൭. പിയജാതികസുത്തവണ്ണനാ

൩൫൩. ഏവം മേ സുതന്തി പിയജാതികസുത്തം. തത്ഥ നേവ കമ്മന്താ പടിഭന്തീതി ന സബ്ബേന സബ്ബം പടിഭന്തി, പകതിനിയാമേന പന ന പടിഭന്തി. ദുതിയപദേപി ഏസേവ നയോ. ഏത്ഥ ച ന പടിഭാതീതി ന രുച്ചതി. ആളാഹനന്തി സുസാനം. അഞ്ഞഥത്തന്തി വിവണ്ണതായ അഞ്ഞഥാഭാവോ. ഇന്ദ്രിയാനി നാമ മനോവിഞ്ഞേയ്യാ ധമ്മാ, പതിട്ഠിതോകാസം പന സന്ധായ ഇദം വുത്തം. പിയജാതികാതി പിയതോ ജായന്തി. പിയപ്പഭാവികാതി പിയതോ പഭവന്തി.

൩൫൫. സചേ തം, മഹാരാജാതി തസ്സ അത്ഥം അസല്ലക്ഖയമാനാപി സത്ഥരി സദ്ധായ ഏവം വദതി. ചര പിരേതി അപേഹി അമ്ഹാകം പരേ, അനജ്ഝത്തികഭൂതേതി അത്ഥോ. അഥ വാ ചര പിരേതി പരതോ ഗച്ഛ, മാ ഇധ തിട്ഠാതിപി അത്ഥോ.

൩൫൬. ദ്വിധാ ഛേത്വാതി അസിനാ ദ്വേ കോട്ഠാസേ കരോന്തോ ഛിന്ദിത്വാ. അത്താനം ഉപ്ഫാലേസീതി തേനേവ അസിനാ അത്തനോ ഉദരം ഫാലേസി. യദി ഹി തസ്സ സാ അപ്പിയാ ഭവേയ്യ, ഇദാനി അഞ്ഞം മാതുഗാമം ഗണ്ഹിസ്സാമീതി അത്താനം ന ഘാതേയ്യ. യസ്മാ പനസ്സ സാ പിയാ അഹോസി, തസ്മാ പരലോകേപി തായ സദ്ധിം സമങ്ഗിഭാവം പത്ഥയമാനോ ഏവമകാസി.

൩൫൭. പിയാ തേ വജിരീതി ഏവം കിരസ്സാ അഹോസി – ‘‘സചാഹം, ‘ഭൂതപുബ്ബം, മഹാരാജ, ഇമിസ്സായേവ സാവത്ഥിയം അഞ്ഞതരിസ്സാ ഇത്ഥിയാ’തിആദികഥം കഥേയ്യം, ‘കോ തേ ഏവം അകാസി, അപേഹി നത്ഥി ഏത’ന്തി മം പടിസേധേയ്യ, വത്തമാനേനേവ നം സഞ്ഞാപേസ്സാമീ’’തി ചിന്തേത്വാ ഏവമാഹ. വിപരിണാമഞ്ഞഥാഭാവാതി ഏത്ഥ മരണവസേന വിപരിണാമോ, കേനചി സദ്ധിം പലായിത്വാ ഗമനവസേന അഞ്ഞഥാഭാവോ വേദിതബ്ബോ.

വാസഭായാതി വാസഭാ നാമ രഞ്ഞോ ഏകാ ദേവീ, തം സന്ധായാഹ.

പിയാ തേ അഹന്തി കസ്മാ സബ്ബപച്ഛാ ആഹ? ഏവം കിരസ്സാ അഹോസി – ‘‘അയം രാജാ മയ്ഹം കുപിതോ, സചാഹം സബ്ബപഠമം ‘പിയാ തേ അഹ’ന്തി പുച്ഛേയ്യം, ‘ന മേ ത്വം പിയാ, ചര പിരേ’തി വദേയ്യ, ഏവം സന്തേ കഥാ പതിട്ഠാനം ന ലഭിസ്സതീ’’തി കഥായ പതിട്ഠാനത്ഥം സബ്ബപച്ഛാ പുച്ഛി. കാസികോസലേസു ഛഡ്ഡിതഭാവേന വിപരിണാമോ, പടിരാജൂനം ഹത്ഥഗമനവസേന അഞ്ഞഥാഭാവോ വേദിതബ്ബോ.

ആചമേഹീതി ആചമനോദകം ദേഹി. ആചമിത്വാ ഹത്ഥപാദേ ധോവിത്വാ മുഖം വിക്ഖാലേത്വാ സത്ഥാരം നമസ്സിതുകാമോ ഏവമാഹ. സേസം സബ്ബത്ഥ ഉത്താനമേവാതി.

പപഞ്ചസൂദനിയാ മജ്ഝിമനികായട്ഠകഥായ

പിയജാതികസുത്തവണ്ണനാ നിട്ഠിതാ.