൨. അസ്സജിപുനബ്ബസുകവത്ഥു

ഓവദേയ്യാനുസാസേയ്യാതി ഇമം ധമ്മദേസനം സത്ഥാ ജേതവനേ വിഹരന്തോ അസ്സജിപുനബ്ബസുകഭിക്ഖൂ ആരബ്ഭ കഥേസി. ദേസനാ പന കീടാഗിരിസ്മിം സമുട്ഠിതാ.

തേ കിര ദ്വേ ഭിക്ഖൂ കിഞ്ചാപി അഗ്ഗസാവകാനം സദ്ധിവിഹാരികാ, അലജ്ജിനോ പന അഹേസും പാപഭിക്ഖൂ. തേ പാപകേഹി അത്തനോ പരിവാരേഹി പഞ്ചഹി ഭിക്ഖുസതേഹി സദ്ധിം കീടാഗിരിസ്മിം വിഹരന്താ ‘‘മാലാവച്ഛം രോപേന്തിപി രോപാപേന്തിപീ’’തിആദികം (പാരാ. ൪൩൧; ചൂളവ. ൨൧) നാനപ്പകാരം അനാചാരം കരോന്താ കുലദൂസകകമ്മം കത്വാ തതോ ഉപ്പന്നേഹി പച്ചയേഹി ജീവികം കപ്പേന്താ തം ആവാസം പേസലാനം ഭിക്ഖൂനം അനാവാസം അകംസു. സത്ഥാ തം പവത്തിം സുത്വാ തേസം പബ്ബാജനീയകമ്മകരണത്ഥായ സപരിവാരേ ദ്വേ അഗ്ഗസാവകേ ആമന്തേത്വാ ‘‘ഗച്ഛഥ, സാരിപുത്താ, തേസു യേ തുമ്ഹാകം വചനം ന കരോന്തി, തേസം പബ്ബാജനീയകമ്മം കരോഥ, യേ പന കരോന്തി, തേ ഓവദഥ അനുസാസഥ. ഓവദന്തോ ഹി അനുസാസന്തോ അപണ്ഡിതാനംയേവ അപ്പിയോ ഹോതി അമനാപോ, പണ്ഡിതാനം പന പിയോ ഹോതി മനാപോ’’തി അനുസന്ധിം ഘടേത്വാ ധമ്മം ദേസേന്തോ ഇമം ഗാഥമാഹ –

൭൭. ‘‘ഓവദേയ്യാനുസാസേയ്യ, അസബ്ഭാ ച നിവാരയേ;

സതഞ്ഹി സോ പിയോ ഹോതി, അസതം ഹോതി അപ്പിയോ’’തി.

തത്ഥ ഓവദേയ്യാതി ഉപ്പന്നേ വത്ഥുസ്മിം വദന്തോ ഓവദതി നാമ, അനുപ്പന്നേ വത്ഥുസ്മിം ‘‘അയസോപി തേ സിയാ’’തിആദിവസേന അനാഗതം ദസ്സേന്തോ അനുസാസതി നാമ. സമ്മുഖാ വദന്തോ ഓവദതി നാമ, പരമ്മുഖാ ദൂതം വാ സാസനം വാ പേസേന്തോ അനുസാസതി നാമ. സകിം വദന്തോ ഓവദതി നാമ, പുനപ്പുനം വദന്തോ അനുസാസതി നാമ. ഓവദന്തോ ഏവ വാ അനുസാസതി നാമാതി ഏവം ഓവദേയ്യ അനുസാസേയ്യ. അസബ്ഭാ ചാതി അകുസലധമ്മാ ച നിവാരേയ്യ, കുസലധമ്മേ പതിട്ഠാപേയ്യാതി അത്ഥോ. സതഞ്ഹി സോ പിയോ ഹോതീതി സോ ഏവരൂപോ പുഗ്ഗലോ ബുദ്ധാദീനം സപ്പുരിസാനം പിയോ ഹോതി. യേ പന അദിട്ഠധമ്മാ അവിതിണ്ണപരലോകാ ആമിസചക്ഖുകാ ജീവികത്ഥായ പബ്ബജിതാ, തേസം അസതം സോ ഓവാദകോ അനുസാസകോ, ‘‘‘ന ത്വം അമ്ഹാകം ഉപജ്ഝായോ, ന ആചരിയോ, കസ്മാ അമ്ഹേ ഓവദസീ’തി ഏവം മുഖസത്തീഹി വിജ്ഝന്താനം അപ്പിയോ ഹോതീ’’തി.

ദേസനാവസാനേ ബഹൂ സോതാപത്തിഫലാദീനി പാപുണിംസൂതി. സാരിപുത്തമോഗ്ഗല്ലാനാപി തത്ഥ ഗന്ത്വാ തേ ഭിക്ഖൂ ഓവദിംസു അനുസാസിംസു. തേസു ഏകച്ചേ ഓവാദം സമ്പടിച്ഛിത്വാ സമ്മാ വത്തിംസു, ഏകച്ചേ വിബ്ഭമിംസു, ഏകച്ചേ പബ്ബാജനീയകമ്മം പാപുണിംസൂതി.

അസ്സജിപുനബ്ബസുകവത്ഥു ദുതിയം.