൭. നാഗദത്തസുത്തവണ്ണനാ

൨൨൭. സത്തമേ അതികാലേനാതി സബ്ബരത്തിം നിദ്ദായിത്വാ ബലവപച്ചൂസേ കോടിസമ്മുഞ്ജനിയാ ഥോകം സമ്മജ്ജിത്വാ മുഖം ധോവിത്വാ യാഗുഭിക്ഖായ പാതോവ പവിസതി. അതിദിവാതി യാഗും ആദായ ആസനസാലം ഗന്ത്വാ പിവിത്വാ ഏകസ്മിം ഠാനേ നിപന്നോ നിദ്ദായിത്വാ – ‘‘മനുസ്സാനം ഭോജനവേലായ പണീതം ഭിക്ഖം ലഭിസ്സാമീ’’തി ഉപകട്ഠേ മജ്ഝന്ഹികേ ഉട്ഠായ ധമ്മകരണേന ഉദകം ഗഹേത്വാ അക്ഖീനി പമജ്ജിത്വാ പിണ്ഡായ ചരിത്വാ യാവദത്ഥം ഭുഞ്ജിത്വാ മജ്ഝന്ഹികേ വീതിവത്തേ പടിക്കമതി. ദിവാ ച ആഗന്ത്വാതി അതികാലേ പവിട്ഠേന നാമ അഞ്ഞേഹി ഭിക്ഖൂഹി പഠമതരം ആഗന്തബ്ബം ഹോതി, ത്വം പന അതിവിയ ദിവാ ആഗന്ത്വാ ഗതാസീതി അത്ഥോ. ഭായാമി നാഗദത്തന്തി തം നാഗദത്തം അഹം ഭായാമി. സുപ്പഗബ്ഭന്തി സുട്ഠു പഗബ്ഭം. കുലേസൂതി ഖത്തിയകുലാദിഉപട്ഠാകകുലേസു. സത്തമം.