൧൦. ചൂളപുണ്ണമസുത്തവണ്ണനാ

൯൧. ഏവം മേ സുതന്തി ചൂളപുണ്ണമസുത്തം. തത്ഥ തുണ്ഹീഭൂതം തുണ്ഹീഭൂതന്തി യം യം ദിസം അനുവിലോകേതി, തത്ഥ തത്ഥ തുണ്ഹീഭൂതമേവ. അനുവിലോകേത്വാതി പഞ്ചപസാദപടിമണ്ഡിതാനി അക്ഖീനി ഉമ്മീലേത്വാ തതോ തതോ വിലോകേത്വാ അന്തമസോ ഹത്ഥകുക്കുച്ചപാദകുക്കുച്ചാനമ്പി അഭാവം ദിസ്വാ. അസപ്പുരിസോതി പാപപുരിസോ. നോ ഹേതം, ഭന്തേതി യസ്മാ അന്ധോ അന്ധം വിയ സോ തം ജാനിതും ന സക്കോതി, തസ്മാ ഏവമാഹംസു. ഏതേനേവ നയേന ഇതോ പരേസുപി വാരേസു അത്ഥോ വേദിതബ്ബോ. അസ്സദ്ധസമന്നാഗതോതി പാപധമ്മസമന്നാഗതോ. അസപ്പുരിസഭത്തീതി അസപ്പുരിസസേവനോ. അസപ്പുരിസചിന്തീതി അസപ്പുരിസചിന്തായ ചിന്തകോ. അസപ്പുരിസമന്തീതി അസപ്പുരിസമന്തനം മന്തേതാ. അസപ്പുരിസവാചോതി അസപ്പുരിസവാചം ഭാസിതാ. അസപ്പുരിസകമ്മന്തോതി അസപ്പുരിസകമ്മാനം കത്താ. അസപ്പുരിസദിട്ഠീതി അസപ്പുരിസദിട്ഠിയാ സമന്നാഗതോ. അസപ്പുരിസദാനന്തി അസപ്പുരിസേഹി ദാതബ്ബം ദാനം. ത്യാസ്സ മിത്താതി തേ അസ്സ മിത്താ. അത്തബ്യാബാധായപി ചേതേതീതി പാണം ഹനിസ്സാമി, അദിന്നം ആദിയിസ്സാമി, മിച്ഛാ ചരിസ്സാമി, ദസ അകുസലകമ്മപഥേ സമാദായ വത്തിസ്സാമീതി ഏവം അത്തനോ ദുക്ഖത്ഥായ ചിന്തേതി. പരബ്യാബാധായാതി യഥാ അസുകോ അസുകം പാണം ഹന്തി, അസുകസ്സ സന്തകം അദിന്നം ആദിയതി, ദസ അകുസലകമ്മപഥേ സമാദായ വത്തതി, ഏവം നം ആണാപേസ്സാമീതി ഏവം പരസ്സ ദുക്ഖത്ഥായ ചിന്തേതി. ഉഭയബ്യാബാധായാതി അഹം അസുകഞ്ച അസുകഞ്ച ഗഹേത്വാ ദസ അകുസലകമ്മപഥേ സമാദായ വത്തിസ്സാമീതി ഏവം ഉഭയദുക്ഖത്ഥായ ചിന്തേതീതി.

അത്തബ്യാബാധായപി മന്തേതീതിആദീസു അഹം ദസ അകുസലകമ്മപഥേ സമാദായ വത്തിസ്സാമീതി മന്തേന്തോ അത്തബ്യാബാധായ മന്തേതി നാമ. അസുകം ദസ അകുസലകമ്മപഥേ സമാദപേസ്സാമീതി മന്തേന്തോ പരബ്യാബാധായ മന്തേതി നാമ. അഞ്ഞേന സദ്ധിം – ‘‘മയം ഉഭോപി ഏകതോ ഹുത്വാ ദസ അകുസലകമ്മപഥേ സമാദായ വത്തിസ്സാമാ’’തി മന്തേന്തോ ഉഭയബ്യാബാധായ മന്തേതി നാമ.

അസക്കച്ചം ദാനം ദേതീതി ദേയ്യധമ്മമ്പി പുഗ്ഗലമ്പി ന സക്കരോതി. ദേയ്യധമ്മം ന സക്കരോതി നാമ ഉത്തണ്ഡുലാദിദോസസമന്നാഗതം ആഹാരം ദേതി, ന പസന്നം കരോതി. പുഗ്ഗലം ന സക്കരോതി നാമ നിസീദനട്ഠാനം അസമ്മജ്ജിത്വാ യത്ഥ വാ തത്ഥ വാ നിസീദാപേത്വാ യം വാ തം വാ ആധാരകം ഠപേത്വാ ദാനം ദേതി. അസഹത്ഥാതി അത്തനോ ഹത്ഥേന, ന ദേതി, ദാസകമ്മകാരാദീഹി ദാപേതി. അചിത്തികത്വാതി ഹേട്ഠാ വുത്തനയേന ദേയ്യധമ്മേപി പുഗ്ഗലേപി ന ചിത്തീകാരം കത്വാ ദേതി. അപവിദ്ധന്തി ഛഡ്ഡേതുകാമോ ഹുത്വാ വമ്മികേ ഉരഗം പക്ഖിപന്തോ വിയ ദേതി. അനാഗമനദിട്ഠികോതി നോ ഫലപാടികങ്ഖീ ഹുത്വാ ദേതി.

തത്ഥ ഉപപജ്ജതീതി ന ദാനം ദത്വാ നിരയേ ഉപപജ്ജതി. യം പന തേന പാപലദ്ധികായ മിച്ഛാദസ്സനം ഗഹിതം, തായ മിച്ഛാദിട്ഠിയാ നിരയേ ഉപപജ്ജതി. സുക്കപക്ഖോ വുത്തപടിപക്ഖനയേന വേദിതബ്ബോ. ദേവമഹത്തതാതി ഛകാമാവചരദേവാ. മനുസ്സമഹത്തതാതി തിണ്ണം കുലാനം സമ്പത്തി. സേസം സബ്ബത്ഥ ഉത്താനമേവ. ഇദം പന സുത്തം സുദ്ധവട്ടവസേനേവ കഥിതന്തി.

പപഞ്ചസൂദനിയാ മജ്ഝിമനികായട്ഠകഥായ

ചൂളപുണ്ണമസുത്തവണ്ണനാ നിട്ഠിതാ.

പഠമവഗ്ഗവണ്ണനാ നിട്ഠിതാ.