൧൦. ഗണപേതവത്ഥുവണ്ണനാ

നഗ്ഗാ ദുബ്ബണ്ണരൂപാത്ഥാതി ഇദം സത്ഥരി ജേതവനേ വിഹരന്തേ സമ്ബഹുലേ പേതേ ആരബ്ഭ വുത്തം. സാവത്ഥിയം കിര സമ്ബഹുലാ മനുസ്സാ ഗണഭൂതാ അസ്സദ്ധാ അപ്പസന്നാ മച്ഛേരമലപരിയുട്ഠിതചിത്താ ദാനാദിസുചരിതവിമുഖാ ഹുത്വാ ചിരം ജീവിത്വാ കായസ്സ ഭേദാ നഗരസ്സ സമീപേ പേതയോനിയം നിബ്ബത്തിംസു. അഥേകദിവസം ആയസ്മാ മഹാമോഗ്ഗല്ലാനോ സാവത്ഥിയം പിണ്ഡായ ഗച്ഛന്തോ അന്തരാമഗ്ഗേ പേതേ ദിസ്വാ –

൭൮൨. ‘‘നഗ്ഗാ ദുബ്ബണരൂപാത്ഥ, കിസാ ധമനിസന്ഥതാ;

ഉപ്ഫാസുലികാ കിസികാ, കേ നു തുമ്ഹേത്ഥ മാരിസാ’’തി. –

ഗാഥായ പുച്ഛി. തത്ഥ ദുബ്ബണ്ണരൂപാത്ഥാതി ദുബ്ബണ്ണസരീരാ ഹോഥ. കേ നു തുമ്ഹേത്ഥാതി തുമ്ഹേ കേ നു നാമ ഭവഥ. മാരിസാതി തേ അത്തനോ സാരുപ്പവസേന ആലപതി.

തം സുത്വാ പേതാ –

൭൮൩. ‘‘മയം ഭദന്തേ പേതമ്ഹാ, ദുഗ്ഗതാ യമലോകികാ;

പാപകമ്മം കരിത്വാന, പേതലോകം ഇതോ ഗതാ’’തി. –

ഗാഥായ അത്തനോ പേതഭാവം പകാസേത്വാ പുന ഥേരേന –

൭൮൪. ‘‘കിം നു കായേന വാചായ, മനസാ ദുക്കടം കതം;

കിസ്സകമ്മവിപാകേന, പേതലോകം ഇതോ ഗതാ’’തി. –

ഗാഥായ കതകമ്മം പുച്ഛിതാ –

൭൮൫. ‘‘അനാവടേസു തിത്ഥേസു, വിചിനിമ്ഹദ്ധമാസകം;

സന്തേസു ദേയ്യധമ്മേസു, ദീപം നാകമ്ഹ അത്തനോ.

൭൮൬. ‘‘നദിം ഉപേമ തസിതാ, രിത്തകാ പരിവത്തതി;

ഛായം ഉപേമ ഉണ്ഹേസു, ആതപോ പരിവത്തതി.

൭൮൭. ‘‘അഗ്ഗിവണ്ണോ ച നോ വാതോ, ഡഹന്തോ ഉപവായതി;

ഏതഞ്ച ഭന്തേ അരഹാമ, അഞ്ഞഞ്ച പാപകം തതോ.

൭൮൮. ‘‘അപി യോജനാനി ഗച്ഛാമ, ഛാതാ ആഹാരഗേധിനോ;

അലദ്ധാവ നിവത്താമ, അഹോ നോ അപ്പപുഞ്ഞതാ.

൭൮൯. ‘‘ഛാതാ പമുച്ഛിതാ ഭന്താ, ഭൂമിയം പടിസുമ്ഭിതാ;

ഉത്താനാ പടികിരാമ, അവകുജ്ജാ പതാമസേ.

൭൯൦. ‘‘തേ ച തത്ഥേവ പതിതാ, ഭൂമിയം പടിസുമ്ഭിതാ;

ഉരം സീസഞ്ച ഘട്ടേമ, അഹോ നോ അപ്പപുഞ്ഞതാ.

൭൯൧. ‘‘ഏതഞ്ച ഭന്തേ അരഹാമ, അഞ്ഞഞ്ച പാപകം തതോ;

സന്തേസു ദേയ്യധമ്മേസു, ദീപം നാകമ്ഹ അത്തനോ.

൭൯൨. ‘‘തേ ഹി നൂന ഇതോ ഗന്ത്വാ, യോനിം ലദ്ധാന മാനുസിം;

വദഞ്ഞൂ സീലസമ്പന്നാ, കാഹാമ കുസലം ബഹു’’ന്തി. –

അത്തനാ കതകമ്മം കഥേസും.

൭൮൮. തത്ഥ അപി യോജനാനി ഗച്ഛാമാതി അനേകാനിപി യോജനാനി ഗച്ഛാമ. കഥം? ഛാതാ ആഹാരഗേധിനോതി, ചിരകാലം ജിഘച്ഛായ ജിഘച്ഛിതാ ആഹാരേ ഗിദ്ധാ അഭിഗിജ്ഝന്താ ഹുത്വാ, ഏവം ഗന്ത്വാപി കിഞ്ചി ആഹാരം അലദ്ധായേവ നിവത്താമ. അപ്പപുഞ്ഞതാതി അപുഞ്ഞതാ അകതകല്യാണതാ.

൭൮൯. ഉത്താനാ പടികിരാമാതി കദാചി ഉത്താനാ ഹുത്വാ വികിരിയമാനങ്ഗപച്ചങ്ഗാ വിയ വത്താമ. അവകുജ്ജാ പതാമസേതി കദാചി അവകുജ്ജാ ഹുത്വാ പതാമ.

൭൯൦. തേ ചാതി തേ മയം. ഉരം സീസഞ്ച ഘട്ടേമാതി അവകുജ്ജാ ഹുത്വാ പതിതാ ഉട്ഠാതും അസക്കോന്താ വേധന്താ വേദനാപ്പത്താ അത്തനോ അത്തനോ ഉരം സീസഞ്ച പടിഘംസാമ. സേസം ഹേട്ഠാ വുത്തനയമേവ.

ഥേരോ തം പവത്തിം ഭഗവതോ ആരോചേസി. ഭഗവാ തമത്ഥം അട്ഠുപ്പത്തിം കത്വാ സമ്പത്തപരിസായ ധമ്മം ദേസേസി. തം സുത്വാ മഹാജനോ മച്ഛേരമലം പഹായ ദാനാദിസുചരിതനിരതോ അഹോസീതി.

ഗണപേതവത്ഥുവണ്ണനാ നിട്ഠിതാ.