൮. ബാഹിതികസുത്തവണ്ണനാ

൩൫൮. ഏവം മേ സുതന്തി ബാഹിതികസുത്തം. തത്ഥ ഏകപുണ്ഡരീകം നാഗന്തി ഏവംനാമകം ഹത്ഥിം. തസ്സ കിര ഫാസുകാനം ഉപരി താലഫലമത്തം പണ്ഡരട്ഠാനം അത്ഥി, തേനസ്സ ഏകപുണ്ഡരീകോതി നാമം അകംസു. സിരിവഡ്ഢം മഹാമത്തന്തി പച്ചേകഹത്ഥിം അഭിരുഹിത്വാ കഥാഫാസുകത്ഥം സദ്ധിം ഗച്ഛന്തം ഏവംനാമകം മഹാമത്തം. ആയസ്മാനോതി ഏത്ഥ നോതി പുച്ഛായ നിപാതോ. മഹാമത്തോ ഥേരസ്സ സങ്ഘാടിപത്തധാരണാകാരം സല്ലക്ഖേത്വാ ‘‘ഏവം, മഹാരാജാ’’തി ആഹ.

൩൫൯. ഓപാരമ്ഭോതി ഉപാരമ്ഭം ദോസം ആരോപനാരഹോ. കിം പുച്ഛാമീതി രാജാ പുച്ഛതി. സുന്ദരിവത്ഥുസ്മിം ഉപ്പന്നമിദം സുത്തം, തം പുച്ഛാമീതി പുച്ഛതി. യഞ്ഹി മയം, ഭന്തേതി, ഭന്തേ, യം മയം വിഞ്ഞൂഹീതി ഇദം പദം ഗഹേത്വാ പഞ്ഹേന പരിപൂരേതും നാസക്ഖിമ്ഹാ, തം കാരണം ആയസ്മതാ ഏവം വദന്തേന പരിപൂരിതം.

൩൬൦. അകുസലോതി അകോസല്ലസമ്ഭൂതോ. സാവജ്ജോതി സദോസോ. സബ്യാബജ്ഝോതി സദുക്ഖോ. ദുക്ഖവിപാകോതി ഇധ നിസ്സന്ദവിപാകോ കഥിതോ. തസ്സാതി തസ്സ ഏവം അത്തബ്യാബാധാദീനം അത്ഥായ പവത്തകായസമാചാരസ്സ.

സബ്ബാകുസലധമ്മപഹീനോ ഖോ, മഹാരാജ, തഥാഗതോ കുസലധമ്മസമന്നാഗതോതി ഏത്ഥ സബ്ബേസംയേവ അകുസലാനം ധമ്മാനം പഹാനം വണ്ണേതീതി. ആമ വണ്ണേതീതി വുത്തേ യഥാ പുച്ഛാ, തഥാ അത്ഥോ വുത്തോ ഭവേയ്യ. ഏവം ബ്യാകരണം പന ന ഭാരിയം. അപ്പഹീനഅകുസലോപി ഹി പഹാനം വണ്ണേയ്യ, ഭഗവാ പന പഹീനാകുസലതായ യഥാകാരീ തഥാവാദീതി ദസ്സേതും ഏവം ബ്യാകാസി. സുക്കപക്ഖേപി ഏസേവ നയോ.

൩൬൨. ബാഹിതികാതി ബാഹിതിരട്ഠേ ഉട്ഠിതവത്ഥസ്സേതം നാമം. സോളസസമാ ആയാമേനാതി ആയാമേന സമസോളസഹത്ഥാ. അട്ഠസമാ വിത്ഥാരേനാതി വിത്ഥാരേന സമഅട്ഠഹത്ഥാ.

൩൬൩. ഭഗവതോ പാദാസീതി ഭഗവതോ നിയ്യാതേസി. ദത്വാ ച പന ഗന്ധകുടിയം വിതാനം കത്വാ ബന്ധി. തതോ പട്ഠായ ഗന്ധകുടി ഭിയ്യോസോമത്തായ സോഭി. സേസം സബ്ബത്ഥ ഉത്താനമേവ. നേയ്യപുഗ്ഗലസ്സ പന വസേന അയം ദേസനാ നിട്ഠിതാതി.

പപഞ്ചസൂദനിയാ മജ്ഝിമനികായട്ഠകഥായ

ബാഹിതികസുത്തവണ്ണനാ നിട്ഠിതാ.