൧൫. ഉത്തരാഥേരീഗാഥാവണ്ണനാ

കായേന സംവുതാ ആസിന്തി ഉത്തരായ ഥേരിയാ ഗാഥാ. തസ്സാപി വത്ഥു തിസ്സാഥേരിയാ വത്ഥുസദിസം. സാപി ഹി സക്യകുലപ്പസുതാ ബോധിസത്തസ്സ ഓരോധഭൂതാ മഹാപജാപതിഗോതമിയാ സദ്ധിം നിക്ഖന്താ ഓഭാസഗാഥായ അരഹത്തം പത്വാ പന –

൧൫. ‘‘കായേന സംവുതാ ആസിം, വാചായ ഉദ ചേതസാ;

സമൂലം തണ്ഹമബ്ബുയ്ഹ, സീതിഭൂതാമ്ഹി നിബ്ബുതാ’’തി. –

ഉദാനവസേന തമേവ ഗാഥം അഭാസി.

തത്ഥ കായേന സംവുതാ ആസിന്തി കായികേന സംവരേന സംവുതാ അഹോസിം. വാചായാതി വാചസികേന സംവരേന സംവുതാ ആസിന്തി യോജനാ, പദദ്വയേനാപി സീലസംവരമാഹ. ഉദാതി അഥ. ചേതസാതി സമാധിചിത്തേന, ഏതേന വിപസ്സനാഭാവനമാഹ. സമൂലം തണ്ഹമബ്ബുയ്ഹാതി സാനുസയം, സഹ വാ അവിജ്ജായ തണ്ഹം ഉദ്ധരിത്വാ. അവിജ്ജായ ഹി പടിച്ഛാദിതാദീനവേ ഭവത്തയേ തണ്ഹാ ഉപ്പജ്ജതി.

അപരോ നയോ – കായേന സംവുതാതി സമ്മാകമ്മന്തേന സബ്ബസോ മിച്ഛാകമ്മന്തസ്സ പഹാനാ മഗ്ഗസംവരേനേവ കായേന സംവുതാ ആസിം. വാചായാതി സമ്മാവാചായ സബ്ബസോ മിച്ഛാവാചായ പഹാനാ മഗ്ഗസംവരേനേവ വാചായ സംവുതാ ആസിന്തി അത്ഥോ. ചേതസാതി സമാധിനാ. ചേതോസീസേന ഹേത്ഥ സമ്മാസമാധി വുത്തോ, സമ്മാസമാധിഗ്ഗഹണേനേവ മഗ്ഗലക്ഖണേന ഏകലക്ഖണാ സമ്മാദിട്ഠിആദയോ മഗ്ഗധമ്മാ ഗഹിതാവ ഹോന്തീതി, മഗ്ഗസംവരേന അഭിജ്ഝാദികസ്സ അസംവരസ്സ അനവസേസതോ പഹാനം ദസ്സിതം ഹോതി. തേനേവാഹ ‘‘സമൂലം തണ്ഹമബ്ബുയ്ഹാ’’തി. സീതിഭൂതാമ്ഹി നിബ്ബുതാതി സബ്ബസോ കിലേസപരിളാഹാഭാവേന സീതിഭാവപ്പത്താ അനുപാദിസേസായ നിബ്ബാനധാതുയാ നിബ്ബുതാ അമ്ഹീതി.

ഉത്തരാഥേരീഗാഥാവണ്ണനാ നിട്ഠിതാ.