൧൨. രാസിയസുത്തവണ്ണനാ

൩൬൪. ദ്വാദസമേ രാസിയോതി രാസിം കത്വാ പഞ്ഹസ്സ പുച്ഛിതത്താ രാസിയോതി ഏവം ധമ്മസങ്ഗാഹകത്ഥേരേഹി ഗഹിതനാമോ. തപസ്സിന്തി തപനിസ്സിതകം. ലൂഖജീവിന്തി ലൂഖജീവികം. അന്താതി കോട്ഠാസാ. ഗാമോതി ഗാമ്മോ. ഗമ്മോതിപി പാഠോ, ഗാമവാസീനം ധമ്മോതി അത്ഥോ. അത്തകിലമഥാനുയോഗോതി അത്തനോ കിലമഥാനുയോഗോ, സരീരദുക്ഖകരണന്തി അത്ഥോ.

കസ്മാ പനേത്ഥ കാമസുഖല്ലികാനുയോഗോ ഗഹിതോ, കസ്മാ അത്തകിലമഥാനുയോഗോ, കസ്മാ മജ്ഝിമാ പടിപദാതി? കാമസുഖല്ലികാനുയോഗോ താവ കാമഭോഗീനം ദസ്സനത്ഥം ഗഹിതോ, അത്തകിലമഥാനുയോഗോ തപനിസ്സിതകാനം, മജ്ഝിമാ പടിപദാ തിണ്ണം നിജ്ജരവത്ഥൂനം ദസ്സനത്ഥം ഗഹിതാ. കിം ഏതേസം ദസ്സനേ പയോജനന്തി? ഇമേ ദ്വേ അന്തേ പഹായ തഥാഗതോ മജ്ഝിമായ പടിപദായ സമ്മാസമ്ബോധിം പത്തോ. സോ കാമഭോഗിനോപി ന സബ്ബേ ഗരഹതി ന പസംസതി, തപനിസ്സിതകേപി ന സബ്ബേ ഗരഹതി ന പസംസതി, ഗരഹിതബ്ബയുത്തകേയേവ ഗരഹതി, പസംസിതബ്ബയുത്തകേ പസംസതീതി ഇമസ്സത്ഥസ്സ പകാസനം ഏതേസം ദസ്സനേ പയോജനന്തി വേദിതബ്ബം.

ഇദാനി തമത്ഥം പകാസേന്തോ തയോ ഖോമേ, ഗാമണി, കാമഭോഗിനോതിആദിമാഹ. തത്ഥ സാഹസേനാതി സാഹസികകമ്മേന. ന സംവിഭജതീതി മിത്തസഹായസന്ദിട്ഠസമ്ഭത്താനം സംവിഭാഗം ന കരോതി. ന പുഞ്ഞാനി കരോതീതി അനാഗതഭവസ്സ പച്ചയഭൂതാനി പുഞ്ഞാനി ന കരോതി. ധമ്മാധമ്മേനാതി ധമ്മേന ച അധമ്മേന ച. ഠാനേഹീതി കാരണേഹി. സച്ഛികരോതീതി കഥം അത്താനം ആതാപേന്തോ പരിതാപേന്തോ സച്ഛികരോതി? ചതുരങ്ഗവീരിയവസേന ച ധുതങ്ഗവസേന ച. തിസ്സോ സന്ദിട്ഠികാ നിജ്ജരാതി ഏത്ഥ ഏകോപി മഗ്ഗോ തിണ്ണം കിലേസാനം നിജ്ജരണതായ തിസ്സോ നിജ്ജരാതി വുത്തോതി.