൭. അനത്തലക്ഖണസുത്തവണ്ണനാ

൫൯. സത്തമേ പഞ്ചവഗ്ഗിയേതി അഞ്ഞാസി കോണ്ഡഞ്ഞത്ഥേരാദികേ പഞ്ച ജനേ പുരാണുപട്ഠാകേ. ആമന്തേസീതി ആസാള്ഹിപുണ്ണമദിവസേ ധമ്മചക്കപ്പവത്തനതോ പട്ഠായ അനുക്കമേന സോതാപത്തിഫലേ പതിട്ഠിതേ ‘‘ഇദാനി നേസം ആസവക്ഖയായ ധമ്മം ദേസേസ്സാമീ’’തി പഞ്ചമിയം പക്ഖസ്സ ആമന്തേസി. ഏതദവോചാതി ഏതം ‘‘രൂപം, ഭിക്ഖവേ, അനത്താ’’തിആദിനയപ്പവത്തം അനത്തലക്ഖണസുത്തം അവോച. തത്ഥ അനത്താതി പുബ്ബേ വുത്തേഹി ചതൂഹി കാരണേഹി അനത്താ. തം കിം മഞ്ഞഥ, ഭിക്ഖവേതി ഇദം കസ്മാ ആരദ്ധം? ഏത്തകേന ഠാനേന അനത്തലക്ഖണമേവ കഥിതം, ന അനിച്ചദുക്ഖലക്ഖണാനി, ഇദാനി താനി ദസ്സേത്വാ സമോധാനേത്വാ തീണിപി ലക്ഖണാനി ദസ്സേതും ഇദമാരദ്ധന്തി വേദിതബ്ബം. തസ്മാതി യസ്മാ ഇമേ പഞ്ചക്ഖന്ധാ അനിച്ചാ ദുക്ഖാ അനത്താ, തസ്മാ. യംകിഞ്ചി രൂപന്തിആദീസു വിത്ഥാരകഥാ വിസുദ്ധിമഗ്ഗേ പഞ്ഞാഭാവനാധികാരേ ഖന്ധനിദ്ദേസേ വുത്താവ. സേസം സബ്ബത്ഥ വുത്താനുസാരേനേവ വേദിതബ്ബം. ഇമസ്മിം പന സുത്തേ അനത്തലക്ഖണമേവ കഥിതന്തി. സത്തമം.