൭. അദ്ധവഗ്ഗോ

൧. നാമസുത്തവണ്ണനാ

൬൧. അദ്ധവഗ്ഗസ്സ പഠമേ നാമം സബ്ബം അദ്ധഭവീതി നാമം സബ്ബം അഭിഭവതി അനുപതതി. ഓപപാതികേന വാ ഹി കിത്തിമേന വാ നാമേന മുത്തോ സത്തോ വാ സങ്ഖാരോ വാ നത്ഥി. യസ്സപി ഹി രുക്ഖസ്സ വാ പാസാണസ്സ വാ ‘‘ഇദം നാമ നാമ’’ന്തി ന ജാനന്തി, അനാമകോത്വേവ തസ്സ നാമം ഹോതി. പഠമം.

൨-൩. ചിത്തസുത്താദിവണ്ണനാ

൬൨. ദുതിയേ സബ്ബേവ വസമന്വഗൂതി യേ ചിത്തസ്സ വസം ഗച്ഛന്തി, തേസംയേവ അനവസേസപരിയാദാനമേതം. ദുതിയം.

൬൩. തതിയേപി ഏസേവ നയോ. തതിയം.

൪-൫. സംയോജനസുത്താദിവണ്ണനാ

൬൪. ചതുത്ഥേ കിം സു സംയോജനോതി കിം സംയോജനോ കിം ബന്ധനോ? വിചാരണന്തി വിചരണാ പാദാനി. ബഹുവചനേ ഏകവചനം കതം. വിതക്കസ്സ വിചാരണന്തി വിതക്കോ തസ്സ പാദാ. ചതുത്ഥം.

൬൫. പഞ്ചമേപി ഏസേവ നയോ. പഞ്ചമം.

൬. അത്തഹതസുത്തവണ്ണനാ

൬൬. ഛട്ഠേ കേനസ്സുബ്ഭാഹതോതി കേന അബ്ഭാഹതോ. സു-കാരോ നിപാതമത്തം. ഇച്ഛാധൂപായിതോതി ഇച്ഛായ ആദിത്തോ. ഛട്ഠം.

൭-൯. ഉഡ്ഡിതസുത്താദിവണ്ണനാ

൬൭. സത്തമേ തണ്ഹായ ഉഡ്ഡിതോതി തണ്ഹായ ഉല്ലങ്ഘിതോ. ചക്ഖുഞ്ഹി തണ്ഹാരജ്ജുനാ ആവുനിത്വാ രൂപനാഗദന്തേ ഉഡ്ഡിതം, സോതാദീനി സദ്ദാദീസൂതി തണ്ഹായ ഉഡ്ഡിതോ ലോകോ. മച്ചുനാ പിഹിതോതി അനന്തരേ അത്തഭാവേ കതം കമ്മം ന ദൂരം ഏകചിത്തന്തരം, ബലവതിയാ പന മാരണന്തികവേദനായ പബ്ബതേന വിയ ഓത്ഥടത്താ സത്താ തം ന ബുജ്ഝന്തീതി ‘‘മച്ചുനാ പിഹിതോ ലോകോ’’തി വുത്തം. സത്തമം.

൬൮. അട്ഠമേ സ്വേവ പഞ്ഹോ ദേവതായ ഹേട്ഠുപരിയായവസേന പുച്ഛിതോ. അട്ഠമം.

൬൯. നവമേ സബ്ബം ഉത്താനമേവ. നവമം.

൧൦. ലോകസുത്തവണ്ണനാ

൭൦. ദസമേ കിസ്മിം ലോകോ സമുപ്പന്നോതി കിസ്മിം ഉപ്പന്നേ ലോകോ ഉപ്പന്നോതി പുച്ഛതി. ഛസൂതി ഛസു അജ്ഝത്തികേസു ആയതനേസു ഉപ്പന്നേസു ഉപ്പന്നോതി വുച്ചതി. ഛസു കുബ്ബതീതി തേസുയേവ ഛസു സന്ഥവം കരോതി. ഉപാദായാതി താനിയേവ ച ഉപാദായ ആഗമ്മ പടിച്ച പവത്തതി. വിഹഞ്ഞതീതി തേസുയേവ ഛസു വിഹഞ്ഞതി പീളിയതി. ഇതി അജ്ഝത്തികായതനവസേന അയം പഞ്ഹോ ആഗതോ, അജ്ഝത്തികബാഹിരാനം പന വസേന ആഹരിതും വട്ടതി. ഛസു ഹി അജ്ഝത്തികായതനേസു ഉപ്പന്നേസു അയം ഉപ്പന്നോ നാമ ഹോതി, ഛസു ബാഹിരേസു സന്ഥവം കരോതി, ഛന്നം അജ്ഝത്തികാനം ഉപാദായ ഛസു ബാഹിരേസു വിഹഞ്ഞതീതി. ദസമം.

അദ്ധവഗ്ഗോ സത്തമോ.