൩. ചമ്പേയ്യനാഗചരിയാവണ്ണനാ

൨൦. തതിയേ ചമ്പേയ്യകോതി അങ്ഗമഗധരട്ഠാനം അന്തരേ ചമ്പാ നാമ നദീ, തസ്സാ ഹേട്ഠാ നാഗഭവനമ്പി അവിദൂരഭവത്താ ചമ്പാ നാമ, തത്ഥ ജാതോ നാഗരാജാ ചമ്പേയ്യകോ. തദാപി ധമ്മികോ ആസിന്തി തസ്മിം ചമ്പേയ്യനാഗരാജകാലേപി അഹം ധമ്മചാരീ അഹോസിം.

ബോധിസത്തോ ഹി തദാ ചമ്പാനാഗഭവനേ നിബ്ബത്തിത്വാ ചമ്പേയ്യോ നാമ നാഗരാജാ അഹോസി, മഹിദ്ധികോ മഹാനുഭാവോ. സോ തത്ഥ നാഗരജ്ജം കാരേന്തോ ദേവരാജഭോഗസമ്പത്തിസദിസഇസ്സരിയസമ്പത്തിം അനുഭവന്തോ പാരമിപൂരണസ്സ അനോകാസഭാവതോ ‘‘കിം മേ ഇമായ തിരച്ഛാനയോനിയാ, ഉപോസഥവാസം വസിത്വാ ഇതോ മുച്ചിത്വാ സമ്മദേവ പാരമിയോ പൂരേസ്സാമീ’’തി തതോ പട്ഠായ അത്തനോ പാസാദേയേവ ഉപോസഥകമ്മം കരോതി. അലങ്കതനാഗമാണവികാ തസ്സ സന്തികം ആഗച്ഛന്തി. സോ ‘‘ഇധ മേ സീലസ്സ അന്തരായോ ഭവിസ്സതീ’’തി പാസാദതോ നിക്ഖമിത്വാ ഉയ്യാനേ നിസീദതി. തത്രാപി താ ആഗച്ഛന്തി. സോ ചിന്തേസി – ‘‘ഇധ മേ സീലസ്സ സംകിലേസോ ഭവിസ്സതി, ഇതോ നാഗഭവനതോ നിക്ഖമിത്വാ മനുസ്സലോകം ഗന്ത്വാ ഉപോസഥവാസം വസിസ്സാമീ’’തി. സോ തതോ പട്ഠായ ഉപോസഥദിവസേസു നാഗഭവനാ നിക്ഖമിത്വാ ഏകസ്സ പച്ചന്തഗാമസ്സ അവിദൂരേ മഗ്ഗസമീപേ വമ്മികമത്ഥകേ ‘‘മമ ചമ്മാദീഹി അത്ഥികാ ചമ്മാദീനി ഗണ്ഹന്തു, കീളാസപ്പം വാ കാതുകാമാ കീളാസപ്പം കരോന്തൂ’’തി സരീരം ദാനമുഖേ വിസ്സജ്ജേത്വാ ഭോഗേ ആഭുജിത്വാ നിപന്നോ ഉപോസഥവാസം വസതി ചാതുദ്ദസിയം പഞ്ചദസിയഞ്ച, പാടിപദേ നാഗഭവനം ഗച്ഛതി. തസ്സേവം ഉപോസഥം കരോന്തസ്സ ദീഘോ അദ്ധാ വീതിവത്തോ.

അഥ ബോധിസത്തോ സുമനായ നാമ അത്തനോ അഗ്ഗമഹേസിയാ ‘‘ദേവ, ത്വം മനുസ്സലോകം ഗന്ത്വാ ഉപോസഥം ഉപവസസി, സോ ച സാസങ്കോ സപ്പടിഭയോ’’തി വുത്തോ മങ്ഗലപോക്ഖരണിതീരേ ഠത്വാ ‘‘സചേ മം, ഭദ്ദേ, കോചി പഹരിത്വാ കിലമേസ്സതി, ഇമിസ്സാ പോക്ഖരണിയാ ഉദകം ആവിലം ഭവിസ്സതി. സചേ സുപണ്ണോ ഗണ്ഹിസ്സതി, ഉദകം പക്കുഥിസ്സതി. സചേ അഹിതുണ്ഡികോ ഗണ്ഹിസ്സതി, ഉദകം ലോഹിതവണ്ണം ഭവിസ്സതീ’’തി തീണി നിമിത്താനി തസ്സാ ആചിക്ഖിത്വാ ചാതുദ്ദസീഉപോസഥം അധിട്ഠായ നാഗഭവനാ നിക്ഖമിത്വാ തത്ഥ ഗന്ത്വാ വമ്മികമത്ഥകേ നിപജ്ജി സരീരസോഭായ വമ്മികം സോഭയമാനോ. സരീരഞ്ഹിസ്സ രജതദാമം വിയ സേതം അഹോസി, മത്ഥകോ രത്തകമ്ബലഗേണ്ഡുകോ വിയ, സരീരം നങ്ഗലസീസപ്പമാണം ഭൂരിദത്തകാലേ (ജാ. ൨.൨൨.൭൮൪ ആദയോ) പന ഊരുപ്പമാണം, സങ്ഖപാലകാലേ (ജാ. ൨.൧൭.൧൪൩ ആദയോ) ഏകദോണികനാവപ്പമാണം.

തദാ ഏകോ ബാരാണസിമാണവോ തക്കസിലം ഗന്ത്വാ അലമ്പായനമന്തം ഉഗ്ഗണ്ഹിത്വാ തേന മഗ്ഗേന അത്തനോ ഗാമം ഗച്ഛന്തോ മഹാസത്തം ദിസ്വാ ‘‘കിം മേ തുച്ഛഹത്ഥേന ഗാമം ഗന്തും, ഇമം നാഗം ഗഹേത്വാ ഗാമനിഗമരാജധാനീസു കീളാപേന്തോ ധനം ഉപ്പാദേത്വാവ ഗമിസ്സാമീ’’തി ചിന്തേത്വാ ദിബ്ബോസധാനി ഗഹേത്വാ ദിബ്ബമന്തം പരിവത്തേത്വാ തസ്സ സന്തികം അഗമാസി. ദിബ്ബമന്തം സുതകാലതോ പട്ഠായ മഹാസത്തസ്സ കണ്ണേസു തത്തസലാകാപവേസനകാലോ വിയ അഹോസി, മത്ഥകേ സിഖരേന അഭിമന്ഥിയമാനോ വിയ. സോ ‘‘കോ നു ഖോ ഏസോ’’തി ഭോഗന്തരതോ സീസം ഉക്ഖിപിത്വാ ഓലോകേന്തോ അഹിതുണ്ഡികം ദിസ്വാ ചിന്തേസി – ‘‘മമ വിസം ഉഗ്ഗതേജം, സചാഹം കുജ്ഝിത്വാ നാസാവാതം വിസ്സജ്ജേസ്സാമി, ഏതസ്സ സരീരം ഭുസമുട്ഠി വിയ വിപ്പകിരിസ്സതി, അഥ മേ സീലം ഖണ്ഡം ഭവിസ്സതി, ന നം ഓലോകേസ്സാമീ’’തി. സോ അക്ഖീനി നിമ്മീലേത്വാ സീസം ഭോഗന്തരേ ഠപേസി. അഹിതുണ്ഡികബ്രാഹ്മണോ ഓസധം ഖാദിത്വാ മന്തം പരിവത്തേത്വാ ഖേളം മഹാസത്തസ്സ സരീരേ ഓസിഞ്ചി. ഓസധാനഞ്ച മന്തസ്സ ച ആനുഭാവേന ഖേളേന ഫുട്ഠഫുട്ഠട്ഠാനേ ഫോടാനം ഉട്ഠാനകാലോ വിയ അഹോസി.

അഥ സോ നങ്ഗുട്ഠേ ഗഹേത്വാ ആകഡ്ഢിത്വാ ദീഘസോ നിപജ്ജാപേത്വാ അജപദേന ദണ്ഡേന ഉപ്പീളേത്വാ ദുബ്ബലം കത്വാ സീസം ദള്ഹം ഗഹേത്വാ നിപ്പീളേസി. മഹാസത്തോ മുഖം വിവരി. അഥസ്സ മുഖേ ഖേളം ഓസിഞ്ചിത്വാ ഓസധമന്തബലേന ദന്തേ ഭിന്ദി. മുഖം ലോഹിതസ്സ പൂരി. മഹാസത്തോ അത്തനോ സീലഭേദഭയേന ഏവരൂപം ദുക്ഖം അധിവാസേന്തോ അക്ഖീനി ഉമ്മീലേത്വാ ഓലോകനമത്തമ്പി നാകാസി. സോപി ‘‘നാഗരാജാനം ദുബ്ബലം കരിസ്സാമീ’’തി നങ്ഗുട്ഠതോ പട്ഠായ അട്ഠീനി സംചുണ്ണയമാനോ വിയ സകലസരീരം മദ്ദിത്വാ പട്ടകവേഠനം നാമ വേഠേസി, തന്തമജ്ജിതം നാമ മജ്ജി, നങ്ഗുട്ഠേ ഗഹേത്വാ ദുസ്സപോഥനം നാമ പോഥേസി. മഹാസത്തസ്സ സകലസരീരം ലോഹിതമക്ഖിതം അഹോസി, സോ മഹാവേദനം അധിവാസേസി.

അഥസ്സ ദുബ്ബലഭാവം ഞത്വാ വല്ലീഹി പേളം കരിത്വാ തത്ഥ നം പക്ഖിപിത്വാ പച്ചന്തഗാമം നേത്വാ മഹാജനസ്സ മജ്ഝേ കീളാപേസി. നീലാദീസു വണ്ണേസു വട്ടചതുരസ്സാദീസു സണ്ഠാനേസു അണുംഥൂലാദീസു പമാണേസു യം യം ബ്രാഹ്മണോ ഇച്ഛതി, മഹാസത്തോ തം തദേവ കത്വാ നച്ചതി, ഫണസതമ്പി ഫണസഹസ്സമ്പി കരോതിയേവ. മഹാജനോ പസീദിത്വാ ബഹുധനമദാസി. ഏകദിവസമേവ കഹാപണസഹസ്സഞ്ചേവ സഹസ്സഗ്ഘനികേ ച പരിക്ഖാരേ ലഭി. ബ്രാഹ്മണോ ആദിതോവ ‘‘സഹസ്സം ലഭിത്വാ വിസ്സജ്ജേസ്സാമീ’’തി ചിന്തേസി. തം പന ധനം ലഭിത്വാ ‘‘പച്ചന്തഗാമേയേവ താവ മേ ഏത്തകം ധനം ലദ്ധം, രാജരാജമഹാമത്താനം ദസ്സിതേ കീവ ബഹും ധനം ലഭിസ്സാമീ’’തി സകടഞ്ച സുഖയാനകഞ്ച ഗഹേത്വാ സകടേ പരിക്ഖാരേ ഠപേത്വാ സുഖയാനകേ നിസിന്നോ ‘‘മഹന്തേന പരിവാരേന മഹാസത്തം ഗാമനിഗമരാജധാനീസു കീളാപേന്തോ ബാരാണസിയം ഉഗ്ഗസേനരഞ്ഞോ സന്തികേ കീളാപേത്വാ വിസ്സജ്ജേസ്സാമീ’’തി അഗമാസി. സോ മണ്ഡൂകേ മാരേത്വാ നാഗരഞ്ഞോ ദേതി. നാഗരാജാ ‘‘പുനപ്പുനം മം നിസ്സായ മാരേസ്സതീ’’തി ന ഖാദതി. അഥസ്സ മധുലാജേ അദാസി. തേപി ‘‘സചാഹം ഗോചരം ഗണ്ഹിസ്സാമി, അന്തോപേളായമേവ മരണം ഭവിസ്സതീ’’തി ന ഖാദതി.

൨൧. ബ്രാഹ്മണോ മാസമത്തേന ബാരാണസിം പത്വാ ദ്വാരഗാമകേ തം കീളാപേന്തോ ബഹുധനം ലഭി. രാജാപി നം പക്കോസാപേത്വാ ‘‘അമ്ഹാകമ്പി കീളാപേഹീ’’തി ആഹ. ‘‘സാധു, ദേവ, സ്വേ പന്നരസേ തുമ്ഹാകം കീളാപേസ്സാമീ’’തി ആഹ. രാജാ ‘‘സ്വേ നാഗരാജാ രാജങ്ഗണേ നച്ചിസ്സതി, മഹാജനോ സന്നിപതിത്വാ പസ്സതൂ’’തി ഭേരിം ചരാപേത്വാ പുനദിവസേ രാജങ്ഗണം അലങ്കാരാപേത്വാ ബ്രാഹ്മണം പക്കോസാപേസി. സോ രതനപേളായ മഹാസത്തം നേത്വാ വിചിത്തത്ഥരേ പേളം ഠപേത്വാ നിസീദി. രാജാപി പാസാദാ ഓരുയ്ഹ മഹാജനപരിവുതോ രാജാസനേ നിസീദി. ബ്രാഹ്മണോ മഹാസത്തം നീഹരിത്വാ നച്ചാപേസി. മഹാസത്തോ തേന ചിന്തിതചിന്തിതാകാരം ദസ്സേസി. മഹാജനോ സകഭാവേന സന്ധാരേതും ന സക്കോതി. ചേലുക്ഖേപസഹസ്സാനി പവത്തന്തി. ബോധിസത്തസ്സ ഉപരി രതനവസ്സം വസ്സി. തേന വുത്തം ‘‘തദാപി മം ധമ്മചാരി’’ന്തിആദി.

തത്ഥ തദാപീതി യദാഹം ചമ്പേയ്യകോ നാഗരാജാ ഹോമി, തദാപി. ധമ്മചാരിന്തി ദസകുസലകമ്മപഥധമ്മം ഏവ ചരതി, ന അണുമത്തമ്പി അധമ്മന്തി ധമ്മചാരീ. ഉപവുട്ഠഉപോസഥന്തി അട്ഠങ്ഗസമന്നാഗതസ്സ അരിയുപോസഥസീലസ്സ രക്ഖണവസേന ഉപവസിതഉപോസഥം. രാജദ്വാരമ്ഹി കീളതീതി ബാരാണസിയം ഉഗ്ഗസേനരഞ്ഞോ ഗേഹദ്വാരേ കീളാപേതി.

൨൨. യം യം സോ വണ്ണം ചിന്തയീതി സോ അഹിതുണ്ഡികബ്രാഹ്മണോ ‘‘യം യം നീലാദിവണ്ണം ഹോതൂ’’തി ചിന്തേസി. തേന വുത്തം ‘‘നീലം വ പീതലോഹിത’’ന്തി. തത്ഥ നീലം വാതി വാ-സദ്ദോ അനിയമത്ഥോ, ഗാഥാസുഖത്ഥം രസ്സം കത്വാ വുത്തോ, തേന വാസദ്ദേന വുത്താവസിട്ഠം ഓദാതാദിവണ്ണവിസേസഞ്ചേവ വട്ടാദിസണ്ഠാനവിസേസഞ്ച അണുംഥൂലാദിപമാണവിസേസഞ്ച സങ്ഗണ്ഹാതി. തസ്സ ചിത്താനുവത്തന്തോതി തസ്സ അഹിതുണ്ഡികസ്സ ചിത്തം അനുവത്തന്തോ. ചിന്തിതസന്നിഭോതി തേന ചിന്തിതചിന്തിതാകാരേന പേക്ഖജനസ്സ ഉപട്ഠഹാമീതി ദസ്സേതി.

൨൩. ന കേവലഞ്ച തേന ചിന്തിതാകാരദസ്സനം ഏവ മയ്ഹം ആനുഭാവോ. അപി ച ഥലം കരേയ്യമുദകം, ഉദകമ്പി ഥലം കരേതി ഥലം മഹാപഥവിം ഗഹേത്വാ ഉദകം, ഉദകമ്പി ഗഹേത്വാ പഥവിം കാതും സക്കുണേയ്യം ഏവം മഹാനുഭാവോ ച. യദിഹം തസ്സ കുപ്പേയ്യന്തി തസ്സ അഹിതുണ്ഡികസ്സ അഹം യദി കുജ്ഝേയ്യം. ഖണേന ഛാരികം കരേതി കോധുപ്പാദക്ഖണേ ഏവ ഭസ്മം കരേയ്യം.

൨൪. ഏവം ഭഗവാ തദാ അത്തനോ ഉപ്പജ്ജനകാനത്ഥപടിബാഹനേ സമത്ഥതം ദസ്സേത്വാ ഇദാനി യേന അധിപ്പായേന തം പടിബാഹനം ന കതം, തം ദസ്സേതും ‘‘യദി ചിത്തവസീ ഹേസ്സ’’ന്തിആദിമാഹ.

തസ്സത്ഥോ – ‘‘അയം അഹിതുണ്ഡികോ മം അതിവിയ ബാധതി, ന മേ ആനുഭാവം ജാനാതി, ഹന്ദസ്സ മേ ആനുഭാവം ദസ്സേസ്സാമീ’’തി കുജ്ഝിത്വാ ഓലോകനമത്തേനാപി യദി ചിത്തവസീ അഭവിസ്സം, അഥ സോ ഭുസമുട്ഠി വിയ വിപ്പകിരിസ്സതി. അഹം യഥാസമാദിന്നതോ പരിഹായിസ്സാമി സീലതോ. തഥാ ച സതി സീലേന പരിഹീനസ്സ ഖണ്ഡിതസീലസ്സ യ്വായം മയാ ദീപങ്കരദസബലസ്സ പാദമൂലതോ പട്ഠായ അഭിപത്ഥിതോ, ഉത്തമത്ഥോ ബുദ്ധഭാവോ സോ ന സിജ്ഝതി.

൨൫. കാമം ഭിജ്ജതുയം കായോതി അയം ചാതുമഹാഭൂതികോ ഓദനകുമ്മാസൂപചയോ അനിച്ചുച്ഛാദനപരിമദ്ദനഭേദനവിദ്ധംസനധമ്മോ കായോ കിഞ്ചാപി ഭിജ്ജതു വിനസ്സതു, ഇധേവ ഇമസ്മിം ഏവ ഠാനേ മഹാവാതേ ഖിത്തഭുസമുട്ഠി വിയ വിപ്പകിരീയതു, നേവ സീലം പഭിന്ദേയ്യം, വികിരന്തേ ഭുസം വിയാതി സീലം പന ഉത്തമത്ഥസിദ്ധിയാ ഹേതുഭൂതം ഇമസ്മിം കളേവരേ ഭുസമുട്ഠി വിയ വിപ്പകിരന്തേപി നേവ ഭിന്ദേയ്യം, കായജീവിതേസു നിരപേക്ഖോ ഹുത്വാ സീലപാരമിംയേവ പൂരേമീതി ചിന്തേത്വാ തം താദിസം ദുക്ഖം തദാ അധിവാസേസിന്തി ദസ്സേതി.

അഥ മഹാസത്തസ്സ പന അഹിതുണ്ഡികഹത്ഥഗതസ്സ മാസോ പരിപൂരി, ഏത്തകം കാലം നിരാഹാരോവ അഹോസി. സുമനാ ‘‘അതിചിരായതി മേ സാമികോ, കോ നു ഖോ പവത്തീ’’തി പോക്ഖരണിം ഓലോകേന്തീ ലോഹിതവണ്ണം ഉദകം ദിസ്വാ ‘‘അഹിതുണ്ഡികേന ഗഹിതോ ഭവിസ്സതീ’’തി ഞത്വാ നാഗഭവനാ നിക്ഖമിത്വാ വമ്മികസന്തികം ഗന്ത്വാ മഹാസത്തസ്സ ഗഹിതട്ഠാനം കിലമിതട്ഠാനഞ്ച ദിസ്വാ രോദിത്വാ കന്ദിത്വാ പച്ചന്തഗാമം ഗന്ത്വാ പുച്ഛിത്വാ തം പവത്തിം സുത്വാ ബാരാണസിം ഗന്ത്വാ രാജദ്വാരേ ആകാസേ രോദമാനാ അട്ഠാസി. മഹാസത്തോ നച്ചന്തോവ ആകാസം ഉല്ലോകേന്തോ തം ദിസ്വാ ലജ്ജിതോ പേളം പവിസിത്വാ നിപജ്ജി.

രാജാ തസ്സ പേളം പവിട്ഠകാലേ ‘‘കിം നു ഖോ കാരണ’’ന്തി ഇതോ ചിതോ ച ഓലോകേന്തോ തം ആകാസേ ഠിതം ദിസ്വാ ‘‘കാ നു ത്വ’’ന്തി പുച്ഛിത്വാ തസ്സാ നാഗകഞ്ഞാഭാവം സുത്വാ ‘‘നിസ്സംസയം ഖോ നാഗരാജാ ഇമം ദിസ്വാ ലജ്ജിതോ പേളം പവിട്ഠോ, അയഞ്ച യഥാദസ്സിതോ ഇദ്ധാനുഭാവോ നാഗരാജസ്സേവ, ന അഹിതുണ്ഡികസ്സാ’’തി നിട്ഠം ഗന്ത്വാ ‘‘ഏവം മഹാനുഭാവോ അയം നാഗരാജാ, കഥം നാമ ഇമസ്സ ഹത്ഥം ഗതോ’’തി പുച്ഛിത്വാ ‘‘അയം ധമ്മചാരീ സീലവാ നാഗരാജാ, ചാതുദ്ദസീപന്നരസീസു ഉപോസഥം ഉപവസന്തോ അത്തനോ സരീരം ദാനമുഖേ നിയ്യാതേത്വാ മഹാമഗ്ഗസമീപേ വമ്മികമത്ഥകേ നിപജ്ജതി, തത്ഥായമേതേന ഗഹിതോ, ഇമസ്സ ദേവച്ഛരാപടിഭാഗാ അനേകസഹസ്സാ ഇത്ഥിയോ, ദേവലോകസമ്പത്തിസദിസാ നാഗഭവനസമ്പത്തി, അയം മഹിദ്ധികോ മഹാനുഭാവോ സകലപഥവിം പരിവത്തേതും സമത്ഥോ, കേവലം ‘സീലം മേ ഭിജ്ജിസ്സതീ’തി ഏവരൂപം വിപ്പകാരം ദുക്ഖഞ്ച അനുഭോതീ’’തി ച സുത്വാ സംവേഗപ്പത്തോ താവദേവ തസ്സ അഹിതുണ്ഡികസ്സ ബ്രാഹ്മണസ്സ ബഹും ധനം മഹന്തഞ്ച യസം ഇസ്സരിയഞ്ച ദത്വാ – ‘‘ഹന്ദ, ഭോ, ഇമം നാഗരാജാനം വിസ്സജ്ജേഹീ’’തി വിസ്സജ്ജാപേസി.

മഹാസത്തോ നാഗവണ്ണം അന്തരധാപേത്വാ മാണവകവണ്ണേന ദേവകുമാരോ വിയ അട്ഠാസി. സുമനാപി ആകാസതോ ഓതരിത്വാ തസ്സ സന്തികേ അട്ഠാസി. നാഗരാജാ രഞ്ഞോ അഞ്ജലിം കത്വാ ‘‘ഏഹി, മഹാരാജ, മയ്ഹം നിവേസനം പസ്സിതും ആഗച്ഛാഹീ’’തി യാചി. തേനാഹ ഭഗവാ –

‘‘മുത്തോ ചമ്പേയ്യകോ നാഗോ, രാജാനം ഏതദബ്രവി;

‘നമോ തേ കാസിരാജത്ഥു, നമോ തേ കാസിവഡ്ഢന;

അഞ്ജലിം തേ പഗ്ഗണ്ഹാമി, പസ്സേയ്യം മേ നിവേസന’’ന്തി.

അഥ രാജാ തസ്സ നാഗഭവനഗമനം അനുജാനി. മഹാസത്തോ തം സപരിസം ഗഹേത്വാ നാഗഭവനം നേത്വാ അത്തനോ ഇസ്സരിയസമ്പത്തിം ദസ്സേത്വാ കതിപാഹം തത്ഥ വസാപേത്വാ ഭേരിം ചരാപേസി – ‘‘സബ്ബാ രാജപരിസാ യാവദിച്ഛകം ഹിരഞ്ഞസുവണ്ണാദികം ധനം ഗണ്ഹതൂ’’തി. രഞ്ഞോ ച അനേകേഹി സകടസതേഹി ധനം പേസേസി. ‘‘മഹാരാജ, രഞ്ഞാ നാമ ദാനം ദാതബ്ബം, സീലം രക്ഖിതബ്ബം, ധമ്മികാ രക്ഖാവരണഗുത്തി സബ്ബത്ഥ സംവിദഹിതബ്ബാ’’തി ദസഹി രാജധമ്മകഥാഹി ഓവദിത്വാ വിസ്സജ്ജേസി. രാജാ മഹന്തേന യസേന നാഗഭവനാ നിക്ഖമിത്വാ ബാരാണസിമേവ ഗതോ. തതോ പട്ഠായ കിര ജമ്ബുദീപതലേ ഹിരഞ്ഞസുവണ്ണം ജാതം. മഹാസത്തോ സീലാനി രക്ഖിത്വാ അന്വദ്ധമാസം ഉപോസഥകമ്മം കത്വാ സപരിസോ സഗ്ഗപുരം പൂരേസി.

തദാ അഹിതുണ്ഡികോ ദേവദത്തോ അഹോസി, സുമനാ രാഹുലമാതാ, ഉഗ്ഗസേനോ സാരിപുത്തത്ഥേരോ, ചമ്പേയ്യകോ നാഗരാജാ ലോകനാഥോ.

തസ്സ ഇധാപി യഥാരഹം സേസപാരമിയോ നിദ്ധാരേതബ്ബാ. ഇധ ബോധിസത്തസ്സ അച്ഛരിയാനുഭാവാ ഹേട്ഠാ വുത്തനയാ ഏവാതി.

ചമ്പേയ്യനാഗചരിയാവണ്ണനാ നിട്ഠിതാ.