൭. ഫലദായകത്ഥേരഅപദാനവണ്ണനാ

പബ്ബതേ ഹിമവന്തമ്ഹീതിആദികം ആയസ്മതോ ഫലദായകത്ഥേരസ്സ അപദാനം. അയമ്പി പുരിമബുദ്ധേസു കതകുസലസമ്ഭാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ ഫുസ്സസ്സ ഭഗവതോ കാലേ ഏകസ്മിം കുലഗേഹേ നിബ്ബത്തോ സുഖപ്പത്തോ തം സബ്ബം പഹായ താപസപബ്ബജ്ജം പബ്ബജിത്വാ ഖരാജിനചമ്മധാരീ ഹുത്വാ വിഹരതി. തസ്മിഞ്ച സമയേ ഫുസ്സം ഭഗവന്തം തത്ഥ സമ്പത്തം ദിസ്വാ പസന്നമാനസോ മധുരാനി ഫലാനി ഗഹേത്വാ ഭോജേസി. സോ തേനേവ കുസലേന ദേവലോകാദീസു പുഞ്ഞസമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ ഏകസ്മിം കുലഗേഹേ നിബ്ബത്തോ വുദ്ധിമന്വായ സത്ഥരി പസീദിത്വാ പബ്ബജിത്വാ നചിരസ്സേവ അരഹാ അഹോസി.

൩൯. സോ അപരഭാഗേ അത്തനോ പുബ്ബകമ്മം അനുസ്സരിത്വാ പുബ്ബചരിതാപദാനം പകാസേന്തോ പബ്ബതേ ഹിമവന്തമ്ഹീതിആദിമാഹ. തം സബ്ബം ഹേട്ഠാ വുത്തനയത്താ ഉത്താനത്ഥമേവാതി.

ഫലദായകത്ഥേരഅപദാനവണ്ണനാ സമത്താ.