൧. സനങ്കുമാരസുത്തവണ്ണനാ

൧൮൨. ദുതിയവഗ്ഗസ്സ പഠമേ സപ്പിനീതീരേതി സപ്പിനീനാമികായ നദിയാ തീരേ. സനങ്കുമാരോതി സോ കിര പഞ്ചസിഖകുമാരകകാലേ ഝാനം ഭാവേത്വാ ബ്രഹ്മലോകേ നിബ്ബത്തോ കുമാരകവണ്ണേനേവ വിചരതി. തേന നം ‘‘കുമാരോ’’തി സഞ്ജാനന്തി, പോരാണകത്താ പന ‘‘സനങ്കുമാരോ’’തി വുച്ചതി. ജനേതസ്മിന്തി ജനിതസ്മിം, പജായാതി അത്ഥോ. യേ ഗോത്തപടിസാരിനോതി യേ ജനേതസ്മിം ഗോത്തം പടിസരന്തി തേസു ലോകേ ഗോത്തപടിസാരീസു ഖത്തിയോ സേട്ഠോ. വിജ്ജാചരണസമ്പന്നോതി ഭയഭേരവസുത്തപരിയായേന (മ. നി. ൧.൩൪ ആദയോ) പുബ്ബേനിവാസാദീഹി വാ തീഹി, അമ്ബട്ഠസുത്തപരിയായേന (ദീ. നി. ൧.൨൭൮ ആദയോ) വിപസ്സനാഞാണം മനോമയിദ്ധി ഛ അഭിഞ്ഞായോതി ഇമാഹി വാ അട്ഠഹി വിജ്ജാഹി, സീലേസു പരിപൂരകാരിതാ ഇന്ദ്രിയേസു ഗുത്തദ്വാരതാ ഭോജനേ മത്തഞ്ഞുതാ ജാഗരിയാനുയോഗോ സത്ത സദ്ധമ്മാ ചത്താരി രൂപാവചരജ്ഝാനാനീതി ഏവം പന്നരസധമ്മഭേദേന ചരണേന ച സമന്നാഗതോ. സോ സേട്ഠോ ദേവമാനുസേതി സോ ഖീണാസവബ്രാഹ്മണോ ദേവേസു ച മനുസ്സേസു ച സേട്ഠോ ഉത്തമോതി. പഠമം.