൫-൧൦. തിസ്സാദിഥേരീഗാഥാവണ്ണനാ

തിസ്സേ യുഞ്ജസ്സു ധമ്മേഹീതി തിസ്സായ ഥേരിയാ ഗാഥാ. തസ്സാ വത്ഥു തിസ്സാസിക്ഖമാനായ വത്ഥുസദിസം. അയം പന ഥേരീ ഹുത്വാ അരഹത്തം പാപുണി. യഥാ ച അയം, ഏവം ഇതോ പരം ധീരാ, വീരാ, മിത്താ, ഭദ്രാ, ഉപസമാതി പഞ്ചന്നം ഥേരീനം വത്ഥു ഏകസദിസമേവ. സബ്ബാപി ഇമാ കപിലവത്ഥുവാസിനിയോ ബോധിസത്തസ്സ ഓരോധഭൂതാ മഹാപജാപതിഗോതമിയാ സദ്ധിം നിക്ഖന്താ ഓഭാസഗാഥായ ച അരഹത്തം പത്താ ഠപേത്വാ സത്തമിം. സാ പന ഓഭാസഗാഥായ വിനാ പഗേവ സത്ഥു സന്തികേ ലദ്ധം ഓവാദം നിസ്സായ വിപസ്സനം ഉസ്സുക്കാപേത്വാ അരഹത്തം പാപുണിത്വാ ഉദാനവസേന ‘‘വീരാ വീരേഹീ’’തി ഗാഥം അഭാസി. ഇതരാപി അരഹത്തം പത്വാ –

൫. ‘‘തിസ്സേ യുഞ്ജസ്സു ധമ്മേഹി, ഖണോ തം മാ ഉപച്ചഗാ;

ഖണാതീതാ ഹി സോചന്തി, നിരയമ്ഹി സമപ്പിതാ.

൬. ‘‘ധീരേ നിരോധം ഫുസേഹി, സഞ്ഞാവൂപസമം സുഖം;

ആരാധയാഹി നിബ്ബാനം, യോഗക്ഖേമമനുത്തരം.

൭. ‘‘വീരാ വീരേഹി ധമ്മേഹി, ഭിക്ഖുനീ ഭാവിതിന്ദ്രിയാ;

ധാരേതി അന്തിമം ദേഹം, ജേത്വാ മാരം സവാഹനം.

൮. ‘‘സദ്ധായ പബ്ബജിത്വാന, മിത്തേ മിത്തരതാ ഭവ;

ഭാവേഹി കുസലേ ധമ്മേ, യോഗക്ഖേമസ്സ പത്തിയാ.

൯. ‘‘സദ്ധായ പബ്ബജിത്വാന, ഭദ്രേ ഭദ്രരതാ ഭവ;

ഭാവേഹി കുസലേ ധമ്മേ, യോഗക്ഖേമമനുത്തരം.

൧൦. ‘‘ഉപസമേ തരേ ഓഘം, മച്ചുധേയ്യം സുദുത്തരം;

ധാരേഹി അന്തിമം ദേഹം, ജേത്വാ മാരം സവാഹന’’ന്തി. – ഗാഥായോ അഭാസിംസു;

തത്ഥ യുഞ്ജസ്സു ധമ്മേഹീതി സമഥവിപസ്സനാധമ്മേഹി അരിയേഹി ബോധിപക്ഖിയധമ്മേഹി ച യുഞ്ജ യോഗം കരോഹി. ഖണോ തം മാ ഉപച്ചഗാതി യോ ഏവം യോഗഭാവനം ന കരോതി, തം പുഗ്ഗലം പതിരൂപദേസേ ഉപ്പത്തിക്ഖണോ, ഛന്നം ആയതനാനം അവേകല്ലക്ഖണോ, ബുദ്ധുപ്പാദക്ഖണോ, സദ്ധായ പടിലദ്ധക്ഖണോ, സബ്ബോപി അയം ഖണോ അതിക്കമതി നാമ. സോ ഖണോ തം മാ അതിക്കമി. ഖണാതീതാതി യേ ഹി ഖണം അതീതാ, യേ ച പുഗ്ഗലേ സോ ഖണോ അഭീതോ, തേ നിരയമ്ഹി സമപ്പിതാ ഹുത്വാ സോചന്തി, തത്ഥ നിബ്ബത്തിത്വാ മഹാദുക്ഖം പച്ചനുഭവന്തീതി അത്ഥോ.

നിരോധം ഫുസേഹീതി കിലേസനിരോധം ഫുസ്സ പടിലഭ. സഞ്ഞാവൂപസമം സുഖം, ആരാധയാഹി നിബ്ബാനന്തി കാമസഞ്ഞാദീനം പാപസഞ്ഞാനം ഉപസമനിമിത്തം അച്ചന്തസുഖം നിബ്ബാനം ആരാധേഹി.

വീരാ വീരേഹി ധമ്മേഹീതി വീരിയപധാനതായ വീരേഹി തേജുസ്സദേഹി അരിയമഗ്ഗധമ്മേഹി ഭാവിതിന്ദ്രിയാ വഡ്ഢിതസദ്ധാദിഇന്ദ്രിയാ വീരാ ഭിക്ഖുനീ വത്ഥുകാമേഹി സവാഹനം കിലേസമാരം ജിനിത്വാ ആയതിം പുനബ്ഭവാഭാവതോ അന്തിമം ദേഹം ധാരേതീതി ഥേരീ അഞ്ഞം വിയ കത്വാ അത്താനം ദസ്സേതി.

മിത്തേതി തം ആലപതി. മിത്തരതാതി കല്യാണമിത്തേസു അഭിരതാ. തത്ഥ സക്കാരസമ്മാനകരണതാ ഹോഹി. ഭാവേഹി കുസലേ ധമ്മേതി അരിയമഗ്ഗധമ്മേ വഡ്ഢേഹി. യോഗക്ഖേമസ്സാതി അരഹത്തസ്സ നിബ്ബാനസ്സ ച പത്തിയാ അധിഗമായ.

ഭദ്രേതി തം ആലപതി. ഭദ്രരതാതി ഭദ്രേസു സീലാദിധമ്മേസു രതാ അഭിരതാ ഹോഹി. യോഗക്ഖേമമനുത്തരന്തി ചതൂഹി യോഗേഹി ഖേമം അനുപദ്ദവം അനുത്തരം നിബ്ബാനം, തസ്സ പത്തിയാ കുസലേ ബോധിപക്ഖിയധമ്മേ ഭാവേഹീതി അത്ഥോ.

ഉപസമേതി തം ആലപതി. തരേ ഓഘം മച്ചുധേയ്യം സുദുത്തരന്തി മച്ചു ഏത്ഥ ധീയതീതി മച്ചുധേയ്യം, അനുപചിതകുസലസമ്ഭാരേഹി സുട്ഠു ദുത്തരന്തി സുദുത്തരം, സംസാരമഹോഘം തരേ അരിയമഗ്ഗനാവായ തരേയ്യാസി. ധാരേഹി അന്തിമം ദേഹന്തി തസ്സ തരണേനേവ അന്തിമദേഹധരാ ഹോഹീതി അത്ഥോ.

തിസ്സാദിഥേരീഗാഥാവണ്ണനാ നിട്ഠിതാ.

നിട്ഠിതാ പഠമവഗ്ഗവണ്ണനാ.