൧൦. (ഉത്തര) പായാസിവിമാനവണ്ണനാ

യാ ദേവരാജസ്സ സഭാ സുധമ്മാതി ഉത്തരവിമാനം. തസ്സ കാ ഉപ്പത്തി? ഭഗവതി പരിനിബ്ബുതേ ധാതുവിഭാഗേ ച കതേ തത്ഥ തത്ഥ ഥൂപേസു പതിട്ഠാപിയമാനേസു ധമ്മവിനയം സങ്ഗായിതും ഉച്ചിനിത്വാ ഗഹിതേസു മഹാകസ്സപപ്പമുഖേസു മഹാഥേരേസു യാവ വസ്സൂപഗമനാ അഞ്ഞേസു ച ഥേരേസു അത്തനോ അത്തനോ പരിസായ സദ്ധിം തത്ഥ തത്ഥ വസന്തേസു ആയസ്മാ കുമാരകസ്സപോ പഞ്ചഹി ഭിക്ഖുസതേഹി സദ്ധിം സേതബ്യനഗരം ഗന്ത്വാ സിംസപാവനേ വസി. അഥ പായാസി രാജഞ്ഞോ ഥേരസ്സ തത്ഥ വസനഭാവം സുത്വാ മഹതാ ജനകായേന പരിവുതോ തം ഉപസങ്കമിത്വാ പടിസന്ഥാരം കത്വാ നിസിന്നോ അത്തനോ ദിട്ഠിഗതം പവേദേസി. അഥ നം ഥേരോ ചന്ദിമസൂരിയൂദാഹരണാദീഹി പരലോകസ്സ അത്ഥിഭാവം പകാസേന്തോ അനേകവിഹിതഹേതൂപമാലങ്കതം ദിട്ഠിഗണ്ഠിവിനിവേഠനം നാനാനയവിചിത്തം പായാസിസുത്തം (ദീ. നി. ൨.൪൦൬ ആദയോ) ദേസേത്വാ തം ദിട്ഠിസമ്പദായം പതിട്ഠാപേസി.

സോ വിസുദ്ധദിട്ഠികോ ഹുത്വാ സമണബ്രാഹ്മണകപണദ്ധികാദീനം ദാനം ദേന്തോ അനുളാരജ്ഝാസയതായ ലൂഖം അദാസി ഘാസച്ഛാദനമത്തം കണാജകം ബിലങ്ഗദുതിയം സാണാനി ച വത്ഥാനി. ഏവം പന അസക്കച്ചദാനം ദത്വാ കായസ്സ ഭേദാ ഹീനകായം ഉപപജ്ജി ചാതുമഹാരാജികാനം സഹബ്യതം. തസ്സ പന കിച്ചാകിച്ചേസു യുത്തപ്പയുത്തോ ഉത്തരോ നാമ മാണവോ അഹോസി ദാനേ ബ്യാവടോ. സോ സക്കച്ചദാനം ദത്വാ താവതിംസകായം ഉപപന്നോ, തസ്സ ദ്വാദസയോജനികം വിമാനം നിബ്ബത്തി. സോ കതഞ്ഞുതം വിഭാവേന്തോ സഹ വിമാനേന കുമാരകസ്സപത്ഥേരം ഉപസങ്കമിത്വാ വിമാനതോ ഓരുയ്ഹ പഞ്ചപതിട്ഠിതേന വന്ദിത്വാ അഞ്ജലിം പഗ്ഗയ്ഹ അട്ഠാസി. തം ഥേരോ –

൧൧൦൮. ‘‘യാ ദേവരാജസ്സ സഭാ സുധമ്മാ, യത്ഥച്ഛതി ദേവസങ്ഘോ സമഗ്ഗോ;

തഥൂപമം തുയ്ഹമിദം വിമാനം, ഓഭാസയം തിട്ഠതി അന്തലിക്ഖേ.

൧൧൦൯. ‘‘ദേവിദ്ധിപത്തോസി മഹാനുഭാവോ…പേ…

വണ്ണോ ച തേ സബ്ബദിസാ പഭാസതീ’’തി. – ഗാഥാഹി പടിപുച്ഛി;

൧൧൧൦. ‘‘സോ ദേവപുത്തോ അത്തമനോ…പേ… യസ്സ കമ്മസ്സിദം ഫലം’’.

൧൧൧൧. ‘‘അഹം മനുസ്സേസു മനുസ്സഭൂതോ, രഞ്ഞോ പായാസിസ്സ അഹോസിം മാണവോ;

ലദ്ധാ ധനം സംവിഭാഗം അകാസിം, പിയാ ച മേ സീലവന്തോ അഹേസും;

അന്നഞ്ച പാനഞ്ച പസന്നചിത്തോ, സക്കച്ച ദാനം വിപുലം അദാസിം.

൧൧൧൨. ‘‘തേന മേതാദിസോ വണ്ണോ…പേ…

വണ്ണോ ച മേ സബ്ബദിസാ പഭാസതീ’’തി. –

സോ ദേവപുത്തോ തസ്സ ഇമാഹി ഗാഥാഹി ബ്യാകാസി.

൧൧൦൮. തത്ഥ ദേവരാജസ്സാതി സക്കസ്സ. സഭാ സുധമ്മാതി ഏവംനാമകം സന്ഥാഗാരം. യത്ഥാതി യസ്സം സഭായം. അച്ഛതീതി നിസീദതി. ദേവസങ്ഘോതി താവതിംസദേവകായോ. സമഗ്ഗോതി സഹിതോ സന്നിപതിതോ.

൧൧൧൧. പായാസിസ്സ അഹോസിം മാണവോതി പായാസിരാജഞ്ഞസ്സ കിച്ചാകിച്ചകരോ ദഹരതായ മാണവോ, നാമേന പന ഉത്തരോ നാമ അഹോസിം. സംവിഭാഗം അകാസിന്തി അഹമേവ അഭുഞ്ജിത്വാ യഥാലദ്ധം ധനം ദാനമുഖേ പരിച്ചജനവസേന സംവിഭജനം അകാസിം. അന്നഞ്ച പാനഞ്ച പരിച്ചജന്തോതി വചനസേസോ. അഥ വാ ദാനം വിപുലം അദാസിം. കഥം? സക്കച്ചം. കീദിസം? അന്നഞ്ച പാനഞ്ചാതി യോജേതബ്ബം.

(ഉത്തര) പായാസിവിമാനവണ്ണനാ നിട്ഠിതാ.

ഇതി പരമത്ഥദീപനിയാ ഖുദ്ദക-അട്ഠകഥായ വിമാനവത്ഥുസ്മിം

ദസവത്ഥുപടിമണ്ഡിതസ്സ ഛട്ഠസ്സ പായാസിവഗ്ഗസ്സ

അത്ഥവണ്ണനാ നിട്ഠിതാ.