൧൦. വേഖനസസുത്തവണ്ണനാ

൨൭൮. ഏവം മേ സുതന്തി വേഖനസസുത്തം. തത്ഥ വേഖനസോതി അയം കിര സകുലുദായിസ്സ ആചരിയോ, സോ ‘‘സകുലുദായീ പരിബ്ബാജകോ പരമവണ്ണപഞ്ഹേ പരാജിതോ’’തി സുത്വാ ‘‘മയാ സോ സാധുകം ഉഗ്ഗഹാപിതോ, തേനാപി സാധുകം ഉഗ്ഗഹിതം, കഥം നു ഖോ പരാജിതോ, ഹന്ദാഹം സയം ഗന്ത്വാ സമണം ഗോതമം പരമവണ്ണപഞ്ഹം പുച്ഛിത്വാ ജാനിസ്സാമീ’’തി രാജഗഹതോ പഞ്ചചത്താലീസയോജനം സാവത്ഥിം ഗന്ത്വാ യേന ഭഗവാ, തേനുപസങ്കമി, ഉപസങ്കമിത്വാ പന ഠിതകോവ ഭഗവതോ സന്തികേ ഉദാനം ഉദാനേസി. തത്ഥ പുരിമസദിസം വുത്തനയേനേവ വേദിതബ്ബം.

൨൮൦. പഞ്ച ഖോ ഇമേതി കസ്മാ ആരഭി? അഗാരിയോപി ഏകച്ചോ കാമഗരുകോ കാമാധിമുത്തോ ഹോതി, ഏകച്ചോ നേക്ഖമ്മഗരുകോ നേക്ഖമ്മാധിമുത്തോ ഹോതി. പബ്ബജിതോപി ച ഏകച്ചോ കാമഗരുകോ കാമാധിമുത്തോ ഹോതി, ഏകച്ചോ നേക്ഖമ്മഗരുകോ നേക്ഖമ്മാധിമുത്തോ ഹോതി. അയം പന കാമഗരുകോ കാമാധിമുത്തോ ഹോതി. സോ ഇമായ കഥായ കഥിയമാനായ അത്തനോ കാമാധിമുത്തത്തം സല്ലക്ഖേസ്സതി, ഏവമസ്സായം ദേസനാ സപ്പായാ ഭവിസ്സതീതി ഇമം ദേസനം ആരഭി. കാമഗ്ഗസുഖന്തി നിബ്ബാനം അധിപ്പേതം.

൨൮൧. പാപിതോ ഭവിസ്സതീതി അജാനനഭാവം പാപിതോ ഭവിസ്സതി. നാമകംയേവ സമ്പജ്ജതീതി നിരത്ഥകവചനമത്തമേവ സമ്പജ്ജതി. തിട്ഠതു പുബ്ബന്തോ തിട്ഠതു അപരന്തോതി യസ്മാ തുയ്ഹം അതീതകഥായ അനുച്ഛവികം പുബ്ബേനിവാസഞാണം നത്ഥി, അനാഗതകഥായ അനുച്ഛവികം ദിബ്ബചക്ഖുഞാണം നത്ഥി, തസ്മാ ഉഭയമ്പേതം തിട്ഠതൂതി ആഹ. സുത്തബന്ധനേഹീതി സുത്തമയബന്ധനേഹി. തസ്സ ഹി ആരക്ഖത്ഥായ ഹത്ഥപാദേസു ചേവ ഗീവായ ച സുത്തകാനി ബന്ധന്തി. താനി സന്ധായേതം വുത്തം. മഹല്ലകകാലേ പനസ്സ താനി സയം വാ പൂതീനി ഹുത്വാ മുഞ്ചന്തി, ഛിന്ദിത്വാ വാ ഹരന്തി.

ഏവമേവ ഖോതി ഇമിനാ ഇദം ദസ്സേതി – ദഹരസ്സ കുമാരസ്സ സുത്തബന്ധനാനം അജാനനകാലോ വിയ അവിജ്ജായ പുരിമായ കോടിയാ അജാനനം, ന ഹി സക്കാ അവിജ്ജായ പുരിമകോടി ഞാതും, മോചനകാലേ ജാനനസദിസം പന അരഹത്തമഗ്ഗേന അവിജ്ജാബന്ധനസ്സ പമോക്ഖോ ജാതോതി ജാനനം. സേസം സബ്ബത്ഥ ഉത്താനമേവാതി.

പപഞ്ചസൂദനിയാ മജ്ഝിമനികായട്ഠകഥായ

വേഖനസസുത്തവണ്ണനാ നിട്ഠിതാ.

തതിയവഗ്ഗവണ്ണനാ നിട്ഠിതാ.