൯. അസങ്ഖതസംയുത്തം

൧. പഠമവഗ്ഗോ

൧-൧൧. കായഗതാസതിസുത്താദിവണ്ണനാ

൩൬൬-൩൭൬. അസങ്ഖതസംയുത്തേ അസങ്ഖതന്തി അകതം. ഹിതേസിനാതി ഹിതം ഏസന്തേന. അനുകമ്പകേനാതി അനുകമ്പമാനേന. അനുകമ്പം ഉപാദായാതി അനുകമ്പം ചിത്തേന പരിഗ്ഗഹേത്വാ, പടിച്ചാതിപി വുത്തം ഹോതി. കതം വോ തം മയാതി തം മയാ ഇമം അസങ്ഖതഞ്ച അസങ്ഖതമഗ്ഗഞ്ച ദേസേന്തേന തുമ്ഹാകം കതം. ഏത്തകമേവ ഹി അനുകമ്പകസ്സ സത്ഥു കിച്ചം, യദിദം അവിപരീതധമ്മദേസനാ. ഇതോ പരം പന പടിപത്തി നാമ സാവകാനം കിച്ചം. തേനാഹ ഏതാനി, ഭിക്ഖവേ, രുക്ഖമൂലാനി…പേ… അമ്ഹാകം അനുസാസനീതി ഇമിനാ രുക്ഖമൂലസേനാസനം ദസ്സേതി. സുഞ്ഞാഗാരാനീതി ഇമിനാ ജനവിവിത്തം ഠാനം. ഉഭയേന ച യോഗാനുരൂപം സേനാസനം ആചിക്ഖതി, ദായജ്ജം നിയ്യാതേതി.

ഝായഥാതി ആരമ്മണൂപനിജ്ഝാനേന അട്ഠതിംസാരമ്മണാനി, ലക്ഖണൂപനിജ്ഝാനേന ച അനിച്ചാദിതോ ഖന്ധായതനാദീനി ഉപനിജ്ഝായഥ, സമഥഞ്ച വിപസ്സനഞ്ച വഡ്ഢേഥാതി വുത്തം ഹോതി. മാ പമാദത്ഥാതി മാ പമജ്ജിത്ഥ. മാ പച്ഛാ വിപ്പടിസാരിനോ അഹുവത്ഥാതി യേ ഹി പുബ്ബേ ദഹരകാലേ അരോഗകാലേ സത്തസപ്പായാദിസമ്പത്തികാലേ സത്ഥു സമ്മുഖീഭാവകാലേ ച യോനിസോമനസികാരരഹിതാ രത്തിന്ദിവം മങ്കുലഭത്തം ഹുത്വാ സേയ്യസുഖം മിദ്ധസുഖം അനുഭോന്താ പമജ്ജന്തി, തേ പച്ഛാ ജരാകാലേ രോഗകാലേ മരണകാലേ വിപത്തികാലേ സത്ഥു പരിനിബ്ബുതകാലേ ച തം പുബ്ബേ പമാദവിഹാരം അനുസ്സരന്താ സപ്പടിസന്ധികാലകിരിയഞ്ച ഭാരിയം സമ്പസ്സമാനാ വിപ്പടിസാരിനോ ഹോന്തി. തുമ്ഹേ പന താദിസാ മാ അഹുവത്ഥാതി ദസ്സേന്തോ ആഹ ‘‘മാ പച്ഛാ വിപ്പടിസാരിനോ അഹുവത്ഥാ’’തി.

അയം വോ അമ്ഹാകം അനുസാസനീതി അയം അമ്ഹാകം സന്തികാ ‘‘ഝായഥ മാ പമാദത്ഥാ’’തി തുമ്ഹാകം അനുസാസനീ, ഓവാദോതി വുത്തം ഹോതി.

൨. ദുതിയവഗ്ഗോ

൧-൩൩. അസങ്ഖതസുത്താദിവണ്ണനാ

൩൭൭-൪൦൯. കായേ കായാനുപസ്സീതിആദീസു യം വത്തബ്ബം, തം പരതോ വക്ഖാമ.

അനതന്തിആദീസു തണ്ഹാനതിയാ അഭാവേന അനതം. ചതുന്നം ആസവാനം അഭാവേന അനാസവം. പരമത്ഥസച്ചതായ സച്ചം. വട്ടസ്സ പരഭാഗട്ഠേന പാരം. സണ്ഹട്ഠേന നിപുണം. സുട്ഠു ദുദ്ദസതായ സുദുദ്ദസം. ജരായ അജരിതത്താ അജജ്ജരം. ഥിരട്ഠേന ധുവം. അപലുജ്ജനതായ അപലോകിതം. ചക്ഖുവിഞ്ഞാണേന അപസ്സിതബ്ബത്താ അനിദസ്സനം. തണ്ഹാമാനദിട്ഠിപപഞ്ചാനം അഭാവേന നിപ്പപഞ്ചം.

സന്തഭാവട്ഠേന സന്തം. മരണാഭാവേന അമതം. ഉത്തമട്ഠേന പണീതം. സസ്സിരികട്ഠേന സിവം. നിരുപദ്ദവതായ ഖേമം. തണ്ഹാക്ഖയസ്സ പച്ചയത്താ തണ്ഹക്ഖയം.

വിമ്ഹാപനീയട്ഠേന അച്ഛരം പഹരിതബ്ബയുത്തകന്തി അച്ഛരിയം. അഭൂതമേവ ഭൂതം അജാതം ഹുത്വാ അത്ഥീതി വാ അബ്ഭുതം. നിദ്ദുക്ഖത്താ അനീതികം. നിദ്ദുക്ഖസഭാവത്താ അനീതികധമ്മം. വാനാഭാവേന നിബ്ബാനം. ബ്യാബജ്ഝാഭാവേനേവ അബ്യാബജ്ഝം. വിരാഗാധിഗമസ്സ പച്ചയതോ വിരാഗം. പരമത്ഥസുദ്ധിതായ സുദ്ധി. തീഹി ഭവേഹി മുത്തതായ മുത്തി. കാമാലയാനം അഭാവേന അനാലയം. പതിട്ഠട്ഠേന ദീപം. അല്ലീയിതബ്ബയുത്തട്ഠേന ലേണം. തായനട്ഠേന താണം. ഭയസരണട്ഠേന സരണം, ഭയനാസനന്തി അത്ഥോ. പരം അയനം ഗതി പതിട്ഠാതി പരായണം. സേസമേത്ഥ വുത്തനയമേവാതി.

അസങ്ഖതസംയുത്തവണ്ണനാ നിട്ഠിതാ.