൧൦. വേവചനഹാരസമ്പാതവണ്ണനാ

൭൨. ‘‘മാനസം ഹദയം പണ്ഡരം വിഞ്ഞാണം വിഞ്ഞാണക്ഖന്ധോ മനോവിഞ്ഞാണധാതൂ’’തി (ധ. സ. ൬) ച ചിത്തസ്സ വേവചനം. ‘‘തക്കോ വിതക്കോ സങ്കപ്പോ അപ്പനാ ബ്യപ്പനാ ചേതസോ അഭിനിരോപനാ’’തി ച സമ്മാസങ്കപ്പസ്സ. ‘‘പഞ്ഞാ പജാനനാ വിചയോ പവിചയോ’’തിആദിനാ (ധ. സ. ൧൬) സമ്മാദിട്ഠിയാ. ‘‘ഥിനം ഥിയനാ ഥിയിതത്തം ചിത്തസ്സ അകല്ലതാ അകമ്മഞ്ഞതാ ഓനാഹോ പരിനാഹോ അന്തോസങ്കോചോ’’തി ഥിനസ്സ. ‘‘അകല്ലതാ അകമ്മഞ്ഞതാ കായാലസിയം സുപ്യം സുപ്യനാ സുപിതത്ത’’ന്തി (ധ. സ. ൧൧൬൩) മിദ്ധസ്സ. ‘‘ഭിക്ഖകോ ഭിക്ഖൂ’’തിആദിനാ (പാരാ. ൪൫) ഭിക്ഖുപദസ്സ. ‘‘ദുഗ്ഗതി അപായോ വിനിപാതോ വട്ടദുക്ഖം സംസാരോ’’തിആദിനാ ദുഗ്ഗതിയാ വേവചനം വേദിതബ്ബം.

വേവചനഹാരസമ്പാതവണ്ണനാ നിട്ഠിതാ.