൫. ദുച്ചരിതസുത്തവണ്ണനാ

൬൪. പഞ്ചമേ ദുട്ഠു ചരിതാനി, ദുട്ഠാനി വാ ചരിതാനി ദുച്ചരിതാനി. കായേന ദുച്ചരിതം, കായതോ വാ പവത്തം ദുച്ചരിതം കായദുച്ചരിതം. സേസേസുപി ഏസേവ നയോ. ഇമാനി ച ദുച്ചരിതാനി പഞ്ഞത്തിയാ വാ കഥേതബ്ബാനി കമ്മപഥേഹി വാ. തത്ഥ പഞ്ഞത്തിയാ താവ കായദ്വാരേ പഞ്ഞത്തസിക്ഖാപദസ്സ വീതിക്കമോ കായദുച്ചരിതം, വചീദ്വാരേ പഞ്ഞത്തസിക്ഖാപദസ്സ വീതിക്കമോ വചീദുച്ചരിതം, ഉഭയത്ഥ പഞ്ഞത്തസ്സ വീതിക്കമോ മനോദുച്ചരിതന്തി അയം പഞ്ഞത്തികഥാ. പാണാതിപാതാദയോ പന തിസ്സോ ചേതനാ കായദ്വാരേപി, വചീദ്വാരേപി, ഉപ്പന്നാ കായദുച്ചരിതം, തഥാ ചതസ്സോ മുസാവാദാദിചേതനാ വചീദുച്ചരിതം, അഭിജ്ഝാ, ബ്യാപാദോ, മിച്ഛാദിട്ഠീതി തയോ ചേതനാസമ്പയുത്തധമ്മാ മനോദുച്ചരിതന്തി അയം കമ്മപഥകഥാ.

ഗാഥായം കമ്മപഥപ്പത്തോയേവ പാപധമ്മോ കായദുച്ചരിതാദിഭാവേന വുത്തോതി തദഞ്ഞം പാപധമ്മം സങ്ഗണ്ഹിതും ‘‘യഞ്ചഞ്ഞം ദോസസഞ്ഹിത’’ന്തി വുത്തം. തത്ഥ ദോസസഞ്ഹിതന്തി രാഗാദികിലേസസംഹിതം. സേസം സുവിഞ്ഞേയ്യമേവ.

പഞ്ചമസുത്തവണ്ണനാ നിട്ഠിതാ.