൧-൧൦. പണ്ണദായകത്ഥേരഅപദാനാദിവണ്ണനാ

൧-൨. ഏകൂനതിംസതിമേ വഗ്ഗേ പഠമാപദാനേ പണ്ണഭോജനഭോജനോതി ഖീരപണ്ണാദിഭോജനസ്സ ഭുഞ്ജനത്ഥായ പണ്ണസാലായ നിസിന്നോ അമ്ഹി ഭവാമീതി അത്ഥോ. ഉപവിട്ഠഞ്ച മം സന്തന്തി പണ്ണസാലായം ഉപവിട്ഠം സന്തം വിജ്ജമാനം മം. ഉപാഗച്ഛി മഹാഇസീതി മഹന്തേ സീലാദിഖന്ധേ ഏസനതോ മഹാഇസി. ലോകപജ്ജോതോ ലോകപദീപോ സിദ്ധത്ഥോ ഭഗവാ ഉപഗച്ഛി, മമ സമീപം അഗമാസീതി അത്ഥോ. നിസിന്നസ്സ പണ്ണസന്ഥരേതി ഉപഗന്ത്വാ പണ്ണസന്ഥരേ നിസിന്നസ്സ ഖാദനത്ഥായ സേദിതം പണ്ണം മയാ ദിന്നന്തി സമ്ബന്ധോ.

൫-൭. ദുതിയാപദാനേ സിനേരുസമസന്തോസോ ധരണീസമസാദിസോ സിദ്ധത്ഥോ ഭഗവാതി സമ്ബന്ധോ. വുട്ഠഹിത്വാ സമാധിമ്ഹാതി നിരോധസമാപത്തിതോ വുട്ഠഹിത്വാ വിസും ഹുത്വാതി അത്ഥോ. ഭിക്ഖായ മമുപട്ഠിതോതി ഭിക്ഖാചാരവേലായ ‘‘അജ്ജ മമ യോ കോചി കിഞ്ചി ദാനം ദദാതി, തസ്സ മഹപ്ഫല’’ന്തി ചിന്തേത്വാ നിസിന്നസ്സ മമ സന്തികം സമീപം ഉപട്ഠിതോ സമീപമാഗതോതി അത്ഥോ. ഹരീതകം…പേ… ഫാരുസകഫലാനി ചാതി ഏവം സബ്ബം തം ഫലം സബ്ബലോകാനുകമ്പിനോ തസ്സ സിദ്ധത്ഥസ്സ മഹേസിസ്സ മയാ വിപ്പസന്നേന ചേതസാ ദിന്നന്തി അത്ഥോ.

൧൧-൧൨. തതിയാപദാനേ സീഹം യഥാ വനചരന്തി വനേ ചരമാനം സീഹരാജം ഇവ ചരമാനം സിദ്ധത്ഥം ഭഗവന്തന്തി സമ്ബന്ധോ. നിസഭാജാനിയം യഥാതി വസഭോ, നിസഭോ, വിസഭോ, ആസഭോതി ചത്താരോ ഗവജേട്ഠകാ. തേസു ഗവസതസ്സ ജേട്ഠകോ വസഭോ, ഗവസഹസ്സസ്സ ജേട്ഠകോ നിസഭോ, ഗവസതസഹസ്സസ്സ ജേട്ഠകോ വിസഭോ, ഗവകോടിസതസഹസ്സസ്സ ജേട്ഠകോ ആസഭോ. ഇധ പന ആസഭോ ‘‘നിസഭോ’’തി വുത്തോ, ആജാനീയം അഭീതം നിച്ചലം ഉസഭരാജം ഇവാതി അത്ഥോ. കകുധം വിലസന്തംവാതി പുപ്ഫപല്ലവേഹി സോഭമാനം കകുധരുക്ഖം ഇവ നരാസഭം നരാനം ആസഭം ഉത്തമം ആഗച്ഛന്തം സിദ്ധത്ഥം ഭഗവന്തം ദിസ്വാ സദ്ധായ സമ്പയുത്തത്താ വിപ്പസന്നേന ചേതസാ പച്ചുഗ്ഗമനം അകാസിന്തി അത്ഥോ.

ചതുത്ഥാപദാനാദീനി ദസമാവസാനാനി സുവിഞ്ഞേയ്യാനേവാതി.

ഏകൂനതിംസതിമവഗ്ഗവണ്ണനാ സമത്താ.