൯. ഗോലിയാനിസുത്തവണ്ണനാ

൧൭൩. ഏവം മേ സുതന്തി ഗോലിയാനിസുത്തം. തത്ഥ പദസമാചാരോതി ദുബ്ബലസമാചാരോ ഓളാരികാചാരോ, പച്ചയേസു സാപേക്ഖോ മഹാരക്ഖിതത്ഥേരോ വിയ. തം കിര ഉപട്ഠാകകുലേ നിസിന്നം ഉപട്ഠാകോ ആഹ ‘‘അസുകത്ഥേരസ്സ മേ, ഭന്തേ, ചീവരം ദിന്ന’’ന്തി. സാധു തേ കതം തംയേവ തക്കേത്വാ വിഹരന്തസ്സ ചീവരം ദേന്തേനാതി. തുമ്ഹാകമ്പി, ഭന്തേ, ദസ്സാമീതി. സാധു കരിസ്സസി തംയേവ തക്കേന്തസ്സാതി ആഹ. അയമ്പി ഏവരൂപോ ഓളാരികാചാരോ അഹോസി. സപ്പതിസ്സേനാതി സജേട്ഠകേന, ന അത്താനം ജേട്ഠകം കത്വാ വിഹരിതബ്ബം. സേരിവിഹാരേനാതി സച്ഛന്ദവിഹാരേന നിരങ്കുസവിഹാരേന.

നാനൂപഖജ്ജാതി ന അനുപഖജ്ജ ന അനുപവിസിത്വാ. തത്ഥ യോ ദ്വീസു മഹാഥേരേസു ഉഭതോ നിസിന്നേസു തേ അനാപുച്ഛിത്വാവ ചീവരേന വാ ജാണുനാ വാ ഘട്ടേന്തോ നിസീദതി, അയം അനുപഖജ്ജ നിസീദതി നാമ. ഏവം അകത്വാ പന അത്തനോ പത്തആസനസന്തികേ ഠത്വാ നിസീദാവുസോതി വുത്തേ നിസീദിതബ്ബം. സചേ ന വദന്തി, നിസീദാമി, ഭന്തേതി ആപുച്ഛിത്വാ നിസീദിതബ്ബം ആപുച്ഛിതകാലതോ പട്ഠായ നിസീദാതി വുത്തേപി അവുത്തേപി നിസീദിതും വട്ടതിയേവ. ന പടിബാഹിസ്സാമീതി ഏത്ഥ യോ അത്തനോ പത്താസനം അതിക്കമിത്വാ നവകാനം പാപുണനട്ഠാനേ നിസീദതി, അയം നവേ ഭിക്ഖൂ ആസനേന പടിബാഹതി നാമ. തസ്മിഞ്ഹി തഥാ നിസിന്നേ നവാ ഭിക്ഖൂ ‘‘അമ്ഹാകം നിസീദിതും ന ദേതീ’’തി ഉജ്ഝായന്താ തിട്ഠന്തി വാ ആസനം വാ പരിയേസന്താ ആഹിണ്ഡന്തി. തസ്മാ അത്തനോ പത്താസനേയേവ നിസീദിതബ്ബം. ഏവം ന പടിബാഹതി നാമ.

ആഭിസമാചാരികമ്പി ധമ്മന്തി അഭിസമാചാരികം വത്തപടിപത്തിമത്തമ്പി. നാതികാലേനാതി ന അതിപാതോ പവിസിതബ്ബം, ന അതിദിവാ പടിക്കമിതബ്ബം, ഭിക്ഖുസങ്ഘേന സദ്ധിംയേവ പവിസിതബ്ബഞ്ച നിക്ഖമിതബ്ബഞ്ച. അതിപാതോ പവിസിത്വാ അതിദിവാ നിക്ഖമന്തസ്സ ഹി ചേതിയങ്ഗണബോധിയങ്ഗണവത്താദീനി പരിഹായന്തി. കാലസ്സേവ മുഖം ധോവിത്വാ മക്കടകസുത്താനി ഛിന്ദന്തേന ഉസ്സാവബിന്ദൂ നിപാതേന്തേന ഗാമം പവിസിത്വാ യാഗും പരിയേസിത്വാ യാവ ഭിക്ഖാകാലാ അന്തോഗാമേയേവ നാനപ്പകാരം തിരച്ഛാനകഥം കഥേന്തേന നിസീദിത്വാ ഭത്തകിച്ചം കത്വാ ദിവാ നിക്ഖമ്മ ഭിക്ഖൂനം പാദധോവനവേലായ വിഹാരം പച്ചാഗന്തബ്ബം ഹോതി. ന പുരേഭത്തം പച്ഛാഭത്തം കുലേസു ചാരിത്തം ആപജ്ജിതബ്ബന്തി ‘‘യോ പന ഭിക്ഖു നിമന്തിതോ സഭത്തോ സമാനോ സന്തം ഭിക്ഖും അനാപുച്ഛാ പുരേഭത്തം വാ പച്ഛാഭത്തം വാ കുലേസു ചാരിത്തം ആപജ്ജേയ്യ, അഞ്ഞത്ര സമയാ പാചിത്തിയ’’ന്തി (പാചി. ൨൯൯) ഇമം സിക്ഖാപദം രക്ഖന്തേന തസ്സ വിഭങ്ഗേ വുത്തം പുരേഭത്തഞ്ച പച്ഛാഭത്തഞ്ച ചാരിത്തം ന ആപജ്ജിതബ്ബം. ഉദ്ധതോ ഹോതി ചപലോതി ഉദ്ധച്ചപകതികോ ചേവ ഹോതി ചീവരമണ്ഡന-പത്തമണ്ഡന-സേനാസനമണ്ഡനാ ഇമസ്സ വാ പൂതികായസ്സ കേലായനാ മണ്ഡനാതി ഏവം വുത്തേന ച തരുണദാരകാവചാപല്യേന സമന്നാഗതോ.

പഞ്ഞവതാ ഭവിതബ്ബന്തി ചീവരകമ്മാദീസു ഇതികത്തബ്ബേസു ഉപായപഞ്ഞായ സമന്നാഗതേന ഭവിതബ്ബം. അഭിധമ്മേ അഭിവിനയേതി അഭിധമ്മപിടകേ ചേവ വിനയപിടകേ ച പാളിവസേന ചേവ അട്ഠകഥാവസേന ച യോഗോ കരണീയോ. സബ്ബന്തിമേന ഹി പരിച്ഛേദേന അഭിധമ്മേ ദുകതികമാതികാഹി സദ്ധിം ധമ്മഹദയവിഭങ്ഗം വിനാ ന വട്ടതി. വിനയേ പന കമ്മാകമ്മവിനിച്ഛയേന സദ്ധിം സുവിനിച്ഛിതാനി ദ്വേ പാതിമോക്ഖാനി വിനാ ന വട്ടതി.

ആരുപ്പാതി ഏത്താവതാ അട്ഠപി സമാപത്തിയോ വുത്താ ഹോന്തി. താ പന സബ്ബേന സബ്ബം അസക്കോന്തേന സത്തസുപി യോഗോ കരണീയോ, ഛസുപി…പേ… പഞ്ചസുപി. സബ്ബന്തിമേന പരിച്ഛേദേന ഏകം കസിണേ പരികമ്മകമ്മട്ഠാനം പഗുണം കത്വാ ആദായ വിചരിതബ്ബം, ഏത്തകം വിനാ ന വട്ടതി. ഉത്തരിമനുസ്സധമ്മേതി ഇമിനാ സബ്ബേപി ലോകുത്തരധമ്മേ ദസ്സേതി. തസ്മാ അരഹന്തേന ഹുത്വാ വിഹാതബ്ബം, അരഹത്തം അനഭിസമ്ഭുണന്തേന അനാഗാമിഫലേ സകദാഗാമിഫലേ സോതാപത്തിഫലേ വാ പതിട്ഠാതബ്ബം. സബ്ബന്തിമേന പരിയായേന ഏകം വിപസ്സനാമുഖം യാവ അരഹത്താ പഗുണം കത്വാ ആദായ വിചരിതബ്ബം. സേസം സബ്ബത്ഥ ഉത്താനമേവ. ഇമം പന ദേസനം ആയസ്മാ സാരിപുത്തോ നേയ്യപുഗ്ഗലസ്സ വസേന ആഭിസമാചാരികവത്തതോ പട്ഠായ അനുപുബ്ബേന അരഹത്തം പാപേത്വാ നിട്ഠാപേസീതി.

പപഞ്ചസൂദനിയാ മജ്ഝിമനികായട്ഠകഥായ

ഗോലിയാനിസുത്തവണ്ണനാ നിട്ഠിതാ.