൧൩. പാടലിയസുത്തവണ്ണനാ

൩൬൫. തേരസമേ ദൂതേയ്യാനീതി ദൂതകമ്മാനി പണ്ണാനി ചേവ മുഖസാസനാനി ച. പാണാതിപാതഞ്ചാഹന്തി ഇദം കസ്മാ ആരദ്ധം? ന കേവലം അഹം മായം ജാനാമി, അഞ്ഞമ്പി ഇദഞ്ചിദഞ്ച ജാനാമീതി സബ്ബഞ്ഞുഭാവദസ്സനത്ഥം ആരദ്ധം. സന്തി ഹി, ഗാമണി, ഏകേ സമണബ്രാഹ്മണാതി ഇദം സേസസമണബ്രാഹ്മണാനം ലദ്ധിം ദസ്സേത്വാ തസ്സാ പജഹാപനത്ഥം ആരദ്ധം.

മാലീ കുണ്ഡലീതി മാലായ മാലീ, കുണ്ഡലേഹി കുണ്ഡലീ. ഇത്ഥികാമേഹീതി ഇത്ഥീഹി സദ്ധിം കാമാ ഇത്ഥികാമാ, തേഹി ഇത്ഥികാമേഹി. ആവസഥാഗാരന്തി കുലഘരസ്സ ഏകസ്മിം ഠാനേ ഏകേകസ്സേവ സുഖനിവാസത്ഥായ കതം വാസാഗാരം. തേനാഹം യഥാസത്തി യഥാബലം സംവിഭജാമീതി തസ്സാഹം അത്തനോ സത്തിഅനുരൂപേന ചേവ ബലാനുരൂപേന ച സംവിഭാഗം കരോമി. അലന്തി യുത്തം. കങ്ഖനിയേ ഠാനേതി കങ്ഖിതബ്ബേ കാരണേ. ചിത്തസമാധിന്തി തസ്മിം ധമ്മസമാധിസ്മിം ഠിതോ ത്വം സഹ വിപസ്സനായ ചതുന്നം മഗ്ഗാനം വസേന ചിത്തസമാധിം സചേ പടിലഭേയ്യാസീതി ദസ്സേതി. അപണ്ണകതായ മയ്ഹന്തി അയം പടിപദാ മയ്ഹം അപണ്ണകതായ അനപരാധകതായ ഏവ സംവത്തതീതി അത്ഥോ. കടഗ്ഗാഹോതി ജയഗ്ഗാഹോ.

അയം ഖോ, ഗാമണി, ധമ്മസമാധി, തത്ര ചേ ത്വം ചിത്തസമാധിം പടിലഭേയ്യാസീതി ഏത്ഥ ധമ്മസമാധീതി ദസകുസലകമ്മപഥധമ്മാ, ചിത്തസമാധീതി സഹ വിപസ്സനായ ചത്താരോ മഗ്ഗാ. അഥ വാ ‘‘പാമോജ്ജം ജായതി, പമുദിതസ്സ പീതി ജായതീ’’തി (അ. നി. ൫.൨൬) ഏവം വുത്താ പാമോജ്ജപീതിപസ്സദ്ധിസുഖസമാധിസങ്ഖാതാ പഞ്ച ധമ്മാ ധമ്മസമാധി നാമ, ചിത്തസമാധി പന സഹ വിപസ്സനായ ചത്താരോ മഗ്ഗാവ. അഥ വാ ദസകുസലകമ്മപഥാ ചത്താരോ ബ്രഹ്മവിഹാരാ ചാതി അയം ധമ്മസമാധി നാമ, തം ധമ്മസമാധിം പൂരേന്തസ്സ ഉപ്പന്നാ ചിത്തേകഗ്ഗതാ ചിത്തസമാധി നാമ. ഏവം ത്വം ഇമം കങ്ഖാധമ്മം പജഹേയ്യാസീതി ഏവം ത്വം ഇമസ്മിം വുത്തപ്പഭേദേ ധമ്മസമാധിസ്മിം ഠിതോ സചേ ഏവം ചിത്തസമാധിം പടിലഭേയ്യാസി, ഏകംസേനേതം കങ്ഖം പജഹേയ്യാസീതി അത്ഥോ. സേസം സബ്ബത്ഥ വുത്തനയമേവാതി.

ഗാമണിസംയുത്തവണ്ണനാ നിട്ഠിതാ.