൧.ധാതുനാനത്തസുത്തവണ്ണനാ

൮൫. ധാതുസംയുത്തസ്സ പഠമേ നിസ്സത്തട്ഠസുഞ്ഞതട്ഠസങ്ഖാതേന സഭാവട്ഠേന ധാതൂതി ലദ്ധനാമാനം ധമ്മാനം നാനാസഭാവോ ധാതുനാനത്തം. ചക്ഖുധാതൂതിആദീസു ചക്ഖുപസാദോ ചക്ഖുധാതു, രൂപാരമ്മണം രൂപധാതു, ചക്ഖുപസാദവത്ഥുകം ചിത്തം ചക്ഖുവിഞ്ഞാണധാതു. സോതപസാദോ സോതധാതു, സദ്ദാരമ്മണം സദ്ദധാതു, സോതപസാദവത്ഥുകം ചിത്തം സോതവിഞ്ഞാണധാതു. ഘാനപസാദോ ഘാനധാതു, ഗന്ധാരമ്മണം ഗന്ധധാതു, ഘാനപസാദവത്ഥുകം ചിത്തം ഘാനവിഞ്ഞാണധാതു. ജിവ്ഹാപസാദോ ജിവ്ഹാധാതു, രസാരമ്മണം രസധാതു, ജിവ്ഹാപസാദവത്ഥുകം ചിത്തം ജിവ്ഹാവിഞ്ഞാണധാതു. കായപസാദോ കായധാതു, ഫോട്ഠബ്ബാരമ്മണം ഫോട്ഠബ്ബധാതു, കായപസാദവത്ഥുകം ചിത്തം കായവിഞ്ഞാണധാതു. തിസ്സോ മനോധാതുയോ മനോധാതു, വേദനാദയോ തയോ ഖന്ധാ സുഖുമരൂപാനി നിബ്ബാനഞ്ച ധമ്മധാതു, സബ്ബമ്പി മനോവിഞ്ഞാണം മനോവിഞ്ഞാണധാതൂതി. ഏത്ഥ ച സോളസ ധാതുയോ കാമാവചരാ, അവസാനേ ദ്വേ ചതുഭൂമികാതി. പഠമം.