൧. കോലിതസുത്തവണ്ണനാ

൨൩൫. ഭിക്ഖുസംയുത്തസ്സ പഠമേ, ആവുസോതി സാവകാനം ആലാപോ. ബുദ്ധാ ഹി ഭഗവന്തോ സാവകേ ആലപന്താ, ‘‘ഭിക്ഖവേ’’തി ആലപന്തി, സാവകാ പന ‘‘ബുദ്ധേഹി സദിസാ മാ ഹോമാ’’തി, ‘‘ആവുസോ’’തി പഠമം വത്വാ പച്ഛാ, ‘‘ഭിക്ഖവേ’’തി ഭണന്തി. ബുദ്ധേഹി ച ആലപിതേ ഭിക്ഖുസങ്ഘോ, ‘‘ഭന്തേ’’തി പടിവചനം ദേതി സാവകേഹി, ‘‘ആവുസോ’’തി. അയം വുച്ചതീതി യസ്മാ ദുതിയജ്ഝാനേ വിതക്കവിചാരാ നിരുജ്ഝന്തി, യേസം നിരോധാ സദ്ദായതനം അപ്പവത്തിം ഗച്ഛതി, തസ്മാ യദേതം ദുതിയം ഝാനം നാമ, അയം വുച്ചതി ‘‘അരിയാനം തുണ്ഹീഭാവോ’’തി. അയമേത്ഥ യോജനാ. ‘‘ധമ്മീ വാ കഥാ അരിയോ വാ തുണ്ഹീഭാവോ’’തി ഏത്ഥ പന കമ്മട്ഠാനമനസികാരോപി പഠമജ്ഝാനാദീനിപി അരിയോ തുണ്ഹീഭാവോത്വേവ സങ്ഖം ഗതാനി.

വിതക്കസഹഗതാതി വിതക്കാരമ്മണാ. സഞ്ഞാമനസികാരാതി സഞ്ഞാ ച മനസികാരോ ച. സമുദാചരന്തീതി പവത്തന്തി. ഥേരസ്സ കിര ദുതിയജ്ഝാനം ന പഗുണം. അഥസ്സ തതോ വുട്ഠിതസ്സ വിതക്കവിചാരാ ന സന്തതോ ഉപട്ഠഹിംസു. ഇച്ചസ്സ ദുതിയജ്ഝാനമ്പി സഞ്ഞാമനസികാരാപി ഹാനഭാഗിയാവ അഹേസും, തം ദസ്സേന്തോ ഏവമാഹ. സണ്ഠപേഹീതി സമ്മാ ഠപേഹി. ഏകോദിഭാവം കരോഹീതി ഏകഗ്ഗം കരോഹി. സമാദഹാതി സമ്മാ ആദഹ ആരോപേഹി. മഹാഭിഞ്ഞതന്തി ഛളഭിഞ്ഞതം. സത്ഥാ കിര ഇമിനാ ഉപായേന സത്ത ദിവസേ ഥേരസ്സ ഹാനഭാഗിയം സമാധിം വഡ്ഢേത്വാ ഥേരം ഛളഭിഞ്ഞതം പാപേസി. പഠമം.