൬. സാരിപുത്തസുത്തവണ്ണനാ

൨൧൪. ഛട്ഠേ പോരിയാതി അക്ഖരാദിപരിപുണ്ണായ. വിസ്സട്ഠായാതി അവിബദ്ധായ അപലിബുദ്ധായ. ധമ്മസേനാപതിസ്സ ഹി കഥേന്തസ്സ പിത്താദീനം വസേന അപലിബുദ്ധവചനം ഹോതി, അയദണ്ഡേന പഹതകംസതാലതോ സദ്ദോ വിയ നിച്ഛരതി. അനേലഗലായാതി അനേലായ അഗലായ നിദ്ദോസായ ചേവ അക്ഖലിതപദബ്യഞ്ജനായ ച. ഥേരസ്സ ഹി കഥയതോ പദം വാ ബ്യഞ്ജനം വാ ന പരിഹായതി. അത്ഥസ്സ വിഞ്ഞാപനിയാതി അത്ഥസ്സ വിഞ്ഞാപനസമത്ഥായ. ഭിക്ഖുനന്തി ഭിക്ഖൂനം.

സംഖിത്തേനപീതി ‘‘ചത്താരിമാനി, ആവുസോ, അരിയസച്ചാനി. കതമാനി ചത്താരി? ദുക്ഖം അരിയസച്ചം…പേ… ഇമാനി ഖോ, ആവുസോ, ചത്താരി അരിയസച്ചാനി, തസ്മാതിഹ, ആവുസോ, ഇദം ദുക്ഖം അരിയസച്ചന്തി യോഗോ കരണീയോ’’തി (സം. നി. ൫.൧൦൯൬-൧൦൯൮) ഏവം സംഖിത്തേനപി ദേസേതി. വിത്ഥാരേനപീതി ‘‘കതമം, ആവുസോ, ദുക്ഖം അരിയസച്ച’’ന്തിആദിനാ (മ. നി. ൩.൩൭൩) നയേന താനേവ വിഭജന്തോ വിത്ഥാരേനപി ഭാസതി. ഖന്ധാദിദേസനാസുപി ഏസേവ നയോ. സാളികായിവ നിഗ്ഘോസോതി യഥാ മധുരം അമ്ബപക്കം സായിത്വാ പക്ഖേഹി വാതം ദത്വാ മധുരസ്സരം നിച്ഛാരേന്തിയാ സാളികസകുണിയാ നിഗ്ഘോസോ, ഏവം ഥേരസ്സ ധമ്മം കഥേന്തസ്സ മധുരോ നിഗ്ഘോസോ ഹോതി. പടിഭാനം ഉദീരയീതി സമുദ്ദതോ ഊമിയോ വിയ അനന്തം പടിഭാനം ഉട്ഠഹതി. ഓധേന്തീതി ഓദഹന്തി. ഛട്ഠം.