൫. കണികാരഛത്തിയത്ഥേരഅപദാനവണ്ണനാ

വേസ്സഭൂ നാമ സമ്ബുദ്ധോതിആദികം ആയസ്മതോ കണികാരഛത്തിയത്ഥേരസ്സ അപദാനം. അയമ്പി ഥേരോ പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ വേസ്സഭുസ്സ ഭഗവതോ കാലേ കുലഗേഹേ നിബ്ബത്തോ വിഞ്ഞുതം പത്തോ സദ്ധാസമ്പന്നോ അഹോസി. തസ്മിം സമയേ വേസ്സഭൂ ഭഗവാ വിവേകകാമോ മഹാവനം പവിസിത്വാ നിസീദി. അഥ സോപി ഉപാസകോ കേനചിദേവ കരണീയേന തത്ഥ ഗന്ത്വാ ഭഗവന്തം അഗ്ഗിക്ഖന്ധം വിയ ജലമാനം നിസിന്നം ദിസ്വാ പസന്നമാനസോ കണികാരപുപ്ഫം ഓചിനിത്വാ ഛത്തം കത്വാ ഭഗവതോ നിസിന്നട്ഠാനേ വിതാനം കത്വാ പൂജേസി, തം ഭഗവതോ ആനുഭാവേന സത്താഹം അമിലാതം ഹുത്വാ തഥേവ അട്ഠാസി. ഭഗവാപി ഫലസമാപത്തിം നിരോധസമാപത്തിഞ്ച സമാപജ്ജിത്വാ വിഹാസി, സോ തം അച്ഛരിയം ദിസ്വാ സോമനസ്സജാതോ ഭഗവന്തം വന്ദിത്വാ അഞ്ജലിം പഗ്ഗയ്ഹ അട്ഠാസി. ഭഗവാ സമാപത്തിതോ വുട്ഠഹിത്വാ വിഹാരമേവ അഗമാസി.

൨൩. സോ തേന പുഞ്ഞേന ദേവമനുസ്സേസു സമ്പത്തിയോ അനുഭവിത്വാ ഇമസ്മിം ബുദ്ധുപ്പാദേ സാവത്ഥിയം കുലഗേഹേ നിബ്ബത്തോ വുദ്ധിമന്വായ സദ്ധാസമ്പന്നോ സത്ഥു ധമ്മദേസനം സുത്വാ ഘരാവാസേ അനല്ലീനോ പബ്ബജിത്വാ വത്തപടിപത്തിയാ ജിനസാസനം സോഭേന്തോ നചിരസ്സേവ അരഹാ ഹുത്വാ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ വേസ്സഭൂ നാമ സമ്ബുദ്ധോതിആദിമാഹ. തത്ഥ വേസ്സഭൂതി വേസ്സേ വേസ്സജനേ ഭുനാതി അഭിഭവതീതി വേസ്സഭൂ. അഥ വാ വേസ്സേ പഞ്ചവിധമാരേ അഭിഭുനാതി അജ്ഝോത്ഥരതീതി വേസ്സഭൂ. സാമംയേവ ബുജ്ഝിതാ സച്ചാനീതി സമ്ബുദ്ധോ, നാമേന വേസ്സഭൂ നാമ സമ്ബുദ്ധോതി അത്ഥോ. ദിവാവിഹാരായ മുനീതി ദിബ്ബതി പകാസേതി തം തം വത്ഥും പാകടം കരോതീതി ദിവാ. സൂരിയുഗ്ഗമനതോ പട്ഠായ യാവ അത്ഥങ്ഗമോ, താവ പരിച്ഛിന്നകാലോ, വിഹരണം ചതൂഹി ഇരിയാപഥേഹി പവത്തനം വിഹാരോ, ദിവായ വിഹാരോ ദിവാവിഹാരോ, തസ്സ ദിവാവിഹാരായ ലോകജേട്ഠോ നരാസഭോ ബുദ്ധമുനി മഹാവനം ഓഗാഹിത്വാ പവിസിത്വാതി അത്ഥോ. സേസം ഉത്താനത്ഥമേവാതി.

കണികാരഛത്തിയത്ഥേരഅപദാനവണ്ണനാ സമത്താ.