേവലഞ്ച സകടമേവ, അഞ്ഞമ്പി വാസിഫരസുകുദ്ദാലാദിഉപകരണം ഏവം പരിയേസിതും വട്ടതി. പുരിസോതി ഹത്ഥകമ്മവസേന പുരിസോ പരിയേസിതബ്ബോ. യംകിഞ്ചി ഹി പുരിസം ‘‘ഹത്ഥകമ്മം, ആവുസോ, കത്വാ ദസ്സസീ’’തി വത്വാ ‘‘ദസ്സാമി, ഭന്തേ,’’തി വുത്തേ ‘‘ഇദഞ്ചിദഞ്ച കരോഹീ’’തി യം ഇച്ഛതി, തം കാരേതും വട്ടതി. ന ത്വേവാഹം, ഗാമണി, കേനചി പരിയായേനാതി ജാതരൂപരജതം പനാഹം കേനചിപി കാരണേന പരിയേസിതബ്ബന്തി ന വദാമി.