൨. ഉപവാനത്ഥേരഅപദാനവണ്ണനാ

പദുമുത്തരോ നാമ ജിനോതിആദികം ആയസ്മതോ ഉപവാനത്ഥേരസ്സ അപദാനം. അയമ്പായസ്മാ പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ ദലിദ്ദകുലേ നിബ്ബത്തിത്വാ വിഞ്ഞുതം പത്തോ ഭഗവതി പരിനിബ്ബുതേ തസ്സ ധാതും ഗഹേത്വാ മനുസ്സദേവനാഗഗരുളകുമ്ഭണ്ഡയക്ഖഗന്ധബ്ബേഹി സത്തരതനമയേ സത്തയോജനികേ ഥൂപേ കതേ തത്ഥ സുധോതം അത്തനോ ഉത്തരസാടകം വേളഗ്ഗേ ലഗ്ഗേത്വാ ആബന്ധിത്വാ ധജം കത്വാ പൂജം അകാസി. തം ഗഹേത്വാ അഭിസമ്മതകോ നാമ യക്ഖസേനാപതി ദേവേഹി ചേതിയപൂജാരക്ഖണത്ഥം ഠപിതോ അദിസ്സമാനകായോ തം ആകാസേ ധാരേന്തോ ചേതിയം തിക്ഖത്തും പദക്ഖിണം അകാസി. സോ തം ദിസ്വാ ഭിയ്യോസോമത്തായ പസന്നമാനസോ ഹുത്വാ തേന പുഞ്ഞകമ്മേന ദേവമനുസ്സേസു സംസരന്തോ ഇമസ്മിം ബുദ്ധുപ്പാദേ സാവത്ഥിയം ബ്രാഹ്മണകുലേ നിബ്ബത്തിത്വാ ഉപവാനോതി ലദ്ധനാമോ വയപ്പത്തോ ജേതവനപടിഗ്ഗഹണേ ബുദ്ധാനുഭാവം ദിസ്വാ പടിലദ്ധസദ്ധോ പബ്ബജിത്വാ വിപസ്സനായ കമ്മം കരോന്തോ അരഹത്തം പത്വാ ഛളഭിഞ്ഞോ അഹോസി. യദാ ഭഗവതോ അഫാസു അഹോസി, തദാ ഥേരോ ഉണ്ഹോദകം തഥാരൂപം പാനകഞ്ച ഭേസജ്ജം ഭഗവതോ ഉപനാമേസി. തേനസ്സ സത്ഥുനോ രോഗോ വൂപസമി. തസ്സ ഭഗവാ അനുമോദനം അകാസി.

൫൨. ഏവം സോ പത്തഅരഹത്തഫലോ അധിഗതഏതദഗ്ഗട്ഠാനോ അത്തനോ പുബ്ബകമ്മം സരിത്വാ സോമനസ്സവസേന പുബ്ബചരിതാപദാനം പകാസേന്തോ പദുമുത്തരോ നാമ ജിനോതിആദിമാഹ. തത്ഥ സബ്ബേസം ലോകിയലോകുത്തരധമ്മാനം പാരഗൂ പരിയോസാനം നിബ്ബാനം ഗതോ പത്തോ പദുമുത്തരോ നാമ ജിനോ ജിതപഞ്ചമാരോ ഭഗവാ അഗ്ഗിക്ഖന്ധോ ഇവ ഛബ്ബണ്ണാ ബുദ്ധരംസിയോ ജലിത്വാ സബ്ബലോകം ധമ്മപജ്ജോതേന ഓഭാസേത്വാ സമ്ബുദ്ധോ സുട്ഠു ബുദ്ധോ അവിജ്ജാനിദ്ദൂപഗതായ പജായ സവാസനായ കിലേസനിദ്ദായ പടിബുദ്ധോ വികസിതനേത്തപങ്കജോ പരിനിബ്ബുതോ ഖന്ധപരിനിബ്ബാനേന നിബ്ബുതോ അദസ്സനം ഗതോതി സമ്ബന്ധോ.

൫൭. ജങ്ഘാതി ചേതിയകരണകാലേ ഉപചിനിതബ്ബാനം ഇട്ഠകാനം ഠപനത്ഥായ, നിബന്ധിയമാനസോപാനപന്തി.

൮൮. സുധോതം രജകേനാഹന്തി വത്ഥധോവകേന പുരിസേന സുട്ഠു ധോവിതം സുവിസുദ്ധകതം, ഉത്തരേയ്യപടം മമ ഉത്തരസാടകം അഹം വേളഗ്ഗേ ലഗ്ഗിത്വാ ധജം കത്വാ ഉക്ഖിപിം, അമ്ബരേ ആകാസേ ഉസ്സാപേസിന്തി അത്ഥോ. സേസം സുവിഞ്ഞേയ്യമേവാതി.

ഉപവാനത്ഥേരഅപദാനവണ്ണനാ സമത്താ.