൪. തിസ്സാഥേരീഗാഥാവണ്ണനാ

തിസ്സേ സിക്ഖസ്സു സിക്ഖായാതി തിസ്സായ സിക്ഖമാനായ ഗാഥാ. അയമ്പി പുരിമബുദ്ധേസു കതാധികാരാ തത്ഥ തത്ഥ ഭവേ വിവട്ടൂപനിസ്സയം കുസലം ഉപചിനിത്വാ സമ്ഭതകുസലപച്ചയാ ഇമസ്മിം ബുദ്ധുപ്പാദേ കപിലവത്ഥുസ്മിം സക്യരാജകുലേ നിബ്ബത്തിത്വാ വയപ്പത്താ ബോധിസത്തസ്സ ഓരോധഭൂതാ പച്ഛാ മഹാപജാപതിഗോതമിയാ സദ്ധിം നിക്ഖമിത്വാ പബ്ബജിത്വാ വിപസ്സനായ കമ്മം കരോതി. തസ്സാ സത്ഥാ ഹേട്ഠാ വുത്തനയേനേവ ഓഭാസം വിസ്സജ്ജേത്വാ –

൪. ‘‘തിസ്സേ സിക്ഖസ്സു സിക്ഖായ, മാ തം യോഗാ ഉപച്ചഗും;

സബ്ബയോഗവിസംയുത്താ, ചര ലോകേ അനാസവാ’’തി. – ഗാഥം അഭാസി;

തത്ഥ തിസ്സേതി തസ്സാ ആലപനം. സിക്ഖസ്സു സിക്ഖായാതി അധിസീലസിക്ഖാദികായ തിവിധായ സിക്ഖായ സിക്ഖ, മഗ്ഗസമ്പയുത്താ തിസ്സോ സിക്ഖായോ സമ്പാദേഹീതി അത്ഥോ. ഇദാനി താസം സമ്പാദനേ കാരണമാഹ ‘‘മാ തം യോഗാ ഉപച്ചഗു’’ന്തി മനുസ്സത്തം, ഇന്ദ്രിയാവേകല്ലം, ബുദ്ധുപ്പാദോ, സദ്ധാപടിലാഭോതി ഇമേ യോഗാ സമയാ ദുല്ലഭക്ഖണാ തം മാ അതിക്കമും. കാമയോഗാദയോ ഏവ വാ ചത്താരോ യോഗാ തം മാ ഉപച്ചഗും മാ അഭിഭവേയ്യും. സബ്ബയോഗവിസംയുത്താതി സബ്ബേഹി കാമയോഗാദീഹി യോഗേഹി വിമുത്താ തതോ ഏവ അനാസവാ ഹുത്വാ ലോകേ ചര, ദിട്ഠസുഖവിഹാരേന വിഹരാഹീതി അത്ഥോ.

സാ തം ഗാഥം സുത്വാ വിപസ്സനം വഡ്ഢേത്വാ അരഹത്തം പാപുണീതി ആദിനയോ ഹേട്ഠാ വുത്തനയേനേവ വേദിതബ്ബോ.

തിസ്സാഥേരീഗാഥാവണ്ണനാ നിട്ഠിതാ.