൬. നജീരതിസുത്തവണ്ണനാ

൭൬. ഛട്ഠേ നാമഗോത്തം ന ജീരതീതി അതീതബുദ്ധാനം യാവജ്ജദിവസാ നാമഗോത്തം കഥിയതി, തസ്മാ ന ജീരതീതി വുച്ചതി. പോരാണാ പന ‘‘അദ്ധാനേ ഗച്ഛന്തേ ന പഞ്ഞായിസ്സതി, ജീരണസഭാവോ പന ന ഹോതിയേവാ’’തി വദന്തി. ആലസ്യന്തി ആലസിയം, യേന ഠിതട്ഠാനേ ഠിതോവ, നിസിന്നട്ഠാനേ നിസിന്നോവ ഹോതി, തേലേപി ഉത്തരന്തേ ഠിതിം ന കരോതി. പമാദോതി നിദ്ദായ വാ കിലേസവസേന വാ പമാദോ. അനുട്ഠാനന്തി കമ്മസമയേ കമ്മകരണവീരിയാഭാവോ. അസംയമോതി സീലസഞ്ഞമാഭാവോ വിസ്സട്ഠാചാരതാ. നിദ്ദാതി സോപ്പബഹുലതാ. തായ ഗച്ഛന്തോപി ഠിതോപി നിസിന്നോപി നിദ്ദായതി, പഗേവ നിപന്നോ. തന്ദീതി അതിച്ഛാതാദിവസേന ആഗന്തുകാലസിയം. തേ ഛിദ്ദേതി താനി ഛ ഛിദ്ദാനി വിവരാനി. സബ്ബസോതി സബ്ബാകാരേന. തന്തി നിപാതമത്തം. വിവജ്ജയേതി വജ്ജേയ്യ ജഹേയ്യ. ഛട്ഠം.