൮. അമ്ബവിമാനവണ്ണനാ
ദിബ്ബം തേ അമ്ബവനം രമ്മന്തി അമ്ബവിമാനം. തസ്സ കാ ഉപ്പത്തി? ഭഗവാ സാവത്ഥിയം വിഹരതി ജേതവനേ. തേന സമയേന സാവത്ഥിയം അഞ്ഞതരാ ഉപാസികാ ആവാസദാനസ്സ മഹപ്ഫലതം മഹാനിസംസതഞ്ച സുത്വാ ഛന്ദജാതാ ഭഗവന്തം അഭിവാദേത്വാ ഏവമാഹ ‘‘അഹം, ഭന്തേ, ഏകം ആവാസം കാരേതുകാമാ, ഇച്ഛാമി താദിസം ഓകാസം, ആചിക്ഖതൂ’’തി. ഭഗവാ ഭിക്ഖൂ ആണാപേസി, ഭിക്ഖൂ തസ്സാ ഓകാസം ദസ്സേസും. സാ തത്ഥ രമണീയം ആവാസം കാരേത്വാ തസ്സ സമന്തതോ അമ്ബരുക്ഖേ രോപേസി. സോ ആവാസോ സമന്തതോ അമ്ബപന്തീഹി പരിക്ഖിത്തോ ഛായൂദകസമ്പന്നോ മുത്താജാലസദിസവാലുകാകിണ്ണപണ്ഡരഭൂമിഭാഗോ അതിവിയ മനോഹരോ അഹോസി. സാ തം വിഹാരം നാനാവണ്ണേഹി വത്ഥേഹി പുപ്ഫദാമഗന്ധദാമാദീഹി ച ദേവവിമാനം വിയ അലങ്കരിത്വാ തേലപദീപം ആരോപേത്വാ അമ്ബരുക്ഖേ ച അഹതേഹി വത്ഥേഹി വേഠേത്വാ സങ്ഘസ്സ നിയ്യാദേസി.
സാ അപരഭാഗേ കാലം കത്വാ താവതിംസഭവനേ നിബ്ബത്തി, തസ്സാ മഹന്തം വിമാനം പാതുരഹോസി അമ്ബവനപരിക്ഖിത്തം. സാ തത്ഥ അച്ഛരാഗണപരിവാരിതാ ദിബ്ബസമ്പത്തിം അനുഭവതി. തം ആയസ്മാ മഹാമോഗ്ഗല്ലാനോ ഉപഗന്ത്വാ ഇമാഹി ഗാഥാഹി പുച്ഛി –
൭൮൩. ‘‘ദിബ്ബം തേ അമ്ബവനം രമ്മം, പാസാദേത്ഥ മഹല്ലകോ;
നാനാതൂരിയസങ്ഘുട്ഠോ, അച്ഛരാഗണഘോസിതോ.
൭൮൪. ‘‘പദീപോ ചേത്ഥ ജലതി, നിച്ചം സോവണ്ണയോ മഹാ;
ദുസ്സഫലേഹി രുക്ഖേഹി, സമന്താ പരിവാരിതോ.
൭൮൫. ‘‘കേന തേതാദിസോ വണ്ണോ…പേ…വണ്ണോ ച തേ സബ്ബദിസാ പഭാസതീ’’തി.
൭൮൭. ‘‘സാ ദേവതാ അത്തമനാ…പേ… യസ്സ കമ്മസ്സിദം ഫലം’’.
൭൮൮. ‘‘അഹം മനുസ്സേസു മനുസ്സഭൂതാ, പുരിമായ ജാതിയാ മനുസ്സലോകേ;
വിഹാരം സങ്ഘസ്സ കാരേസിം, അമ്ബേഹി പരിവാരിതം.
൭൮൯. ‘‘പരിയോസിതേ വിഹാരേ, കാരേന്തേ നിട്ഠിതേ മഹേ;
അമ്ബേഹി ഛാദയിത്വാന, കത്വാ ദുസ്സമയേ ഫലേ.
൭൯൦. ‘‘പദീപം തത്ഥ ജാലേത്വാ, ഭോജയിത്വാ ഗണുത്തമം;
നിയ്യാദേസിം തം സങ്ഘസ്സ, പസന്നാ സേഹി പാണിഭി.
൭൯൧. ‘‘തേന മേ അമ്ബവനം രമ്മം, പാസാദേത്ഥ മഹല്ലകോ;
നാനാതൂരിയസങ്ഘുട്ഠോ, അച്ഛരാഗണഘോസിതോ.
൭൯൨. ‘‘പദീപോ ചേത്ഥ ജലതി, നിച്ചം സോവണ്ണയോ മഹാ;
ദുസ്സഫലേഹി രുക്ഖേഹി, സമന്താ പരിവാരിതോ.
൭൯൩. ‘‘തേന മേതാദിസോ വണ്ണോ…പേ…വണ്ണോ ച മേ സബ്ബദിസാ പഭാസതീ’’തി. –
സാ ദേവതാ ബ്യാകാസി.
൭൮൩. തത്ഥ മഹല്ലകോതി മഹന്തോ ആയാമവിത്ഥാരേഹി ഉബ്ബേധേന ച വിപുലോ, ഉളാരതമോതി അത്ഥോ. അച്ഛരാഗണഘോസിതോതി തം പമോദിതും സങ്ഗീതിവസേന ചേവ പിയസല്ലാപവസേന ച അച്ഛരാസങ്ഘേന സമുഗ്ഘോസിതോ.
൭൮൪. പദീപോ ചേത്ഥ ജലതീതി സൂരിയരസ്മിസമുജ്ജലകിരണവിതാനോ രതനപ്പദീപോ ച ഏത്ഥ ഏതസ്മിം പാസാദേ അഭിജലതി. ദുസ്സഫലേഹീതി ദുസ്സാനി ഫലാനി ഏതേസന്തി ദുസ്സഫലാ. തേഹി സമുഗ്ഗിരിയമാനദിബ്ബവത്ഥേഹീതി അത്ഥോ.
൭൮൯. കാരേന്തേ നിട്ഠിതേ മഹേതി കതപരിയോസിതസ്സ വിഹാരസ്സ മഹേ പൂജായ കരീയമാനായ ച. കത്വാ ദുസ്സമയേ ഫലേതി ദുസ്സേയേവ തേസം അമ്ബാനം ഫലം കത്വാ.
൭൯൦. ഗണുത്തമന്തി ഗണാനം ഉത്തമം ഭഗവതോ സാവകസങ്ഘം. നിയ്യാദേസിന്തി സമ്പടിച്ഛാപേസിം, അദാസിന്തി അത്ഥോ. സേസം വുത്തനയമേവ.
അമ്ബവിമാനവണ്ണനാ നിട്ഠിതാ.