൯. ബോധിസിഞ്ചകത്ഥേരഅപദാനവണ്ണനാ

വിപസ്സിസ്സ ഭഗവതോതിആദികം ആയസ്മതോ ബോധിസിഞ്ചകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ അനേകാസു ജാതീസു വിവട്ടൂപനിസ്സയാനി പുഞ്ഞാനി ഉപചിനന്തോ വിപസ്സിസ്സ ഭഗവതോ കാലേ കുലഗേഹേ നിബ്ബത്തോ സാസനേ പബ്ബജിത്വാ വത്തപടിപത്തിയാ സാസനം സോഭയന്തോ മഹാജനേ ബോധിപൂജം കുരുമാനേ ദിസ്വാ അനേകാനി പുപ്ഫാനി സുഗന്ധോദകാനി ച ഗാഹാപേത്വാ പൂജേസി. സോ തേന പുഞ്ഞേന ദേവലോകേ നിബ്ബത്തോ ഛ കാമാവചരസമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ കുലഗേഹേ നിബ്ബത്തോ വുദ്ധിമന്വായ സദ്ധാജാതോ പബ്ബജിത്വാ നചിരസ്സേവ അരഹാ അഹോസി.

൪൬. സോ അരഹാ ഹുത്വാ ഝാനഫലസുഖേന വീതിനാമേത്വാ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ വിപസ്സിസ്സ ഭഗവതോതിആദിമാഹ. തത്ഥ വിസേസം പരമത്ഥം നിബ്ബാനം പസ്സതീതി വിപസ്സീ, വിസേസേന ഭബ്ബാഭബ്ബജനേ പസ്സതീതി വാ വിപസ്സീ, വിപസ്സന്തോ ചതുസച്ചം പസ്സനദക്ഖനസീലോതി വാ വിപസ്സീ, തസ്സ വിപസ്സിസ്സ ഭഗവതോ മഹാബോധിമഹോ അഹൂതി സമ്ബന്ധോ. തത്രാപി മഹാബോധീതി ബോധി വുച്ചതി ചതൂസു മഗ്ഗേസു ഞാണം, തമേത്ഥ നിസിന്നോ ഭഗവാ പടിവിജ്ഝതീതി കണികാരപാദപരുക്ഖോപി ബോധിച്ചേവ വുച്ചതി, മഹിതോ ച സോ ദേവബ്രഹ്മനരാസുരേഹി ബോധി ചേതി മഹാബോധി, മഹതോ ബുദ്ധസ്സ ഭഗവതോ ബോധീതി വാ മഹാബോധി, തസ്സ മഹോ പൂജാ അഹോസീതി അത്ഥോ. സേസം സബ്ബത്ഥ ഉത്താനത്ഥമേവാതി.

ബോധിസിഞ്ചകത്ഥേരഅപദാനവണ്ണനാ സമത്താ.