൨. കണവേരപുപ്ഫിയത്ഥേരഅപദാനവണ്ണനാ

സിദ്ധത്ഥോ നാമ ഭഗവാതിആദികം ആയസ്മതോ കണവേരപുപ്ഫിയത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ സിദ്ധത്ഥസ്സ ഭഗവതോ കാലേ സുദ്ദകുലേ നിബ്ബത്തോ വുദ്ധിമന്വായ രഞ്ഞോ അന്തേപുരപാലകോ അഹോസി. തസ്മിം സമയേ സിദ്ധത്ഥോ ഭഗവാ ഭിക്ഖുസങ്ഘപരിവുതോ രാജവീഥിം പടിപജ്ജി. അഥ സോ അന്തേപുരപാലകോ ചരമാനം ഭഗവന്തം ദിസ്വാ പസന്നമാനസോ ഹുത്വാ കണവേരപുപ്ഫേന ഭഗവന്തം പൂജേത്വാ നമസ്സമാനോ അട്ഠാസി. സോ തേന പുഞ്ഞേന സുഗതിസമ്പത്തിയോയേവ അനുഭവിത്വാ ഇമസ്മിം ബുദ്ധുപ്പാദേ ഏകസ്മിം കുലേ നിബ്ബത്തിത്വാ വുദ്ധിപ്പത്തോ സത്ഥു ധമ്മദേസനം സുത്വാ പടിലദ്ധസദ്ധോ പബ്ബജിത്വാ നചിരസ്സേവ അരഹാ അഹോസി.

൭. സോ പത്തഅഗ്ഗഫലോ പുബ്ബേ കതകുസലം സരിത്വാ സഞ്ജാതസോമനസ്സോ പുബ്ബചരിതാപദാനം പകാസേന്തോ സിദ്ധത്ഥോ നാമ ഭഗവാതിആദിമാഹ. തം സബ്ബം ഹേട്ഠാ വുത്തത്താ ഉത്താനത്ഥമേവാതി.

കണവേരപുപ്ഫിയത്ഥേരഅപദാനവണ്ണനാ സമത്താ.