൬. ഛഛക്കസുത്തവണ്ണനാ

൪൨൦. ഏവം മേ സുതന്തി ഛഛക്കസുത്തം. തത്ഥ ആദികല്യാണന്തിആദിമ്ഹി കല്യാണം ഭദ്ദകം നിദ്ദോസം കത്വാ ദേസേസ്സാമി. മജ്ഝപരിയോസാനേസുപി ഏസേവ നയോ. ഇതി ഭഗവാ അരിയവംസം നവഹി, മഹാസതിപട്ഠാനം സത്തഹി, മഹാഅസ്സപുരം സത്തഹിയേവ പദേഹി ഥോമേസി. ഇദം പന സുത്തം നവഹി പദേഹി ഥോമേസി.

വേദിതബ്ബാനീതി സഹവിപസ്സനേന മഗ്ഗേന ജാനിതബ്ബാനി. മനായതനേന തേഭൂമകചിത്തമേവ കഥിതം, ധമ്മായതനേന ബഹിദ്ധാ തേഭൂമകധമ്മാ ച, മനോവിഞ്ഞാണേന ഠപേത്വാ ദ്വേ പഞ്ചവിഞ്ഞാണാനി സേസം ബാവീസതിവിധം ലോകിയവിപാകചിത്തം. ഫസ്സവേദനാ യഥാവുത്തവിപാകവിഞ്ഞാണസമ്പയുത്താവ. തണ്ഹാതി വിപാകവേദനാപച്ചയാ ജവനക്ഖണേ ഉപ്പന്നതണ്ഹാ.

൪൨൨. ചക്ഖു അത്താതി പാടിയേക്കോ അനുസന്ധി. ഹേട്ഠാ കഥിതാനഞ്ഹി ദ്വിന്നം സച്ചാനം അനത്തഭാവദസ്സനത്ഥം അയം ദേസനാ ആരദ്ധാ. തത്ഥ ന ഉപപജ്ജതീതി ന യുജ്ജതി. വേതീതി വിഗച്ഛതി നിരുജ്ഝതി.

൪൨൪. അയം ഖോ പന, ഭിക്ഖവേതി അയമ്പി പാടിയേക്കോ അനുസന്ധി. അയഞ്ഹി ദേസനാ തിണ്ണം ഗാഹാനം വസേന വട്ടം ദസ്സേതും ആരദ്ധാ. ദുക്ഖം സമുദയോതി ദ്വിന്നം സച്ചാനം വസേന വട്ടം ദസ്സേതുന്തിപി വദന്തിയേവ. ഏതം മമാതിആദീസു തണ്ഹാമാനദിട്ഠിഗാഹാവ വേദിതബ്ബാ. സമനുപസ്സതീതി ഗാഹത്തയവസേന പസ്സതി.

ഏവം വട്ടം ദസ്സേത്വാ ഇദാനി തിണ്ണം ഗാഹാനം പടിപക്ഖവസേന, നിരോധോ മഗ്ഗോതി ഇമേസം വാ ദ്വിന്നം സച്ചാനം വസേന വിവട്ടം ദസ്സേതും അയം ഖോ പനാതിആദിമാഹ. നേതം മമാതിആദീനി തണ്ഹാദീനം പടിസേധവചനാനി. സമനുപസ്സതീതി അനിച്ചം ദുക്ഖമനത്താതി പസ്സതി.

൪൨൫. ഏവം വിവട്ടം ദസ്സേത്വാ ഇദാനി തിണ്ണം അനുസയാനം വസേന പുന വട്ടം ദസ്സേതും ചക്ഖുഞ്ച, ഭിക്ഖവേതിആദിമാഹ. തത്ഥ അഭിനന്ദതീതിആദീനി തണ്ഹാദിട്ഠിവസേനേവ വുത്താനി. അനുസേതീതി അപ്പഹീനോ ഹോതി. ദുക്ഖസ്സാതി വട്ടദുക്ഖകിലേസദുക്ഖസ്സ.

൪൨൬. ഏവം തിണ്ണം അനുസയാനം വസേന വട്ടം കഥേത്വാ ഇദാനി തേസം പടിക്ഖേപവസേന വിവട്ടം ദസ്സേന്തോ പുന ചക്ഖുഞ്ചാതിആദിമാഹ. അവിജ്ജം പഹായാതി വട്ടമൂലികം അവിജ്ജം പജഹിത്വാ. വിജ്ജന്തി അരഹത്തമഗ്ഗവിജ്ജം ഉപ്പാദേത്വാ.

൪൨൭. ഠാനമേതം വിജ്ജതീതി ഏത്തകേനേവ കഥാമഗ്ഗേന വട്ടവിവട്ടവസേന ദേസനം മത്ഥകം പാപേത്വാ പുന തദേവ സമ്പിണ്ഡേത്വാ ദസ്സേന്തോ ഏവം പസ്സം, ഭിക്ഖവേതിആദിമാഹ. സട്ഠിമത്താനം ഭിക്ഖൂനന്തി ഏത്ഥ അനച്ഛരിയമേതം, യം സയമേവ തഥാഗതേ ദേസേന്തേ സട്ഠി ഭിക്ഖൂ അരഹത്തം പത്താ. ഇമഞ്ഹി സുത്തം ധമ്മസേനാപതിമ്ഹി കഥേന്തേപി സട്ഠി ഭിക്ഖൂ അരഹത്തം പത്താ, മഹാമോഗ്ഗല്ലാനേ കഥേന്തേപി, അസീതിമഹാഥേരേസു കഥേന്തേസുപി പത്താ ഏവ. ഏതമ്പി അനച്ഛരിയം. മഹാഭിഞ്ഞപ്പത്താ ഹി തേ സാവകാ.

അപരഭാഗേ പന തമ്ബപണ്ണിദീപേ മാലേയ്യദേവത്ഥേരോ നാമ ഹേട്ഠാ ലോഹപാസാദേ ഇദം സുത്തം കഥേസി. തദാപി സട്ഠി ഭിക്ഖൂ അരഹത്തം പത്താ. യഥാ ച ലോഹപാസാദേ, ഏവം ഥേരോ മഹാമണ്ഡപേപി ഇദം സുത്തം കഥേസി. മഹാവിഹാരാ നിക്ഖമിത്വാ ചേതിയപബ്ബതം ഗതോ, തത്ഥാപി കഥേസി. തതോ സാകിയവംസവിഹാരേ, കൂടാലിവിഹാരേ, അന്തരസോബ്ഭേ, മുത്തങ്ഗണേ, വാതകപബ്ബതേ, പാചിനഘരകേ, ദീഘവാപിയം, ലോകന്ദരേ, നോമണ്ഡലതലേ കഥേസി. തേസുപി ഠാനേസു സട്ഠി സട്ഠി ഭിക്ഖൂ അരഹത്തം പത്താ. തതോ നിക്ഖമിത്വാ പന ഥേരോ ചിത്തലപബ്ബതം ഗതോ. തദാ ച ചിത്തലപബ്ബതവിഹാരേ അതിരേകസട്ഠിവസ്സോ മഹാഥേരോ, പോക്ഖരണിയം കുരുവകതിത്ഥം നാമ പടിച്ഛന്നട്ഠാനം അത്ഥി, തത്ഥ ഥേരോ ന്ഹായിസ്സാമീതി ഓതിണ്ണോ. ദേവത്ഥേരോ തസ്സ സന്തികം ഗന്ത്വാ ന്ഹാപേമി, ഭന്തേതി ആഹ. ഥേരോ പടിസന്ഥാരേനേവ – ‘‘മാലേയ്യദേവോ നാമ അത്ഥീതി വദന്തി, സോ അയം ഭവിസ്സതീ’’തി ഞത്വാ ത്വം ദേവോതി ആഹ. ആമ, ഭന്തേതി. സട്ഠിവസ്സദ്ധാനം മേ, ആവുസോ, കോചി സരീരം ഹത്ഥേന ഫുസിതും നാമ ന ലഭി, ത്വം പന ന്ഹാപേഹീതി ഉത്തരിത്വാ തീരേ നിസീദി.

ഥേരോ സബ്ബമ്പി ഹത്ഥപാദാദിപരികമ്മം കത്വാ മഹാഥേരം ന്ഹാപേസി. തം ദിവസഞ്ച ധമ്മസ്സവനദിവസോ ഹോതി. അഥ മഹാഥേരോ – ‘‘ദേവ അമ്ഹാകം ധമ്മദാനം ദാതും വട്ടതീ’’തി ആഹ. ഥേരോ സാധു, ഭന്തേതി സമ്പടിച്ഛി. അത്ഥങ്ഗതേ സൂരിയേ ധമ്മസ്സവനം ഘോസേസും. അതിക്കന്തസട്ഠിവസ്സാവ സട്ഠി മഹാഥേരാ ധമ്മസ്സവനത്ഥം അഗമംസു. ദേവത്ഥേരോ സരഭാണാവസാനേ ഇമം സുത്തം ആരഭി, സുത്തന്തപരിയോസാനേ ച സട്ഠി മഹാഥേരാ അരഹത്തം പാപുണിംസു. തതോ തിസ്സമഹാവിഹാരം ഗന്ത്വാ കഥേസി, തസ്മിമ്പി സട്ഠി ഥേരാ. തതോ നാഗമഹാവിഹാരേ കാളകച്ഛഗാമേ കഥേസി, തസ്മിമ്പി സട്ഠി ഥേരാ. തതോ കല്യാണിം ഗന്ത്വാ തത്ഥ ചാതുദ്ദസേ ഹേട്ഠാപാസാദേ കഥേസി, തസ്മിമ്പി സട്ഠി ഥേരാ. ഉപോസഥദിവസേ ഉപരിപാസാദേ കഥേസി, തസ്മിമ്പി സട്ഠി ഥേരാതി ഏവം ദേവത്ഥേരേയേവ ഇദം സുത്തം കഥേന്തേ സട്ഠിട്ഠാനേസു സട്ഠി സട്ഠി ജനാ അരഹത്തം പത്താ.

അമ്ബിലകാളകവിഹാരേ പന തിപിടകചൂളനാഗത്ഥേരേ ഇമം സുത്തം കഥേന്തേ മനുസ്സപരിസാ ഗാവുതം അഹോസി, ദേവപരിസാ യോജനികാ. സുത്തപരിയോസാനേ സഹസ്സഭിക്ഖൂ അരഹത്തം പത്താ, ദേവേസു പന തതോ തതോ ഏകേകോവ പുഥുജ്ജനോ അഹോസീതി.

പപഞ്ചസൂദനിയാ മജ്ഝിമനികായട്ഠകഥായ

ഛഛക്കസുത്തവണ്ണനാ നിട്ഠിതാ.